Baɛpɛsɔ 4 - Nouveau Testament en Ngombe 1961

Bokatana boEjimeli

¹ Oko boa, mbi lisungu liMasiya, nangɔɔnɔkɔ no bo odaeni na mida mia Mibwani na bobea bobeama na nu,

² oko na bosatiteja bonɛnɛ, na bombɔki, na lingbangba. Moto adi boda na moto otongo oko bowi a mojɔ moepaeli.

³ Dani na bingi a bobanea bokatana boMwembo; sakandanani na licinga libowi.

⁴ Mokuku modi momɔci pɛ, na Mwembo modi momɔci pɛ, mojɔ bo obeamani a njingo emɔci yana abeama no.

⁵ Kumu adi oko omɔci pɛ, ejimeli emɔci, batisimo emɔci,

⁶ na Njambe omɔci, yona odi Sange ’bato basusu; iyo anɔi basusu; adi a ndanda ebasusu na adi a tei ebasusu.

⁷ Iso ko bosɔ monganji, moto na moto oko na mwɛngi moepeeli eMasiya.

⁸ A mojɔ momina abala bo, Iyana akɛ yo oho diko, akɛ na lindundu limasungu, Na akaba bipeeli ai bato.

⁹ Cina emina edi bo, lyo akɛ diko? Edi oko bo ama soloa oko a bisika binase bingondo.

¹⁰ Yona osoloa, adi oko yo yona okɛ diko, na anɔ busa mɛnɛ, bo alumejae ngando jisusu.

¹¹ Na bipeeli bipa yo bidaka bo bakina bato badae babwɛnji, bakina batɔndɔi, bakina balehi, na bakina bo badae banjeli na bakoja,

¹² a bobɔngeja basɛnɔke, a mojɔ moelomu ebokɔmɛ Denga, na a mojɔ moeyoeli emokuku moMasiya,

¹³ oko a ehole ehomea bosu basusu a boka-tana boejimeli, na a ejebeli eMwana ’Njambe, bo bokandoe bato bapingake, na bo mwɛngi mosu mobwane na mwɛngi mobobɔngɔ boMasiya.

¹⁴ Bobwaniti boda koko bana bakɛkɛ, baya bahombahombaka na bapɛpɛnɛkɛ na pwea jisusu jibokoja bobato baepulu baya badi na poloso a bokoja ngando jibokosea.

¹⁵ Bobwani bopea boku mijɔ misoti, oko na epaeli, bo bokandoe a njea jisusu a tei eMasiya yona odi molo.

¹⁶ Edi oko a mojɔ monde na bokatana bongulu ende, bo mokuku mosusu mocingami o eyoeli emɔci, na mopingi na macinga masusu; elomu ebinama bisusu epingejaka mokuku bo mokandoe na mosapingejae na epaeli.

¹⁷ Ebaeli embi, na eleho embi ai no a kombe eKumu, edi bo otadani koko na mida Mibapakano baya basumaka mabunga mamilema Mibu.

¹⁸ Bocingea bobu bodi bokutubanake, na babɔtɔnɔ na bomɔ boNjambe cina elibumi libu lia licini na milema Mibu mipipo.

¹⁹ Baditi koko na sɔni; basa’pa a ngando jibosɔtɔ, na badi oko na posa ebokɔ mijɔ misusu Mibosambolu.

²⁰ Ino ko oikoani na Masiya boa,

²¹ isa omohokeani na soti, na isa osɔni bokoja ai yo, oko mijɔ misoti mia midi a tei eYesu.

²² Toma hwani moto moyou yona odaka na ekɔmɛli eyou, yona odi mopɔke mɛnɛ a mojɔ moposa jibokosea.

²³ Dani bato bayene a tei emiembo na milema minu.

²⁴ Toma lwani moto moyene yona oyoama a elimo eNjambe, na bodongo, na bosɛnɔ bosoti.

²⁵ A mojɔ momina, toma lonani bokosea; balani moto na mina’nde moto oko mua modi soti, mojɔ bo bodi binama bia bicingani.

²⁶ Okadani na kɛlɛ t’okɔeni oko bobe. T’ojimeni oko bo kɛlɛ enu edipe na busa.

²⁷ T’okineni oko pokiso a mojɔ moSatana.

²⁸ Isa moto adaka mobi, abwaniti boba na ikina. Abwani bokɔ elomu epele na mɔmɔ mande, bo adihe likonja a bopa baya badi na taka.

²⁹ T’okineni oko ekenge ebe emane a Ininɔkɔ minu; dani ko na ebaeli epele, a boleha na bokɔmeja baya bakaka.

³⁰ T’okejaeni oko Mwembo Mosɛnɔke moNjambe sɔni, mojɔ bo o’sɔni embete ende a mojɔ mobusa bobosikoa.

³¹ Toma dongejani lisoki lisusu, na kɛlɛ, na kɛnjɔ, na misoo, na malɔngi, na bikɔmɛli bisusu bibe.

³² Na dani na monganji, moto ai mina’nde moto, na molema mo yɛmbu; kinanani jibe, moto na mina’nde moto, o akwa Njambe jibe jinu a tei eMasiya.