Boboloja 5 - Nouveau Testament en Ngombe 1961

Mokanda na Bimbete Sambo

¹ Nanɛ koko mokanda a ebɔ ebami ende yona odi a ngɛndɛ, mua modaka na misɔnɔ a tei na a sokolu, na mokandama na bimbete sambo.

² Nanɛ koko obwɛnji oDiko ongulu akabekoe na bopipobo, Obɔngi bo adipoe mokanda na bobuka bimbete sambo nda?

³ pɛpɛ nongo okina ko oho Diko, isa a ngondo, isa a cina jingondo, obwana bodipoa mokanda, isa bonja a tei.

⁴ Mbi nayea bio mojɔ bo pɛpɛ nongo moto oboloa yona obɔngɔ bo adipoe mokanda isa bonja a tei.

⁵ Na okina obasuku abala na mbi bo, YƐ boyea; anja, Gbɔngɔ ohkota liYuda, obotina boDawidi, agbokejai bo adipoe mokanda na bimbete sambo pongono.

⁶ Mbi nanɛ a sibano engɛndɛ na bato babomɔ banɛi, na a tei ebasuku, nanɛ Mwana-Bata yona odaka ami o yona oma gwa. Adaka na njeka sambo, na miso sambo, maya madi Miembo sambo miNja-mbe mia milomama a ngondo esusu.

⁷ Iyo adoa na atomba mokanda a ebɔ ende ebami yona odaka a ngɛndɛ.

⁸ Ama yo tomba mokanda, bato babomɔ banɛi, na basuku licinda-na-banɛi, ba’mi sadumba oko a boso boMwana-Bata; moto na moto obu adaka na gongo a ebɔ, na sani jiwɔlɔ jia jiluma na malasi; malasi mamina madi oko bingeeli bibasɛnɔke.

⁹ Ibo ba’mba yembo ye eyene, bo, Wɛ obɔngi botomba mokanda na bobuka bimbete; Mojɔ bo wɛ ogwa, na osikoa bato na makia mawɛ mɛnɛ ai Njambe, Bato bamakota masusu, na kɔpi jisusu, na maboti masusu, na tungu jisusu;

¹⁰ Okɔ bo badae bokumu na nganga ai Njambe oSu, na bâda na bokumu a ngondo.

¹¹ Anja mbi koko, naka kɔpi jimandundu mababwɛnji-baDiko pɛ njɛngi, baya bahikaka ngɛndɛ na bato babomɔ na basuku.

¹² Babala na kɔpi epipo bo, Mwana-Bata yona ogwa abɔngi bosɔ kpaci, na makonja, na bowɛi na ndangasa, na lisuma, na ekumu, nabojo ngoa.

¹³ Na mbi naka bato basusu baDiko, na bangondo, na cina jingondo, na a madiba, na leka losusu lua lodi ena, bakabale bo, Bojongoa, na lisuma, na ekumu, na kpaci, ai yona odi a ngɛndɛ, na ai Mwana-Bata oko na bosusu.

¹⁴ Na bato babomɔ banɛi babala bo, Amen. Na basuku basadumba a bosakoa.