Luka 19 - Nouveau Testament en Ngombe 1961

Yesu na Sakayo

¹ Yesu amea a Yeliko, na yana anɔkɔ yo a licilinga,

² okina momi adaka ena, kombe ende Sakayo. Iyo adaka mosuku oelomu etako, moto olikonja linɛnɛ.

³ Iyo adaka na posa a bonɛ Yesu; aihɔnɔ ko, mojɔ ho adaka moto mokue, na embamba ebato edaka enɛnɛ.

⁴ Oko boa apota ebango, akɛ boso, na awea mokina mole bo anɛe Yesu, mojɔ bo Yesu akɛkɛ anɔe a njea emina.

⁵ Yana amea Yesu a esika emina, akahoa miso diko, na abala na Sakayo bo, Sakayo, tita bokpa, mojɔ bo mbi napalaka nadae a ndako ewɛ busa bu.

⁶ Sakayo atita bokpa, na asɔ Yesu na sepi enɛnɛ.

⁷ Bato ko, yana anɛ bo mojɔ momina, babanga bobala na manungunungu bo, Akɛi a boda a ndako emoto mobe!

⁸ Sakayo ko ama; abala na Kumu bo, Kumu, ika; mbi nadi bokaba leka lombi mabondo mabae, na nâpa likina ai bato babokwali. Isa natombi eka emoto na bokosea, nâmosɔmbeja leka lonɛi.

⁹ Yesu abala na nde bo, Mohelo modoi a ndako ye busa bu, mojɔ bo yo adi koko mwana oAbalayama.

¹⁰ Mojɔ bo Mwana ’Moto adoi a boduka na boheleja yona odaka mobungake.

Mondɛ Mopata Koto

¹¹ Ahokeaka bato ngando jimina, Yesu abanga bobatɔndɔ mondɛ motongo, cina bo abengeaka Yelusalema, na bato badaka na njingo bo Bokumu boNjambe bodi bodoa bokpa.

¹² Abala bo, Okina moto odenga dikumu akɛ bohali a likota litongo, a bosɔ bokumu oho, na sako ebohula.

¹³ Abea babuli bande, na akaba na bu pata koto emɔci. Abala na bu bo, Kɔni masa na likonja di oko a lihule limbi.

¹⁴ Bato bande ko badaka na nde soki, na baloma bwɛnji ngɔngɔ jinde bo, Iso botapalaka bo moto yo adae kumu osu.

¹⁵ Yana asɔ yobokumu, ahula na abea babuli baya bama sɔ likonja linde, bo akoke-lejae mojɔ momasa mabu.

¹⁶ Yona oboso adoa ai yo, abala bo, Kumu, likonja liwɛ, pata mokama, lihɛi na pata koto emɔci.

¹⁷ Iyo abala bo, Bopele; wɛ mobuli mopele. Wɛ olongi na mojɔ mokɛkɛlɛkɛ; oko boa ôsɔ kpaci a ngando domi.

¹⁸ Yona obabae adoa, abala bo, Kumu, likonja liwɛ, pata mokama, lihɛi koko na pata mikama mitano.

¹⁹ Iyo amosɔmbeja bo, Wɛ odi bosɔ kpaci a ngando jitano.

²⁰ Okina otongo adoa, na yo abala bo, Kumu, likonja liwɛ didi! Mbi nalikanda na litambala na nalibomba.

²¹ Nadaka na bɔ a mojɔ mowɛ, cina bo odi moto mopipo; otombaka leka a esika edi wɛ pɛ bosambea; obukaka ndongo a esika edi wɛ pɛ bona.

²² Iyo amosɔmbeja bo, Mbi nadi bodumba wɛ oko na ekenge ebali wɛ, wɛ mobuli mobe. Ajebi wɛ bo nadi moto mopipo, bo natombaka leka a esika edi mbi pɛ bosambea, na nabukaka ndongo a esika edi mbipɛ bona,

²³ oko boa oisa likonja limbi a banaki mojɔ moye, bo nalisɛ na kundo pongono a lihule limbi?

²⁴ Abala na bato baya badaka ena bo, Mokatoani likonja limina, napani ai yona odi na pata koto emɔci.

²⁵ (Ibo bamosɔmbeja bo, Kumu, yo adi na pata koto emɔci edɛye.)

²⁶ Mbi natɔndɔkɔ no bo, Moto na moto yona opeli âsɔ koko; na yona odi oko ngasa, badi bomokatoa yena epeli yo.

²⁷ A mojɔ mosoki jimbi ko; doani na bato bamina jɔno baya baipala bo mbi nadae kumu obu; bawani ya a boso bombi.

Yesu Akwea a Yelusalema

²⁸ Ama yo bala boa, ami nɔ oko bonɔ bo abenge Yelusalema.

²⁹ Yana abatama yo na Betepage na Betania, na amea yo a mono mua modi na kombe Mono moOlive, aloma bacingami bande babae na monɔkɔ bo,

³⁰ Suani oho a ngando yena edi oho saboso; okameani a ngando emina, ônɛni punda acingi yona otombakini moto. Mocingoani, na hulani na nde jɔno.

³¹ Moto akahɔjɔ no bo, Omocingoakani mojɔ moye? balani oko bo, Kumu amobeakadea.

³² Bato baloma Yesu bakɛ, na batana punda o ama yo bala na bu.

³³ Yana acingoa-ka bo punda, baswa bande babala na bu bo, Ocingoakani punda mojɔ moye?

³⁴ Ibo basɔmbeja bo, Kumu amobeakadea.

³⁵ Badoa na nde ai Yesu, babakea bisenja bibu a punda, na babakea Yesu.

³⁶ Adalaka yo boa, bato bandea bisenja bibu a njea.

³⁷ Abengeaka yo ngando, amea a njea yena etitaka a Mono moOlive; na bacingami bande, emumu enɛnɛ mɛnɛ, babanga bo’mba njembo na bosakoa Njambe na bopipo a mojɔ momindumba misusu mima bo nɛ.

³⁸ Ba’mba yembo bo, Bojongoa ai Koi yona odoaka a kombe eKumu; Bowi oho Diko, na ekumu a bisika bia binɔi Diko.

³⁹ Bakina BaPalusi baya badaka bacingi na bu, babala na Yesu bo, Mokoja, sia bacingami bawɛ.

⁴⁰ Iyo asɔmbeja bo, Mbi natɔndɔko no bo, Ibaba bakayɛyɔ, matai mɛnɛ madi bobekoa.

⁴¹ Yana amea yo hulelu na Yelusalema, anɛ ngando, na ayea bio a mojɔ momina.

⁴² Abala bo, Akɔki wɛ jeba busa bu mijɔ mia micingi na bowi! Edɛye ko mibombami a miso mawɛ.

⁴³ Baya badi na wɛ soki badi bohika wɛ a masu mangɔngɔ; bâlonga mabɛngɛ, na bâdipa njea jiwɛ a mɔngɔ masusu.

⁴⁴ Bâdumba wɛ nase, na bana bawɛ baya badi a tei ewɛ pongono. Batakina nongo litai liwɛ limɔci a diko dilitai litongo, mojɔ bo oijeba ehole edoa Njambe ai wɛ.

⁴⁵ Yesu akwea a tempelo, na abanga bomaneja bato baya bakɔkɔ bwasa.

⁴⁶ Abala na bu bo, Mosɔnɔmɔ bo, Ndako embi ôda ndako ebo’nga. Ino ko oehekojaini bo edae esika etitanaka mibengo.

⁴⁷ Adaka a tempelo tu busa a mojɔ mobokoja. Basuku banganga, na basɔni, na basuku bangando, baduka njea bo bamowoe.

⁴⁸ Bainɛ ko njea, mojɔ bo bato basusu badaka bacingi na nde bo bake mwako monde.