Luka 16 - Nouveau Testament en Ngombe 1961

Mondɛ moKapita Mobe

¹ Yesu abala koko na bacingami bande bo, Okina konji omɔci adaka na kapita, na bato bamotɔndɔ bo kapita omina abungejaka likonja linde.

² Iyo amobea, abala na nde bo, Mojɔ mokaka mbi mowɛ modi bo? Sɔmbeja mikanda mielomu ewɛ ekapita, mojɔ bo obwaniti boda koko kapita.

³ Kapita alɛ bo, Mbi nakɔ boni? Moswa’mbi adongejaka mbi a elomu ekapita. Naditi na ngulu enɛnɛ a mojɔ moelomu egbie. Nadi boda na sɔni a bo’mba yambo.

⁴ Mbi ko najimi bo nakɔe mokina mojɔ, bo bato basɛ mbi a ndako jibu yana âdonga mbi a elomu ye ekapita.

⁵ Oko boa, abea bato baya badaka na nongo ai moswa’nde. Abala na yona oboso bo, Nongo ewɛ ai moswa’mbi edi bo?

⁶ Iyo asɔmbeja bo, Bisuku biminɛ mokama. Kapita abala na nde bo, Tomba mokanda monongo ewɛ, da ya, sɔnɔ domi-itano bokpa.

⁷ Abala na otongo bo, Nongo ewɛ edi bo? Iyo asɔmbeja bo, Saki jindongo mokama. Kapita abala na nde bo, Tomba mokanda mowɛ monongo, sɔnɔ domi-bomwambe.

⁸ Kumu okapita mobe amosakoa a mojɔ mobowɛi bonde. Mojɔ bo, bana bangondo ye banɔi bana babohu na bowɛi a mojɔ mongando jibu.

⁹ Mbi natɔndɔkɔ no bo, Bolojani babinao na likonja linu, nongo likada eka ebe, Oko boa likataka na nu, badi bosɔ no a ndako jibu na bosusu.

¹⁰ Moto akada bojo a ngando jikɛkɛ, adi boda koko bojo a ngando jimɛnɛnɛ. Moto ko akakosea a ngando jikɛkɛ, adi bokosea koko a ngando jinɛnɛnɛ.

¹¹ Oko boa, isa oditini bojo a mojɔ molikonja lingondo, odi bokina likonja lisoti a mɔmɔ manu nda?

¹² Isa oditini bojɔ a mojɔ moleka lomoto otongo, odi bopa no leka a mojɔ monu bɛnɛ nda?

¹³ Mosali t’ajebake bokɔmɛ baswa babae. Adi bolona okina, na âpala yona otongo, isa adi boda na lisuma ai okina, na asɛtoja yona otongo. Otahɔnɔkɔni bokɔmɛ Njambe na likonja pongono.

¹⁴ BaPalusi badaka na posa elikonja bou mɛnɛ. Yana aka bo mijɔ mi misusu, basɛkɛ Yesu oko bosɛkɛ.

¹⁵ Iyo ko abala na bu bo, Ino odukakani lilonga a boso bobato. Njambe ko ajebaka milema minu. Gina bo, mojɔ mua modi na ekumu a miso mabato mokɔkɔ Njambe maneene.

¹⁶ Ehole eMibeko na batɔndɔi esia oko na Yoane. Babanga botɔndɔ Mwako Mopele moBokumu boNjambe ngɔngɔ jimina, na bato basusu bakɔkɔ na bopipo bo bakwee ena.

¹⁷ Endele ko, pɛpɛ nongo litɔnɔ limɔci liMibeko lidi bogwa; Diko na nase jidi bopeta dimoa.

¹⁸ Moto akayaneja mwali onde, na akasɔ okina otongo, angɛkɛ na nde bɔɔli. Na moto yona osɔkɔ mwali oma yo yaneja, angɛkɛ na nde bɔɔli pongono.

Lazalo na Konji

¹⁹ Okina momi adaka konji. Elwaeli ende esusu edaka oko bisenja bibobuno bonɛnɛ bikpetu na bipu. Ayakaka leka lonɛnɛ lopele tu busa na busa.

²⁰ Okina momi obokwali, kombe ende Lazalo, adaka asambi a monɔkɔ mondako emoto omina. Mokuku monde mosusu modaka oko pola pɛ.

²¹ Iyo adaka oko na posa bo ayake bikenge bileka lua lokwaka a mesa makonji omina. Mbwa badoaka a bolɛpɔ pola jinde.

²² Moto obokwali agwa, na babwɛnji baDiko bamotomba oko a bupa boAbalayama. Konji agwa pongono, na bamopusea.

²³ Adaka yo na mwano monɛnɛ a Seolo, yo akahoa miso diko, anɛ Abalayama oko bohali, na Lazalo a bupa bonde.

²⁴ Abekoa bo, Tata Abalayama, ikeani wa! Loma Lazalo bo adubee sɔngɔ emosapi monde ta madiba a bogɔmbeja yemi embi, mojɔ bo nakaka mwano monɛnɛ a tei emosa mu.

²⁵ Abalayama ko amosɔmbeja bo, Mwana, t’obosae oko bo wɛ osɔ libondo liwɛ lipele yana adaka wɛ a ngondo; Lazalo ko asɔ oko libondo libe. Edɛye ko yo adi na sepi ya, na wɛ odi na monɔngɔ.

²⁶ Mokina mojɔ motongo,—mombɔndɔ monɛnɛ mɛnɛ modi a sibano esu na nu. A mojɔ momina, nongo bato bakapala bodonga ya a bokɛ ai no, batanɛ njea. Na pɛpɛ nongo moto odi bodonga oho a bodoa ai so.

²⁷ Iyo ko abala bo, Sesa, ekada boa, mbi nangɔɔnɔkɔ wɛ bo olome Lazalo a ndako esangwa’mbi

²⁸ a bolekea banangwa’mbi bo basaka doa koko a esika ye emwano; mojɔ bo banangwa’mbi badi batano.

²⁹ Abalayama abala bo, Badi na Mose na batɔndɔi; yɛ babahokee.

³⁰ Iyo ko asɔmbeja bo, Pɛpɛ, sesa Abalayama; okina obagwake ko akakɛ ai bo, badi bohekoja milema mibu.

³¹ Abalayama abala na nde bo, Bamiti hokea Mose na batɔndɔi, batajima, nongo okina obagwake akangɔ.