Bakɔlɔsai 3 - Nouveau Testament en Ngombe 1961

¹ Ino, isa ongɔini na Masiya a bogwa, dukani ngando jidiko, a esika edi Masiya a ebɔ ebami eNjambe.

² Bakeani milema minu a ngando jidiko, te a ngando jinase.

³ Mojɔ bo ino odini bagwake, na bomɔ bonu bobombami na Masiya a tei eNjambe.

⁴ Masiya adi bomɔ bosu; iyo akamana a bohu ino ômanani na nde Pongono a ekumu.

Mida Mibato baMasiya

⁵ A mojɔ momina toma wejani ngando jingondo ye a tei enu, bɔɔli, mijɔ Mibosambolu, lisɔngi, posa jibe, mbengea. (Mojɔ momina modi bosakoa bobokosea.)

⁶ Kɛnjɔ eNjambe edi ai bana balipanga a mojɔ mongando jimina.

⁷ Ino odakani na bikɔmɛli bimina yana adaka no a tei engando jimina.

⁸ E dɛye ko, toma dumbani ngando ji jisusu; kɛlɛ, kɛnjɔ, ekɔmɛli ebe, bolɔngɔ, bikenge bibosambolu a minɔkɔ minu.

⁹ T’okoseanani oko, mojɔ bo ohwani moto moyou na bikɔmɛli binde,

¹⁰ na olwani moto moyene yona odi na elimo eyene, oko elimo ende yona omoyoa a mojɔ moejebeli ende.

¹¹ A eyoeli emina, bato baditi BaEla isa BaYuda, bato babolena-ganda isa pɛ bolena-ganda, isa bato babohali, isa BaSukutea, isa babuli, isa basɔmi; mojɔ mosusu modi Masiya a tei ebato basusu.

¹² Njambe ahɔ no, basɛnɔke na bato baepaeli. A mojɔ momina kwani elwali enu edae milema miwa, na peye, na bosatiteja, na bo yɛmbu, na bowi.

¹³ Isa moto adi na moto otongo mojɔ, aditi bokɛnjɔ na nde, adi bomoyɛ. Masiya a yɛ no; oko boa toma yɛnu Pongono.

¹⁴ Ngɛnjɔ ko enɔi ngando ji jisusu; ekatanejaka na boka-tana bosoti.

¹⁵ Kinani bowi boMasiya bodae na bokumu a milema minu; obeamani bo odaeni mokuku momɔci oko a mojɔ momina. Dani koko na bosakoa.

¹⁶ Kinani Ebaeli eMasiya edae a tei enu, na enɛnge a tei enu na bowɛi bosusu. Ikojanani na lehanani na njembo jiNjambe, njembo jibosakoa, njembo jiMwembo. Imbani njembo ai Njambe na sepi a milema minu.

¹⁷ Okakɔni mokina mojɔ, isa bobala, isa elomu, kɔni ngando jisusu a kombe eKumu Yesu, na sakoani Njambe Sango a kombe ende.

¹⁸ Ino bali, toma dani na lisuma ai bami banu; obwanini boda boa a tei eKumu.

¹⁹ Ino bami, toma dani na ngɛnjɔ ai bali banu; pɛ bodani na bu bɛlɛbɛlɛ.

²⁰ Ino bɛngɛ, toma sumani baboti banu a ngando jisusu; mojɔ momina mosepejaka Kumu.

²¹ Ino basango, pɛ botukoani bana banu, bo milema Mibu misaka ngwa.

²² Ino bakɔmɛli, sumakani baswa banu ya nase a mijɔ misusu; pɛ bokɔni elomu enu a miso mabu pɛ, a bosepeja bato; kɔni na milema minu misusu na lisuma ai Kumu.

²³ Kɔni bilomu binu bisusu na bingi, o bakɔmɛli baKumu, te bakɔmɛli babato.

²⁴ Jebani bo ôsɔni lisango ai Kumu o ndese enu. Kɔmɛni Masiya Kumu.

²⁵ Mojɔ bo moto yona okɔkɔ bobe âsɔ ndese ebobe. Njambe adi oko na mwɛngi momɔci pɛ a mojɔ mobato basusu.