Bakɔlɔsai 4 - Nouveau Testament en Ngombe 1961

¹ Ino baswa, anejani ekɔmɛli epele ebɔngɔke ai bakɔmɛli banu; pɛ bobosani bo ino bɛnɛ odini koko na Moswa’nu a Diko.

² Dani na lingbangba a bonga; sɛnjɛlɛni a bonga na sepi.

³ Ingani a mojɔ mosu pongono, bo Njambe ahojae njea ai so a botɔndɔ mojɔ mobombamake moMasiya; mbi nadi a minyɔlɔ oko a mojɔ momina.

⁴ Ingani bo nabolojae mojɔ momina a bohu na ebaeli yena ebwani.

⁵ Kinani bikɔmɛli bmu bidae na bowɛi a mojɔ mobato basokolu; pɛ bonamejani masu manu.

⁶ Kinani epaeli ehenge ebaeli enu o ahengaka moto mia na mukwa, bo ojebeni bosɔnibeja ebaeli yena ebwani ai moto na moto.

⁷ Tukiko adi botɔndɔ no mijɔ mimbi misusu. Iyo adi mwangwa’ mbi oepaeli, na mokɔmɛli osoti, na akɔmɛkɛ Kumu o akɔkɔ mbi.

⁸ Mbi namolomi ai no oko a mojɔ momina, bo ake mwako monu, na apingejae milema minu.

⁹ Nalomi koko Onesimo, mwangwa’mbi osoti na oepaeli, yona odi moto onu bɛnɛ. Ibo badi bopa no mwako mosusu mosu jɔnɔ.

¹⁰ Alisitaluko, yona odi na mbi a blɔkɔ, alomeaka no njɛhɛ, na Malako pongono, pako eBalanaba (o’sɔni monɔkɔ a mojɔ monde; akadoa ai no, mo’sɔni bopele),

¹¹ na Yesu yona odi na kombe Yuse-to; BaYuda baya bakɔmejaka mbi a elomu eBokumu boNjambe, oko bo basato pɛ, na bagɔmbejai molema mombi.

¹² Epapulo, moto onu bɛnɛ, alomeaka no njɛbɛ pongono. Iyo adi mokɔmɛli oMasiya, na angaka a mojɔ monu na bingi bihole bisusu, bo odaeni bato bapingake na bambilimake a bosuma bolulea boNjambe bosusu.

¹³ Mbi nadi monjɛnɛki obingi ende a mojɔ monu, na a mojɔ mobato baLaodikia, na bato baYelapoli.

¹⁴ Luka, monganga oepaeli, na Dema, babɛjɛkɛ no njɛbɛ.

¹⁵ Abɛjɛni baninga baLaodikia; abɛjɛni Numpa, na Denga lia lidi a ndako ende.

¹⁶ Okasiejani bolanga mokanda mu a tei enu, pɛ bobosani bo bamolange a Denga diLaodikia; ino ko toma langani mokanda moLaodikia pongono.

¹⁷ Pani Alukipo monɔkɔ mu; Banea elomu esɔ wɛ ai Kumu, bo okɔe elomu emina na soti.

¹⁸ Asɔni njɛbɛ embi Paulo na ebɔ embi embi mɛnɛ. Pɛ bobosani minyɔlɔ mimbi. Yɛ monganji moNjambe modae na nu.