Bakɔlɔsai 2 - Nouveau Testament en Ngombe 1961

¹ Napalaka bo ojebeni bo nanaka bila enɛnɛ a mojɔ monu, a mojɔ moBaLaodikea, na bato basusu baya banɛkini boso bombi na miso.

² Nakɔkɔ boa bo Inilema Mibu mihɛe na eci o akatanaka ho na epaeli, na bo babɔnge a mojɔ mobowɛi bosoti a bocingea mojɔ mobombamake moNjambe, oko Masiya.

³ Mijɔ misusu miyumu Mibowɛi na miejebeli midi a tei ende.

Bileho a Mojɔ Momwako Mobokosea

⁴ Nabali boa, bo moto asaka kosea no na bikenge biepulu.

⁵ Nadi na nu bohali; endele ko nadi na nu a mwembo, na nanɛkɛ na sepi mɛnɛ mida minu mingɛbɛnɛkɛ, na ejimeli enu embilimake a tei eMasiya.

⁶ Oko boa, ami no sɔ Kumu Yesu Masiya, toma dalani a tei ende oko boa.

⁷ Kinani njeli jinu jidae a tei ende; dani bambilimake a diko dieyoeli ecina yena edi a tei ende, o asɔ no bokoja; dani koko na bosakoa bonɛnɛ ai Njambe.

⁸ Toma nganjamani bo moto atakosea no na bikenge bibowɛi, na mijɔ mingasangasa mia mihulaka ai bato pɛ, na micingi na ejimeli a miembo mingondo, te nongo na Masiya.

⁹ Mojɔ bo bonjambe bosusu mɛnɛ bodi a tei eMasiya o mokuku,

¹⁰ na bomɔ bodi bolumeja no, oko a tei ende yona odi Kumu omakumu masusu na bakumu basusu.

¹¹ Ino o’sɔni embete ebolena-ganda te nongo a mɔmɔ mabato a bodongeja mini mimokuku, oko ai Masiya na bolena bonde;

¹² na opuseamani na nde a batisimo, na ongɔni koko a bogwa oko na nde, a mojɔ moejimeli a ngulu eNjambe yona omongɔjɔ a bogwa.

¹³ Njambe amopa bomɔ, na apa no bomɔ a tei ende, oko no baya badaka bagwake a tei ejibe, pɛpɛ nongo embete ebolena-ganda a mokuku, na akina jibe jinu jisusu.

¹⁴ Ahakoa mokanda momijɔ mia midaka o nongo jisu, na aseja mojɔ momina; aebakea a mole-mobokea monde na kala.

¹⁵ Abeja makumu na bakumu; abasambo-ja a boso bobato na abagbokeja a mole-mobokea.

¹⁶ T’ojimeni oko bo moto asambejae no a mojɔ moboyaka na bomwaka, isa a mojɔ momabonje, na Sabata, na ekɔmɛli enu yana atɛkɛ songe.

¹⁷ Ngando ji jisusu jidi oko esie pɛ engando jia jidi boda ngɔngɔ; mokuku mɛnɛ modi oko Masiya.

¹⁸ T’ojimeni oko bo obungejaeni ndese enu a mojɔ momoto yona obekeaka no bo osatitejaeni a bosakoa babwɛnji badiko. Moto omina alɛkɛ oko mijɔ minjɔti pɛ, na egbo emolema monde mobe.

¹⁹ Aciniti nongo na Molo; mojɔ bo bmama bisusu bimokuku bikatani a mojɔ momongi na sisa, na mokuku mosusu mokandoaka na ngulu eNjambe.

²⁰ Isa ogwani na Masiya a mijɔ mingondo, odini na ekɔmɛli ebato bangondo mojɔ moye?

²¹ Osumakani Mibeko mi mojɔ moye?—Yɛ bobakea ebɔ a eka emina; yɛ boyaka eka emina; yɛ bopea eka emina,

²² (oko leka lua logwaka a elomu) Ngando jimina jidi oko Mibeko na bokoja bobato pɛ.

²³ Jidi na bokina bowɛi a miso mabato, a mojɔ mobosakoa bonɛnɛ, na bosatiteja, na bodingoja bomokuku; endele ko, jidi oko ngasa mɛnɛ, na jitakɔmejaka nongo a bogbokeja posa jimokuku.