Luka 17 - Nouveau Testament en Ngombe 1961

Mabaku, Ejimeli, Elomu

¹ Yesu abala na bacingami bande bo, Mabaku matakputoa boda a njea. Monɔngɔ ko ai yona osakejaka otongo!

² Moto akasakeja okina obana ba bakɛkɛlɛkɛ, bopele bo bacingee litai linɛnɛ a dɔli linde bo bamodumbe a madiba mambɛngɛ.

³ Toma nganjamani na bikɔmɛli binu bɛnɛ. Mwangwao akakɔ bobe, moleha. Akahekoja molema monde, moyɛ.

⁴ Na akakɔ bobe ai wɛ mɛnɛ bihole sambo a busa bomɔci, na akadoa ai wɛ bihole sambo a bobala bo, Mbi nadi na dosa; toma moyɛ.

⁵ Babwɛnji babala na Kumubo, Hɛjɛ ejimeli esu.

⁶ Kumu abala bo, Akɔki no da na ejimeli ekɛkɛlɛkɛ, o adi mongua mongbɛnji, ka obalini na mole mu bo, Sabikoa, kɛ asapike a madiba mamukwa, na modi bosuma no.

⁷ Okina onu akada na mobuli yona olongeaka gbie isa abaneaka bata, na akahula a gbie, adi bobala na mobuli bo, Doa bokpa a mojɔ moboyaka?

⁸ Atabala na nde bo, Kalea mia mambi; lwa bisenja biwɛ; kɔmɛ mbi. Nakasieja boyaka na bomwaka wɛ ôyaka na ômwaka ngɔngɔ?

⁹ Adi bosakoa mobuli onde mojɔ bo akɔi mua mobali yo na nde?

¹⁰ Ino koko boa; omaka kɔni mijɔ misusu o asɔ no monɔkɔ, balani bo, Iso bodi oko babuli, pɛpɛ bosɔ likonja; bokɔi oko elomu yena abwani na su a bokɔ.

Bato Bamaba Domi

¹¹ Yana akɛkɛ Yesu a Yelusalema, njea ende edaka a sibano eSamalia na Galile.

¹² Akweaka yo a ekina ngando, asongana na bato bamaba domi. Ibo bama bohali mweka

¹³ na babekoa bo, Yesu, Kumu, ikea so wa.

¹⁴ Yana anɛ yo bato bamina, abala na bu bo, Kɛni asanejae ai nganga. Amaka bo kɛ a njea, ba’mi hela oko hohela.

¹⁵ Okina obu omɔci, yana anɛ yo bo yogo ende esia, ahula na asakoa Njambe na bopipo.

¹⁶ Asadumba a bibota biYesu, boso bonde oko a kpɔtɔ, na amosakoa. Moto omina adaka moto oSamalia.

¹⁷ Yesu amosɔmbeja bo, Baheli, te bato domi? Ibo batongo libwa badi jɔ?

¹⁸ Pɛpɛ nongo okina obu ohuli a bosakoa Njambe, oko yo modoa pɛ?

¹⁹ Yesu abala na nde bo, Angɔ, yana a njea ewɛ; ejimeli ewɛ ehelejai wɛ.

Bodoa boMwana ’Moto

²⁰ BaPalusi bahɔjɔ Yesu a mojɔ mobodoa boBokumu boNjambe. Iyo abasɔmbeja bo, Bodoa boBokumu boNjambe boditi na bimbete binɛkɛ bato na miso.

²¹ Bato batabala bo, Anjani, bodi bobo! isa, Bodi jɔno! Mojɔ bo Bokumu boNjambe bodi a tei enu.

²² Yesu abala na bacingami bande bo, A masu mangɔngɔ, ino ôdani na posa a bonɛ busa bomɔci boMwana ’Moto, na ôtabonɛni.

²³ Badi bobala na nu bo, Anjani, adi oho, isa, Anjani adi jɔno. Pɛ bokɛni, pɛ bobasusani;

²⁴ mojɔ bo bodoa boMwana ’Moto bôda o mokalimo. Mokalimo mokamana a dɔngɔ dimɔci dibusa, mohojaka dɔngɔ ditongo pongono; Mwana ’Moto âda koko boa a busa bonde.

²⁵ Iyo ko adi bopeta dingoa bou, na bato baelulu ye badi bomolona.

²⁶ Ekɔmɛli yena edaka a masu maNoa, ôda koko boa a masu maMwana ’Moto.

²⁷ Bato bayakaka na bamwakaka, basɔkɔ bali na bahangaka hali ta meki, oko a busa botamba Noa ta masua yana adoa pela, na basia likinda.

²⁸ Modaka koko boa a masu maLoto; bayakaka na bamwakaka, basombaka na bangɛjɛkɛ leka, banaka gbie na bapikaka ndako.

²⁹ Yana ko adonga Loto a Sɔdɔmɔ, mosa mohula Diko o ekɔmɛli embua, na sufulu pongono, na mobawa kanga basusu a busa bomina.

³⁰ Modi boda koko boa a busa bôboloa Mwana ’Moto.

³¹ Isa moto adi a diko dindako a busa bomina, abwaniti botita a botomba leka londe lua lodi a ndako tei; moto yona odi ta gbie koko boa, abwaniti bosɔmbɔ.

³² T’obosaeni oko mwali oLoto.

³³ Moto yona okengaka bobanea mohelo monde adi bomobungeja, na yona obungejaka mohelo monde adi bomohanea.

³⁴ Mbi natɔndɔkɔ no bo bato babae badi boda a gbagba emɔci a bulu bomina; okina âtombama, yona otongo âdika.

³⁵ Bali babae badi boda a elomu endongo bonda; okina âtombama, otongo adika.

³⁶ Bami babae badi boda a gbie; okina âtombama, otongo âdika.

³⁷ Bacingami bahɔjɔ Yesu bo, Jɔni, Kumu? Iyo abasɔmbeja bo, Miambenga batitanaka oko a esika edi ekuulu.