Baɛpɛsɔ 2 - Nouveau Testament en Ngombe 1961

¹ Ino odakani kanga bagwake mɛnɛ a mojɔ momalaboa manu na jibe jinu.

² Mida minu midaka oko moda mongondo ye, na odakani na lisuma ai kumu yona odi na bokumu bonde a pwea, oko mwembo mua modi na ngulu a tei ebana balipanga e dɛye.

³ Iso pongono, so basusu, bopangana na bu, na lisuma lisu lidaka oko a posa jimokuku. Bodaka babuli baposa jimokuku na jimolema. Bodaka bana bakɛlɛ oko a bobotama bosu, iso na ’bo tungu emɔci.

⁴ Njambe ko anɔi na wa, na apalaka so na ngɛnjɔ enɛnɛ;

⁵ a mojɔ momina, nongo adaka so bagwake a mojɔ mojibe jisu, iyo apa so bomɔ yana apa yo Masiya bomɔ (ohelni oko a mojɔ momonganji moNjambe), na angɔjɔ so na Masiya, na adeja so na nde a bisika biDiko, a tei eMasiya Yesu,

⁷ bo anejae monganji monde pɛ njɛngi, na likabo linde ai so, a tei eMasiya Yesu, a bilulu bia bidoakini.

⁸ Mojɔ bo ohelini a mojɔ moejimeli, cina emonganji moNjamhe; mojɔ momina mocingiti na nu bɛnɛ; modi oko epeeli eNjambe.

⁹ Mocingiti nongo na bilomu, bo moto asaka sakumeja.

¹⁰ Mojɔ bo ’so bodi elomu ekɔkɔ Njambe; boyoama a tei eMasiya a mojɔ mobilomu bipele, na Njambe abisɛlingoa eyou bo bokɔe bilomu bimina. Bokatana a tei eMasiya

¹¹ BaYuda baya basɔkɔ embete ubolena-ganda a mokuku oko a mɔmɔ mabato, babeaka no bamwea. A mojɔ momina obwanitini bobosa bo obotamani oko bapakano.

¹² A ehole emina odakani habɔtɔnɔke na Masiya, pɛpɛ nongo lisango a bokumu boYisalaele, pɛpɛ nongo libondo a mikongo minjikano, pɛpɛ nongo njingo, pɛpɛ nongo Njambe a ngondo.

¹³ E dɛye ko, a tei eMasiya, mo baya badaka boso bohali, obatamani hulelu a mojɔ momakia maMasiya.

¹⁴ Mojɔ bo yo adi mokongo mosu mobosiili. Iyo akataneja so baya badaka babae bo bodae oko omɔci pɛ, na abuka ngbungbu ebobɔteja a tei esu.

¹⁵ Abakea mokongo mobosiili na mokuku monde mɛnɛ, bo asiejae mokongo moMibeko na mongila, na bo apɛ bowi oko na boyoa bomoto omɔci moyene a tei ende mɛnɛ, oko na bu babae.

¹⁶ Akɔ boa bo akatanejae so babae na Njambe, o mokuku momɔci a mojɔ momole-mobokea. Oko boa asieja lisoki limina.

¹⁷ Iyo adoa, na atɔndɔ mwako mobowi ai no baya badaka bohali, na ai baya badaka hulelu.

¹⁸ Mojɔ bo so basusu babae bodi na njea ebokwea ai Sango na mwembo momɔci a mojɔ monde.

¹⁹ Oko boa oditini koko midoa na bakɛndɛli; mo na basɛnɔke odini ngando emɔci, na odini bana badenga diNjambe.

²⁰ Babwɛnji na batɔndɔi badi eyoeli-ecina enu, na Masiya Yesu yo mɛnɛ adi litai limogbukusu.

²¹ Eyoeli esusu ekatani a tei ende, na eyoamaka bo edae tempelo esɛnɔke a tei eKumu.

²² Na okatanani no bɛnɛ a tei ende o ndako, bo odaeni tempelo eMwembo a mojɔ moNjambe.