Boboloja 1 - Nouveau Testament en Ngombe 1961

¹ Ibu bodi boboloja boYesu Masiya. Njambe abomopa bo anejae bakɔmɛli bande ngando jia jidi bodoa bokpa; na yo ajebeja mokɔmɛli onde Yoane mojɔ momina, yana amolomea yo obwɛnji onde.

² Yoane adi motati oEbaeli eNjambe na otati eYesu Masiya, a mojɔ mongando jisusu jinɛ yo.

³ Bojongoa ai moto yona olangaka bikenge bieseko ye; bojongoa ai baya ba’kaka, na baya basumaka ngando jia jisɔnɔmi ena; mojɔ bo ehole emina edi hulelu.

⁴ Yoane ai Menga sambo maMasiya maya madi a Asia; Monganji ai no na bowi boYona odi, Yona odaka, na Yona odi na bosusu, na miembo sambo mia midi a boso bongɛndɛ ende,

⁵ na Yesu Masiya, Motati oejimeli, Mwana-sɔmi a tei ebagwake, Mosuku obakumu bangondo. Iyo apalaka so, na asikoa so a jibe jisu, na makia mande,

⁶ na akɔ bo bodae bokumu bonganga ai Njambe Sangwa’nde. Ekumu na bokumu ai yo oko na bosusu. Amen.

⁷ Hokeani; akɛkɛ adoe na biyembi. Miso masusu madi bomonɛ, na baya bamondea pongono. Na makota masusu mangondo mâyea bio a mojɔ monde. Ee, Amen.

⁸ Kumu Njambe abalaka bo, Mbi nadi Alepa na Omega, yona odi, yona odaka, yona odi na bosusu, yona onɔi basusu.

Mojɔ Monɛ Yoane

⁹ Mbi Yoane, mwangwa’nu yona okatani na nu a tei eminɔngɔ, na a bokumu, na a eci yena edi a tei eMasiya; mbi nadaka a mosanga mua modi na kombe Patemo, a mojɔ moEbaeli eNjambe, na a mojɔ motati eYesu.

¹⁰ Nadaka a Mwembo a busa boKumu, na naka kɔpi epipo a ngɔngɔ jimbi o mondule bo,

¹¹ Sɔnɔ mojɔ monɛkɛ wɛ a mokanda; moloma a Menga sambo maMasiya, a Ɛpɛsɔ, na Semuluna, na Pelugamona, na Twatila, na Saludi, na Piladelupia, na Laodikia.

¹² Mbi nahekoa a bonɛ kɔpi yena ebalaka na mbi. Ahekoa mbi, nanɛ paka jiwɔlɔ sambo.

¹³ Okina o Mwana ’Moto, yona olwaka kasaka eyai adaka a ndanda epaka, na adaka na kamba ewɔlɔ a bupa.

¹⁴ Molo monde, na swe jinde, jidaka bopu bopɛɛ o makambule. Miso mande mangɛngɛkɛ o mosa.

¹⁵ Bibota binde bidaka o mboa jipele jia jimana a mosa na bolailai. Kɔpi ende edaka o doi eepela.

¹⁶ Apeaka njɔtɔ sambo a ebɔ ende ebami, na abɛnɛ onjɛngɔ jibae jipɔlu amanaka a monɔkɔ monde. Boso bonde bodaka o bohu bonɛnɛ bomodika-busa a ngulu ende.

¹⁷ Yana amonɛ mbi, nakwa a bibota binde o mogwake. Iyo ko abakea ebɔ ende ebami ai mbi, na abala bo, yɛ bobanga. Mbi nadi yona oboso, yona osuka, na yona obomɔ.

¹⁸ Mbi nagwa; e dɛye ko nadi mɔ oko na bosusu, na napeli sabe jibogwa na jiesika ebagwake.

¹⁹ Oko boa, sɔnɔ mijɔ minɛkɛ wɛ, mia midi e dɛye, na mia midi bodoa ngɔndɔ.

²⁰ Cina enjɔtɔ sambo bani wɛ a ebɔ embi ebami, na paka jiwɔlɔ sambo edi oko ye; njɔtɔ sambo badi babwɛnji baMenga sambo, na paka sambo jidi Menga sambo.