Boboloja 7 - Nouveau Testament en Ngombe 1961

Obwɛnji Abakea Embete ai Bakɔmɛli baNtambe

¹ Ngɔngɔ jimina, nanɛ babwɛnji-baDiko banɛi; badaka ba’mi a makulu mangondo manɛi a bopea pwea jinɛi jingondo, bo pwea etahwea nongo a ngondo, isa a madiba, isa a mele.

² Nanɛ koko okina obwɛnji-oDiko otongo akamane a dɔngɔ diɛsɛta. Iyo apeaka embete eNjambe obomɔ, na abekoa na kɔpi epipo ai babwɛnji badiko banɛi, baya bama sɔ kpaci a bobeja ngondo na madiba.

³ Abala bo, T’obejaeni oko ngondo, isa madiba, isa mele, oko bopetakini bakea embete a maso mabakɔmɛli baNjambe osu.

⁴ Naka etango ebato baya basɔ embete; badaka koto mokama-na-domi-inɛi na koto jinɛi baya basɔ embete, bamakota masusu maYisalaele.

⁵ Balikota liYuda; basɔ embete, koto domi-na-jibae. Balikota liLubena, koto domi-na-jibae. Bahkota liGada, koto domi-na-jibae.

⁶ Balikota liAsela, koto domi-na-jibae. Balikota liNepatali, koto domi-na-jibae. Balikota liManase, koto domi-na-jibae.

⁷ Balikota liSimeona, koto domi-na-jibae. Balikota liLewi, koto domi-na-jibae. Balikota liYisakala, koto domi-na-jibae.

⁸ Balikota liSebeuluna, koto domi-na-jibae. Balikota liYosepa, koto domi-na-jibae. Balikota liBenyamina, koto domi-na-jibae.

⁹ Nanja koko, na nanɛ emumu ebato pɛ njɛngi; pɛpɛ nongo moto obwani bolanga etango emina; bato bamakota masusu, na tungu jisusu, nambota jisusu, na kɔpi jisusu. Badaka ba’mi a boso bongɛndɛ, na a boso boMwana-Bata. Balwaka kasaka jiyai jipu, na bapeaka mango a mɔmɔ mabu.

¹⁰ Babekoa na kɔpi epipo bo, Boheleja bodi ai Njambe osu yona odi a ngɛndɛ, na ai Mwana-Bata.

¹¹ Na babwɛnji-baDiko basusu baya bahikaka ngɛndɛ, na basuku, na bato babomɔ banɛi, bakwa a maso mabu a boso bongɛndɛ na basakoa Njambe bo,

¹² Amen; bojongoa, na ekumu, na bowɛi na bosakoa, na lisuma, na kpaci, na ngulu, ai Njambe osu oko na bosusu. Amen.

¹³ Okina obasuku abala na mbi; yo ’ɛ bo, Ibo banda, baya badi na bisenja bipu? Bahuli jɔ?

¹⁴ Mbi namosɔnibeja bo, Kumu ombi, wɛ ojebi. Iyo abala na mbi bo, Ibaba badi oko baya bamani a bodi-ngoa bua bonɛnɛ; basosi bisenja bibu, na babipuejai a makia ma-Mwana-Bata.

¹⁵ A mojɔ momina, badi a boso bongɛndɛ eNjambe, na bamokɔmɛkɛ a tei etempelo ende na bulu na moi. Iyona odi a ngɛndɛ âda etondo ebu bo babolame ena.

¹⁶ Bataya peka na nja; bataya da na ekangola emadiba; batadingoa koko a mojɔ momodika-busa, isa a mojɔ momoi mopipo.

¹⁷ Mojɔ bo, Mwana-Bata yona Odi a ndanda engɛndɛ âda mobanei obu, na âbaneja njea a melo minjiba jibomɔ; na Njambe ahakoa mbisoli jisusu a miso mabu.