Luka 14 - Nouveau Testament en Ngombe 1961

Yesu a Ndako eMoPalusi

¹ Yesu akɛ a ndako emosuku omɔci oBaPalusi bokina busa boSabata, a mojɔ moboyaka, na BaPalusi bamonjaka na bopipo.

² Okina momi adaka a boso bonde yona oma kɔnɔ ngbungbuma.

³ Yesu ahɔjɔ hakoja baMibeko na BaPalusi bo, Mibeko mijimaka bo bosengoe a busa boSabata, isa mitajimaka?

⁴ Ibo badaka oko bogo. Oko boa, Yesu aheleja moto omina a yogo ende, na amoyaneja.

⁵ Abala koko na bu bo, Okina onu akada na punda isa ngɔmbɔ; na akakwa a mombɔndɔ, otamoduboja bokpa a busa boSabata?

⁶ Ibo ko badaka oko bogo, pɛ bosɔmbeja nongo ekenge.

⁷ Yesu anɛ bo bato baya badaka ena a boyaka bahɔkɔ bidie biekumu. Oko boa, abala mondɛ mu a mojɔ mobu.

⁸ Abala bo, Moto akabea wɛ a libonje lilihango, pɛ boda nongo a esika eekumu, asaka bea okina otongo yona odi boso bowɛ.

⁹ Mojɔ bo, yona obea wɛ adi bodoa, âbala na wɛ bo, Kinea moto yo esika ye; na wɛ odi bokɛ a edie esuka, oko na sɔni.

¹⁰ Bakabea wɛ, kɛ adae a esika esuka mɛnɛ. Oko boa, moto yona obea wɛ akakwea, adi bobala na wɛ bo, Moninga, nɔ oho boso; na wɛ odi bosɔ ekumu a boso bobato basusu baya badi na wɛ a mesa.

¹¹ Mojɔ bo moto na moto yona osakumejaka, âsamboa. Yona ko osatitejaka, âsɔ ekumu.

¹² Yesu abala koko na moto yona omobea a boyaka bo, Okasɛlingoa libonje a ehole emidi, isa a ehole emɔkɔ, t’obee oko binao, na banangwao, na mela mawɛ, na mituteano miwɛ, baya badi na likonja linɛnɛ, baya babwani bobea wɛ bo bakɔe wɛ monganji o akɔ wɛ na bu.

¹³ Okasɛlingoa libonje, bea bato babokwali, bato baya badi na biɛmɛ, bato bamitɛngu, na bato bamiso mago.

¹⁴ Oko boa ôda na bojongoa, mojɔ bo bato bamina bapeliti eka ebosɔmbeja ai wɛ. Wɛ ko ôsɔ ndese ewɛ yana ângɔ babodongo a bogwa.

¹⁵ Okina obu yona odaka na nde a mesa, yana aka yo mojɔ momina, abala na Yesu bo, Moto akayaka molɛmbɛ a Bokumu boNjambe âda na bojongoa.

¹⁶ Iyo amosɔmbeja bo, Okina moto akalea libonje linɛnɛ, na abea bato banɛnɛ.

¹⁷ Yana abwana libonje, aloma monɔkɔ na mobuli onde ai bato babea yo. Abala bo, Doani, mojɔ bo leka losusu lobwani edɛye.

¹⁸ Ibo basusu ko babanga botata mikalo. Yona oboso abala na nde bo, Mbi nasombi gbie. Ebɔngi bo nakɛe naenje. Nangaka wɛ bo okine mbi nadae.

¹⁹ Okina otongo abala bo, Mbi nasombi ngɔmbɔ domi. Nakɛkɛ bo nabakokelejae; nangaka wɛ bo okine mbi nadae.

²⁰ Okina otongo abala bo, Mbi nalongani na mwali. A mojɔ momina, mbi nitahɔnɔ bodoa.

²¹ Ahula mobuli, atɔndɔ moswa’nde mijɔ mimina. Moswa ’ndako akɛnjɔ. Abala na mobuli onde bo, Kɛ bokpa a macilinga na a njea jingando; hula jɔno na bato babokwali, bato babiɛmɛ, bato baya bagwa miso, na bato bamitɛngu.

²² Yana abala mobuli na moswa’nde bo, Kumu, mbi nakɔi o ami wɛ bala, na bisika bidi oko ngasa.

²³ Moswa ’ndako abala na mobuli bo, Kɛ oho a njea emokɛngɛ, na a njea jigbie. Kɔ na bopipo bo bato badoe a bolumeja ndako embi botɔ.

²⁴ Mojɔ bo mbi natɔndɔkɔ no bo bato babea mbi boso batayaka nongo eka elibonje limbi, pɛpɛ nongo omɔci.

Mojɔ Mobosusa Yesu

²⁵ Bato bapakaka Yesu a njea banɛnɛ mɛnɛ. Iyo ahekoa, abala na bu bo,

²⁶ Moto akadoa ai mbi, pɛ bopeta lona sango, na nango, na bana, na bananango, na ngɛnɛ, ee, na mohelo monde mɛnɛ pongono, moto omina atabɔngɔ bo adae mocingami ombi.

²⁷ Moto amiti tomba mole-mobokea monde a bocingama na mbi, atabɔngɔ bo adae mocingami ombi.

²⁸ Okina onu akakana ndako bopika, atapeta da na mobondo a bolanga bobuno bomina, bo ajebe isa likonja linde lidi bobwana a bomaja elomu endako esusu?

²⁹ Mojɔ bo, akatandea elomu pɛ ko bohɔnɔ hoesieja, bato basusu baya banɛkɛ mojɔ momina badi bomosɛkɛ.

³⁰ Badi bobala bo, Moto omina abanga boyoa, aihɔnɔ ko bosieja elomu.

³¹ Okina kumu yona odi na bato koto domi, akakana bila na kumu otongo yona odi na bato koto licinda, atapetada na mobondo bo alɛe mojɔ, a bojeba isa adi bohɔnɔ bila na kumu yona otongo yona odi na bato koto licinda, na yo mɛnɛ oko bato koto domi pɛ?

³² Isa atahɔnɔ, adi boloma bato na bwɛnji ai yona otongo yana adi yo oko bohali, bo babakee mokongo mobosiili.

³³ Edi oko boa na nu pongono; moto amiti lona leka londe losusu, atabɔngɔ bo adae mocingami ombi.

³⁴ Mukwa modi eka epele. Mokapɔ ko, modi bobɔngɔ koko na ye?

³⁵ Moditi nongo mopele a mojɔ mogbie, isa a mojɔ modaa egbie. Bato bamodumbaka oko bodumba. Moto yona odi na matoi manjoki, yɛ ahokee.