Baɛpɛsɔ 5 - Nouveau Testament en Ngombe 1961

Ekɔmɛli eBato baMasiya

¹ Ikoanani na Njambe o bana baepaeli.

² Dani na ngɛnjɔ o O adaka Masiya na ngɛnjɔ ai so, na asapa ai Njambe a mojɔ mosu, epeeli eso epele elitindi na lisiko.

³ A mojɔ mobɔɔli, na ngando jibosambolu, na mbengea, t’okineni oko bo mijɔ mi midae a minɔkɔ minu; Mibɔngiti nongo na bato baMasiya.

⁴ Pɛ bobala nongo mijɔ misɔni, isa ebalabala, isa ngɛkɛ; Sakoani ko Njambe.

⁵ Toma iebani mojɔ mu na soti; pɛpɛ nongo moto obɔɔli, pɛpɛ nongo moto obosambolu, pɛpɛ nongo moto ombengea (cina emina edi moto yona osakoaka njambe obokosea) odi bosangoa lisango a Bokumu boMasiya na boNjambe.

⁶ T’ojimeni oko bo moto akosee no na ebalabala, mojɔ bo kɛlɛ eNjambe edi ai bana balipanga a mojɔ mongando jimina.

⁷ A mojɔ momina, t’opanganeni oko na bato bamina.

⁸ Odakani bosoboso modidi; e dɛye ko odini bohu atei eKumu; oko boa, toma dani na bikɔmɛli bibana babohu.

⁹ Mojɔ bo bohu bobotaka oko ngando jisusu jipele, jibɔngɔke na jisoti.

¹⁰ Jimani oko ngando jia jisepejaka Kumu.

¹¹ Toma bulɛni ngando jingasangasa jimodidi; anejani na bikɔmɛli binu bo ngando jimina jidi jibe.

¹² Mojɔ bo edi sɔni mɛnɛ a bobala a mojɔ mongando jikɔkɔ bato bamina a libombi.

¹³ Bohu bokahoja mojɔ, modi boholoa a bohu; cina bo, mokaboloa modi a bohu.

¹⁴ A mojɔ momina, abala bo, Wɛ yona ohwɛi hiɔ, sisoa! Angɔ a bogwa, Na Masiya âpa wɛ bohu.

¹⁵ Toma nganjamani a mojɔ momida minu; dani na bopasa, pɛpɛ bogegele.

¹⁶ Pɛ bonamejani masu manu, mojo bo masu ma madi mabe.

¹⁷ T’odaeni oko na yebe; cingeani ko bolulea boNjambe.

¹⁸ T’olangoeni oko na vino; mojɔ momina modi bosambolu; endele ko dani balumake na Mwembo.

¹⁹ Masolo manu mabwani boda na njembo jipele, njembo jibosakoa na njembo jiMwembo. Imbani na sakoani Kumu na milema minu misusu.

²⁰ Sakoani Njambe Sango bihole hisusu, a mojɔ mongando jisusu, a kombe eKumu osu Yesu Masiya.

Mojɔ moMomi na Mwali

²¹ Sumanani moto na moto oko na lisuma ai Masiya.

²² Ino bali, dani na lisuma ai bami banu, o asumaka no Kumu.

²³ Mojɔ bo momi adi molo momwali, o adi Masiya molo moDenga, dia didi mokuku monde, na yo adi Moheleja omokuku momina.

²⁴ Denga disumaka Masiya; oko boa bali badi bosuma bami babu a ngando jisusu.

²⁵ Ino bami, dani na ngɛnjɔ ai bali banu, o adaka Yesu na ngɛnjɔ a Denga, na asapa a mojɔ moDenga

²⁶ bo ahsɛnojae cina ebosɛnɔ bobososa bomadiba maEbaeli.

²⁷ Akɔ boa bo Denga dimae a boso bonde na ekumu enɛnɛ, lihɛngɛmɛke na lisɛnɔke, pɛpɛ nongo litɔnɔ, isa maninginingi, isa mojɔ motongo.

²⁸ Oko boa, bami babwani boda na ngɛnjɔ ai bali babu o apalaka bo mikuku Mibu bɛnɛ. Moto yona odi na ngɛnjɔ ai mwali onde adi na ngɛnjɔ ai yo mɛnɛ.

²⁹ Mojɔ bo moto t’alonake mini minde mɛnɛ; amibɔkɔkɔ na amibaneaka, o akɔkɔ Masiya na Denga.

³⁰ Mojɔ bo so bodi binama bimokuku monde.

³¹ A mojɔ momina, motoadi bokina sango na nango a bokatana na mwali onde bo ibo babae badae munu momɔci.

³² Mojɔ momina modi na cina enɛnɛ ebombamake. Mbi nabalaka a mojɔ moMasiya na Denga.

³³ Oko boa, yɛ moto na moto adae na mwali onde ngɛnjɔ o asapalaka yo mɛnɛ, na mwali adae na lisuma ai muma’nde.