Boboloja 9 - Nouveau Testament en Ngombe 1961

¹ Ohwɛnji obatano ahuea mondule, na mbi nanɛ monjɔtɔ yona omadonga Diko na ami kwa oko a ngondo. Iyo asɔ sabe emo-mbɔndɔ monase,

² na adipoa mombɔndɔ monase. Modidi momana a mombɔndɔ, o modidi momosa monɛnɛ. Modika-busa mohinda, na husa bohinda a mojɔ momodidi momombɔndɔ.

³ Bapaala bamana a modidi na banangana a ngondo, na basɔ ngulu yena ebwani na ngulu ekoolo bangondo.

⁴ Basɔ mobeko bo batabeja njienjie jingondo, isa njua, isa mele, oko bato pɛ baya bapeliti embete eNjambe a maso mabu.

⁵ Basɔ kpaci bo babanɔngejae songe batano, te bo babawoe. Na bakeja mwano mwano mokoolo yana akomaka yo moto.

⁶ Masu mamina makadoa, bato badi boduka bogwa, pɛ ko boboloja bogwa. Badi boda na posa ebogwa, na bogwa bodi bobacia oko bocia.

⁷ Bapaala bamina badaka o punda baya badi na mosɛlingo mobila. Badaka na leka a melo Mibu o makongo mawɔlɔ. Maso mabu madaka o maso mabato.

⁸ Swe jibu jidaka o swe jibali, na mino mabu madaka o mino magbɔngɔ.

⁹ Molilo mobu a mupa modaka o nguba jiebende, na epupeli emapapulapu mabu edaka o mokilimo mopunda banɛnɛ baya bapotaka na majangi a bila.

¹⁰ Mikɔmbɔ mibu midaka o mikɔmbɔ mikoolo, na ngɛngɛ jibu pongono, na ngulu ebu a bodingoja bato songe batano edaka a mikɔmbɔ Mibu.

¹¹ Obwɛnji omombɔndɔ monase adi kumu obu; kombe ende a kɔpi eBaEbele edi Abadona, na edi Apolwona a kɔpi eBaEla.

¹² Monɔngɔ moboso monɔi. Minɔngɔ mitongo Mibae mikɛkɛ adoe.

¹³ Obwɛnji obasamano ahuea mondule, na mhi naka kɔpi ekamane a njeka jinɛi jilitumbu liwɔlɔ lia lidi a boso boNjambe.

¹⁴ Kɔpi emina ebala na obwɛnji obasamano yona odaka na mondule bo, Cingoa babwɛnji banɛi baya badi a mbɔci a dua enɛnɛ Pelata.

¹⁵ Babwɛnji bamina banɛi, baya bama sɛlingoa a mojɔ moehole emina, na busa bomina, na songe omina, na yanga emina, baci-ngoama bo bawoe ekenge ebisato ebato bangondo.

¹⁶ Etango emandundu mabasoda bapunda edaka mandundu koto licinda, tu lindundu basoda koto domi, na mbi naka etango ebu.

¹⁷ Anjaka mbi oko bonja, nanɛ punda na baya badaka babaki a punda. Mililo Mibu mimupa midaka mikpetu o mosa, na mihindo, na midaka koko na langi esupulu. Melo mipunda midaka o melo migbɔngɔ, na mosa na modidi mimanaka a minɔkɔ Mibu.

¹⁸ Ekenge ebisato ebato bangondo egwa a mojɔ momadingoa ma masato, oko a mojɔ momosa, na modidi, na supulu, mia mimanaka a minɔkɔ Mibu.

¹⁹ Mojɔ bo ngulu epunda edaka a minɔkɔ mibu, na a mikɔmbɔ mibu. Mikɔmbɔ mibu midaka o njɔ na melo minjɔ, na banɔngeja bato oko na melo mimina.

²⁰ Bato batongo baya bahela a madingoa mamina bai-hekoja milema mibu a bokina leka lokɔ bo na mɔmɔ; na baikina bosakoa miembo Mibe, isa bilimo biwɔlɔ, na bilimo bipalata, na bilimo biebende, na bilimo bimatai, na bilimo bimole bia bipeliti nongo njɛnɛ isa njoki, na te bidalake.

²¹ Na baihekoja milema Mibu a bokwa ekɔmɛli ebu ebowa bato, na elomu ebu edemba, na ngando jibu jibosambolu, na liba.