Luka 13 - Nouveau Testament en Ngombe 1961

Mojɔ Mobohekoja Molema

¹ Bakina bato badaka ena a ehole emina haya batɔndɔ Yesu mojɔ mobato baGalile. Pilato ama putoana makia mabu na makia matito babu bamasiko.

² Iyo abasɔmbeja bo, Ino olɛkɛni bo BaGalile bamina banɔ BaGalile basusu na bobe, cina bo badingoa boa?

³ Pɛpɛ nongo mweka; mbi ko natɔndɔkɔ no bo omiti hekojani milema minu, ôgwani no basusu oko boa.

⁴ Ndako enɛnɛ ekwa oho Siloa na ewa bato domi-na-bomwambe; ino olɛkɛni bo bato bamina banɔ bato basusu baYelusalema na bobe?

⁵ Ngasa; mbi ko natɔndɔkɔ no bo omiti hekojani milema minu, ôgwani no basusu oko boa.

⁶ Iyo abala na bu mondɛ mu. Okina moto adaka na mole a gbie ende. Adoa yo a boduka mbuma a mole momina, aitana nongo mbuma.

⁷ Abala na monjeli ogbie bo, Ika; mbi nadoaka ya edɛye bianga bisato a boduka mbuma a mole momina, pɛ ko bonɛ mbuma. Kwɛlɛ mole momina; modi ya a kpɔtɔ oko edada pɛ.

⁸ Iyo ko amosɔmbeja bo, Kumu, kina modae koko yanga ye. Mbi nadi bolonga kpɔtɔ a esika emina, na nâsa daa.

⁹ Isa modi mobota mbumba ngɔngɔ? Momiti bota ko, odi bomokwɛlɛ.

Mwali Ahela a Yogo

¹⁰ Yesu akojaka a sinagoge bokina busa boSabata.

¹¹ Okina mwali adaka ena yona odaka na yogo emonio bianga domi-na-bomwambe. Adaka mongundubanake, na aihɔnɔ bo’ma bojo.

¹² Yesu amonɛ, amobea na abala na nde bo, Mwali, oheli a yogo ewɛ.

¹³ Abakea mɔmɔ mande ai mwali, na yo ama bojo bokpa, na asakoa Njambe.

¹⁴ Mosuku osinagoge ko akɛnjɔ oko bokɛnjɔ, cina bo Yesu amoheleja a yogo a busa boSabata. Iyo abala na bato bo, Masu maelomu madi oko masamano. Doani a mojɔ mosengo a masu mamina, te a busa boSabata.

¹⁵ Kumu amosɔmbeja bo, lno bakosei! Ino basusu otacingoakani ngɔmbɔ na punda banu a ndako a busa boSabata, a bokɛ na bu a ediba?

¹⁶ Oko boa, ebɔngiti bo mwali yoyo, yona odi mwana oAbalayama, acingoame a monyɔlɔ momina? Mojɔ bo adaka a mbɔci ji Satana bianga domi-na-bomwambe.

¹⁷ Abala yo boa, soki jinde basamboa basusu. Bato basusu ko bangando basepa a mojɔ momindumba misusu mikɔkɔ yo.

Mindɛ Mitongo

¹⁸ Yesu abala koko bo, Bokumu boNjambe bodi o bo? Nadi bongɛ Bokumu boNjambe na ye?

¹⁹ Modi o mongua mobojio mɛnɛ. Okina moto amotomba na amona a gbie ende. Mongua motɔ na mohɛ mole monɛnɛ, na mbulu badiko bakɔ mobo mabu a bitape bimole momina.

²⁰ Abala koko bo, Mbi nadi bongɛ Bokumu boNjambe na ye?

²¹ Bodi o lipetu litomba mwali; ali’sa ta esei yena edaka na farini sanga jisato, na farini esusu ebongoa lipetu.

Modipe Mokototake

²² Yesu akoja a ngando jinɛnɛnɛ na ngando jikɛkɛ jia jidaka a njea ende, yana akɛ yo a njea eYelusalema.

²³ Okina moto abala na nde bo, Kumu, badi bohela oko bakina bato pɛ?

²⁴ Iyo abala na bu bo, Kɔni na ngulu enu esusu bo okweeni a modipe mokototake. Mojɔ bo mbi natɔndɔkɔ no bo bato banɛnɛ badi bokenga bokwea ena, na batabɔnɔ bokwea.

²⁵ Moswa ’ndako akangɔ, na akadipa modipe, ino ôdikani oko sokolu, na ôbangani boboma modipe. Ôbalani bo, Kumu, dipoa ai so. Iyo ko âsɔmbeja no bo, Mbi mtajebaka no isa esika ehuli no.

²⁶ Oko boa, ôbangani bobala bo, Iso boyaka na bomwaka na wɛ a esika emɔci. Wɛ otɔndɔ mwako a macilinga masu.

²⁷ Iyo ko âsɔmbeja bo, Mbi natɔndɔkɔ no bo nitajebaka nongo esika ehuli no. Dongani ai mbi ino basusu baya bakɔkɔ bobe.

²⁸ Okanɛni Abalayama, na Isaka, na Yakobo, na batɔndɔi basusu, a tei eBokumu boNjambe, yana âdumbama no bɛnɛ sokolu, ôyeani bio, na ôdani na bokpɛkpɛnɛ bomino oho.

²⁹ Bato hadi bodonga a dɔngɔ diɛsɛta na wɛsɛta, a pamba enɔdɔ, na pamba esudo, a boda a bidie bibu a Bokumu boNjambe.

³⁰ Hokeani ko! Bakina baya badi oko ngɔngɔ bâdaboso, na bakina baya badi boso bâda oko ngɔngɔ.

³¹ Bakina BaPalusi badoa a ehole emina, na babala na Yesu bo, Donga ya, kɛ a esika etongo, mojɔ bo Elode apalaka awoe wɛ.

³² Iyo abasɔmbeja bo, Kɛni atɔndɔe mosɔlɔ omina bo mbi namejaka miembo mibe, nahelejaka bato a bego busa bu na puma; nadi bomaja ko a busa bomasato.

³³ Ebɔngi ko bo nadale busa bu, na puma, na puma-sɛnɛ; mojɔ bo motɔndɔi abwani bogwa oko a Yelusalema, te nongo a esika etongo.

³⁴ Ee Yelusalema! Yelusalema! Owakani batɔndɔi, na olakani bato matai baya badoaka na bwɛnji ai no. Mbi nadaka na posa bihole binɛnɛ bo nabolee bana banu, o aboleaka kɔkɔ bana bande bo babolame a cina jimapapulapu mande, ino ko oipalakani.

³⁵ Edɛye ko, ndako enu edikai mokpata. Mbi natɔndɔkɔ no bo otanɛni mbi koko, oko adi no pɛ bopeta bala bo, Bojongoa ai yona odoaka a kombe eKumu.