Luka 12 - Nouveau Testament en Ngombe 1961

Bileho biYesu

¹ Bato bama titana kanga koto jinɛnɛ, na bambambaka bou. Yesu abanga boleha bacingami bande bo, Toma nganjamani na lipetu liBaPalusi, oko na bokosea bobu.

² Isa mokina mojɔ modi mokundamake, môkundoama; isa modi mobombamake, môboloa.

³ Oko boa ngando jisusu jibalaka no a modidi jitɔndɔmɔ a bohu; jia jibalaka no na popoli a ndako tei, jitɔndɔmɔ a diko dibitondo.

⁴ Mbi natɔndɔkɔ no bina ’mbi bo, T’obangeni oko baya bawaka mokuku, na bakawa mokuku batabwana bokɔ mokina mojɔ motongo.

⁵ Mbi ko nadi boneja no yona obwani na nu a bobanga; okina adi, na yo akawa, adi na ngulu a bodumba no a Gehena; mohangani yo. Ee, mbi natɔndɔkɔ no bo, Mobangani yo.

⁶ Bobuno bodɛkɛ batano, te makota mabae? endele ko, Njambe atababosaka nongo mweka.

⁷ Na ajebaka etango eswe jimelo minu. Oko boa yɛni bobanga; na no na dɛkɛ, ino onɔini dɛkɛ banɛnɛ na bobuno.

⁸ Mbi natɔndɔkɔ no bo, Moto na moto yona ojimaka mbi a boso bobato, Mwana ’Moto âmojimabi yo a boso bobabwɛnji baNjambe.

⁹ Moto ko akalona mbi a boso bobato, alonamabi yo mɛnɛ a boso bobabwɛnji baNjambe.

¹⁰ Moto akalɔngɔ Mwana ’Moto, mojɔ momina mobwani bokinama; yona osambojaka Mwembo Mosɛnɔke ko na ebaeli ebe, atakinama nongo.

¹¹ Bakagbula no a boso bomakita masinagoge na bakumu na basuku, pɛ bodani na mokakwano a mojɔ mobikenge bibosɔmbeja na bobala.

¹² Mojɔ bo Mwembo Mosɛnɔke modi bojebeja no bikenge bia bîbwana na nu a bobala a ehole emina.

Mondɛ Moegegele

¹³ Okina moto yona odaka a tei elikita libato abala na Yesu bo, Mokoja, bala na mwangwa ’mbi bo akabe na mbi likwa.

¹⁴ Iyo amosɔmbeja bo, Obakei mbi juji na mokabi onu nda?

¹⁵ Abala koko na bato bo, Toma nganjamani; toma lonani bimboli bisusu, cina bo mohelo momoto mocingiti na lituna lileka lopeli yo.

¹⁶ Abala na bu mondɛ mu; Okina konji adaka na gbie jia jibotaka leka lonɛnɛ.

¹⁷ Oko boa, yo alɛ a molema monde bo, Ekɔ mbi ndeni? Esika etakaka na mbi a bodeja leka lombi.

¹⁸ Na abala bo, Nadi bokɔ oko mojɔ mu; nâbuka ndako jidejaka na mbi leka; nâyoa jitongo jinɛnɛnɛ bo nadejae ndongo jimbi na leka lombi losusu oko ena.

¹⁹ Nâsa ko nabale na mwembo mombi bo, Mwembo mombi, odejai leka lonɛnɛ mɛnɛ edɛye. Lobwani na bianga binɛnɛ; peta hema; yaka, mwaka, sasepeja.

²⁰ Njambe ko abala na nde bo, Wɛ egegele! odi bosɔmbeja mwembo mowɛ oko na bulu bu; na leka lu losusu losɛlingoi wɛ lôdika na nda?

²¹ Edi oko boa na moto yona ohɛjɛkɛ likonja a mojɔ monde mɛnɛ pɛ, na adi na bokwali a miso maNjambe.

Bileho biYesu ai Bato Bande

²² Yesu abala na bacingami bande bo, A mojɔ momina, mbi natɔndɔkɔ no bo, T’odaeni oko na mokakwano a mojɔ momohelo monu, a mojɔ moboyaka, na mokuku, na bisenja bibolwa.

²³ Na mohelo, na dia, mohelo modi mojɔ moboso. Na mokuku na bisenja, mokuku modi mojɔ moboso.

²⁴ Anjani gɔgɔ; te banake gbie; te bajuake leka a gbie; bapeliti magasini, isa edejai. Njambe ko ababɔkɔkɔ; esingaiti no, baya banɔi mbulu na yumu bou mɛnɛ.

²⁵ Okina onu adi bokaeja boyai bonde ebɔ emɔci na mokakwano?

²⁶ Oko boa, isa otahɔnɔkɔni bokɔ mokina mojɔ mokɛkɛlɛkɛ boa, okakwanakani a mojɔ mongando jitongo cina eye?

²⁷ Anjani manga maesika; te makɔke elomu; te mayoake bisenja; endele ko, madi na bohohu bopele. Mbi natɔndɔkɔ no bo elwali eSɔlɔmɔ a ekumu ende esusu eibwana na elwali edanga dimɔci diesika.

²⁸ Oko boa, isa Njambe alwajaka njienjie jia jidi a gbie busa bu, na jitumbama a mosa puma, esingaiti no, mo bato baejimeli ekɛkɛlɛkɛ!

²⁹ Pɛ bosabasabani a mojɔ moboyaka na bomwaka. Pɛ bodani na mokakwano.

³⁰ Bapakano bangondo esusu badukaka oko leka lomina. Sangwa’nu ko ajebaka bo obwanini bosɔ leka lomina.

³¹ Ino ko, peta dukani Bokumu boNjambe, ôsa ko osɛni leka lu losusu pongono.

³² Yɛni bobanga, bwela bokɛkɛ, mojɔ bo mokano mopele moSangwa’nu modi bo apɛ no Bokumu

³³ Ingɛjɛni leka lonu; kɔni matɔngi malikonja a mojɔ monu maya matagwa; sɛlingoani likonja liyumu oho Diko lia litasia nongo, mojɔ bo mobi atabatama oho, na mosokoto pɛ bobeja.

³⁴ Mojɔ bo molema mowɛ mosambi oko a esika edi likonja liwɛ liyumu.

³⁵ Kandani njingo a mongo manu. Yojani paki jinu.

³⁶ Dani na ekɔmɛli ebato baya banjaka kumu obu yona odi a libonje lilihango bo ahule. Akamea na akaboma modipe, badi bodipoa ai yo bokpa.

³⁷ Kumu aka’tana bakɔmɛli bande misu a lihule linde, bakɔmɛli bamina bâda na sepi. Mbi natɔndɔkɔ no na soti bo yo âlwa bisenja bielomu, âbadeja a mesa, na âdoa bo abapɛ mia.

³⁸ Akadoa na bulu tei, isa a kɔkɔ oboso, na aka’tana bakɔmɛli bande na mongangele, bâda na sepi.

³⁹ Pɛ bobosani mojɔ mu; Moswa ’ndako, akɔki yo jeba ehole ekanaka mobi bodoa, ka adaki na mongangele, na ajimiti bo moto aluse ndako ende.

⁴⁰ Ino toma dani na mosɛlingo pongono, mojɔ bo Mwana ’Moto âbutoa no bobutoa.

⁴¹ Pɛtɛlo abala bo, Kumu, mondɛ mobali wɛ, obali a mojɔ mosu isa a mojɔ mobato basusu?

⁴² Kumu abala bo, Kumu akapa okina mokɔmɛli onde oejimeli na bowɛi kpaci ai bato bande basusu, bo abakabe mia libondo libondo a ehole yena ebwani;

⁴³ na kumu onde akahula na akamotana a elomu emina, mokɔmɛli omina âda na sepi.

⁴⁴ Mbi natɔndɔkɔ no na soti bo adi bomopa kpaci a leka londe losusu.

⁴⁵ Mokɔmɛli omina ko akalɛ a molema monde bo, Kumu ombi atahula bwango; na akabanga botua bakɔmɛli batongo, na bami na bali pongono, na boyaka na bomwaka na bolangoa,

⁴⁶ kumu omokɔmɛli omina adi bodoa bokina busa yana adi yo pɛ bomonja, a ehole edi yo pɛ bojeba, âmotua bou mɛnɛ na amo’sa ta libondo libato baya bapehti ejimeli.

⁴⁷ Mokɔmɛli yona ojebaka bolulea bokumu onde, pɛ ko bosɛlingoa, pɛ bokɔ o apalaka kumu onde, adi botuama na bopipo mɛnɛ.

⁴⁸ Yona odi pɛ bojeba ko, na akakɔ mijɔ mia mibwani na nji, atatuama na bopipo. Bato bakapa moto leka lonɛnɛ, badingaka bo badi bosɔ leka lonɛnɛ ai yo; na bakamopa leka lonɛnɛ a mojɔ mobobanea, badi bobea leka lonɛnɛ ai yo.

⁴⁹ Mbi nadoi bo natumbe mosa a ngondo. Posa embi edi oko bo mongoe.

⁵⁰ Mbi ko nabwani bobatisama na ekina batisimo, na nadi na posa enɛnɛ bo esie.

⁵¹ Ino odingakani bo mbi nadoi bo napɛ bowi a ngondo? Pɛpɛ, te nongo bowi, gbo oko bobɔtɔ; mbi mɛnɛ natɔndɔkɔ no.

⁵² Bato batano bakada a ndako emɔci, bâbɔtɔnɔ; bato basato a elingi emɔci, na babae a elingi etongo, isa bato babae a elingi etnɔci, na basato a elingi etongo.

⁵³ Bobɔtɔnɔ bomina bôda bo sango âlona mwana ’nde momi, na mwana-momi âlona sangwa ’nde; nango âlona mwana ’nde mwali, na mwana-mwali âlona ngwa ’nde; mwali âlona bokio bonde mwali, na mwali omina âlona bokio bonde mwali.

⁵⁴ Yesu abala koko na emumu ebato bo, Okanɛni bo eyembi emani a dɔngɔ diwɛseta, obalakani bokpa bo mbua adi ta busa; na modi oko boa.

⁵⁵ Na okanɛni bo pwea ehulaka a dɔngɔ disudo, obalakani bo moi modi momana mopipo; na modi oko boa.

⁵⁶ Ino bakosei! Ocingeakani bimbete bibusa na bingondo, pɛ ko bocingea bimbete bimasu mama.

⁵⁷ Otasambejakani mijɔ a tei emilema minu mojɔ moye, a bojeba njea esoti?

⁵⁸ Isa moto adi na wɛ mojɔ, na okɛkɛ na nde a esambi, meka bosieja mojɔ monu oko a njea, asaka gbula wɛ a boso bojuji, na juji âpa wɛ a mɔmɔ makɔmisɛlɛ, na kɔmisɛlɛ âsa wɛ a blɔkɔ.

⁵⁹ Mbi natɔndɔkɔ wɛ bo, Omiti sieja nongo ewɛ esusu mɛnɛ, otamana nongo.