Luka 10 - Nouveau Testament en Ngombe 1961

Yesu Aloma Bacingami Domi-Sambo a Eloniu

¹ Ngɔngɔ jimina, Kumu ahɔ bacingami batongo domi-sambo. Abaloma boso bonde, bato babae babae, a ngando jisusu, na bisika bisusu bikanaka yo bokɛ.

² Abala na bu bo, Lituna lindongo lidi linɛnɛ; basali ko badi oko baleka pɛ. Oko boa, mgakani Kumu olituna bo alome basali a lituna linde.

³ Kɛni; hokeani ko; mbi nalomaka no o bana babata baya bahikami na swa.

⁴ T’otombeni oko litɔngi lilikonja, nongo libenga, nongo sapata; pɛ bobɛjɛni moto a njea.

⁵ Omaka kweani a ekina ndako, peta balani bo, Bowi a ndako ye!

⁶ Moto obowi akada ena, bowi bonu bodi boyeyoa na nde; isa aditi, bowi bonu bodi bohula ai no hɛnɛ.

⁷ Dani oko a ndako emina; yakani na mwakani leka lopaka bato no, mojɔ bo mosali abwani bosɔ pɔsɔ ende. Pɛ bokɛni a ndako ndako.

⁸ Okameani a ekina ngando, na bakasɔ no bopele, na bakapa no boyaka, yakani oko leka lomina.

⁹ Helejani babego a ngando emina; balani na bu bo, Bokumu boNjambe bobatami na nu.

¹⁰ Okameani a ekina ngando, na bato pɛ bosɔ no bopele, dalani a licilinga lingando na balani bo,

¹¹ Iso bohakoaka dutu lingando enu lia licingi na bibota bisu, o eleho ai no; pɛ mojɔ, toma jebani bo Bokumu boNjambe bobatami.

¹² Na mokindo mongando emina, na mokindo moSɔdɔmɔ, mbi natɔndɔkɔ no bo mokindo mongando emina monɔbi mua moSɔdɔmɔ na bopipo a busa bomina.

¹³ Ee Kolasina, monɔngɔ ai no! Ee Betesaida, monɔngɔ ai no! Akɔkɔ bo nɛ mindumba minɛkɛ no, ka Tula na Sidona bahekoja milema mibu eyou, balwa bipupu, na basasuoa mihulu.

¹⁴ A mojɔ momina, mokindo monu monɔbi mua moTula na Sidona na bopipo a busa boEsambi.

¹⁵ Ee Kapalanauma, odingaka bo odae na ekumu eDiko? Odi botita nase oko a Seolo.

¹⁶ Moto akahokea no, ahokeaka mbi. Moto ko akalona no, alonaka mbi. Na yona olonaka mbi, alonaka yona olomani.

¹⁷ Ibo Domi-sambo bahula na sepi. Babala bo, Kumu, nongo miembo mibe misumaka so a kombe ewɛ.

¹⁸ Yesu abala na bu bo, Satana yona odaka Diko akwa o mokalimo; mbi namonɛ.

¹⁹ Mbi napi no kpaci soti a bodɛhɛ njɔ, na koolo, na a hogbokeja ndangasa esoki; pɛpɛ nongo eka edi bopekeja no.

²⁰ Endele ko, t’osepeni oko a mojɔ momina, bo miembo mibe misumaka no. Dani oko na sepi cina bo kombe jinu jisɔnɔmɔ oho Diko.

²¹ Yesu aluma na sepi eMwembo Mosɛnɔke a ehole emina, na abala bo, Sesa, Kumu oDiko na nase, mbi nasakoaka wɛ, cina bo obomba ngando ji ai bato babowɛi na bato baejebeli, na ojibolojai ai bana bakɛkɛ. Ee Sesa, monganji momina modaka bolulea bowɛ.

²² Sangwa’mbi apa leka losusu ai mbi. Pɛpɛ nongo moto ojebaka yona odi Mwana; Sango pɛ ajebaka. Na pɛpɛ nongo moto ojebaka yona odi Sango; Mwana pɛ ajebaka. Mwana akapala, adi bomoboloja ai moto.

²³ Yesu ahekoa ai bacingami bande na abala oko na bu pɛ; abala bo, Miso maya manɛkɛ ngando jinɛkɛ no madi na bojongoa.

²⁴ Mojɔ bo mbi natɔndɔkɔ no bo batɔndɔi banɛnɛ, na bakumu banɛnɛ, badaka na posa a bonɛ ngando jinɛkɛ no; baijinɛ ko. Badaka koko na posa a boka ngando jikaka no; baijika ko.

Mondɛ moMoto oSamalia Mopele

²⁵ Okina nganga oMibeko angɔ a bomeka Yesu. Abala bo, Mokoja, êkɔ mbi nda bo nasangoe bomɔ bua bodi oko na bosusu?

²⁶ Yesu abala na nde bo, Mosɔnɔ a Mibeko modi bo? Mojɔ molangaka wɛ ena nda?

²⁷ Iyo asɔmbeja bo, Toma pala Kumu Njambe owɛ na molema mowɛ mosusu, mwembo mowɛ mosusu, ngulu ewɛ esusu, bolɛ bowɛ bosusu; na toma pala motuteano mowɛ o asapalaka wɛ mɛnɛ.

²⁸ Yesu abala na nde bo, Olongi; kɔ boa nongo ohele.

²⁹ Iyo ko apala bo asalongejae, na abala na Yesu bo, Motuteano mombi nda?

³⁰ Yesu amosɔmbeja bo, Okina momi adonga a Yelusalema bo akɛe a Yeliko, na asaka na mibengo a njea. Ibo batomba leka londe losusu, bamotua na bopipo, na ayana bo, bamokina o mogo.

³¹ Okina nganga otempelo adaka a njea emina pongono. Iyo ko, yana anɛ yo moto omina, amobamba oko bobamba, na anɔ.

³² Okina MoLewi koko boa; amea yo a esika emina, amonɛ, amobamba na anɔ oko bonɔ.

³³ Okina MoSamalia ko yona okɛkɛ mokina mɔngɔ, amea a esika edaka moto omina. Yana amonɛ yo, amokea wa.

³⁴ Abatama na nde, ahua pola jinde, na ajisuoa sali na vino. Amobakea a punda onde mɛnɛ, akɛ na nde a ndako epasaje na amohanea.

³⁵ Yana ahoa busa, ameja bikenge bilikonja bibae, abipa moswa ’ndako, abala na nde bo, Mobanea bopele; okamosombea leka, na likonja didi pɛ bobwana, mbi nadi bolisɔmbeja ai wɛ a lihule limbi.

³⁶ Motuteano momoto yona osaka na mibengɔ nda? Obu basato nda? Wɛ olɛkɛ bo?

³⁷ Iyo asɔmbeja bo, Oko yona omokea wa. Yesu abala na nde bo, Wɛ, kɛ okakɔe boa pongono.

Malata na Malia

³⁸ Yesu amea a ekina ngando a njea ebu, na mwali omɔci, kombe ende Malata amosɔ a ndako ende.

³⁹ Iyo adaka na mwangwa ’nde omɔci, kombe ende Malia, na yo ada na mobondo a bibota biKumu a bohokea hokoja honde.

⁴⁰ Malata ko adaka na mokakwano a mojɔ moelomu enɛnɛ endako. Oko boa yo akɛ ai Yesu, abala na nde bo, Kumu, otajebaka bo mwangwa ’mbi akini elomu esusu endako oko ai mbi pɛ? bala na nde bo akɔmejae mbi.

⁴¹ Kumu ko amosɔmbeja bo, Malata, Malata, wɛ okakwanaka na oyayoaka na mijɔ minɛnɛ.

⁴² Mojɔ momɔci pɛ mobwani. Malia ahɔi libondo lipele, na moto atalikatoa ai yo.