Baloma 3 - Nouveau Testament en Ngombe 1961

Bato Basusu Badi Babe

¹ Oko boa MoYuda adi boso bobato batongo? Bolena boganda bodi na cina? Ee, bou mɛnɛ.

² Mojɔ moboso modi oko mu; Njambe abapa Misɔnɔ a mojɔ mobobanea.

³ Isa bakina babu baijima, sako eNjambe edi bokputoa a mojɔ mokitɛ ebu?

⁴ Pɛpɛ nongo mweka! Nongo adi bato basusu bakosei, Njambe atakputoja ebaeli ende; mojɔ bo mosɔnɔmɔ bo, Bo olonge na bibaeli biwɛ, Na ogbokejae yana asambaka wɛ.

⁵ Bobe bosu bonejaka bodongo boNjambe a bohu. Oko boa, Njambe akakɛnjɔ na su, bodi bobala bo alongiti? (Nabalaka na monɔkɔ momoto.)

⁶ Pɛpɛ nongo mweka! Ekada boa, Njambe adi bosambeja ngondo o bo?

⁷ Na isa Soti eNjambe eboloaka a bohu a mojɔ mobokosea bombi, na ekumu ende ehɛkɛ boa, nadi bosamba o moto mobe mojɔ moye?

⁸ Ekada boa, bobwaniti bokɔ bobe bo bopele boboloe? Mojɔ bo bakina bato badɔkɔ so, na batɔndɔkɔ na bokosea bo so bobalaka boa. Bato bamina babwani bodumbama soti.

⁹ Oko boa nde? Iso BaYuda bodi na Iikina lilonga? Pɛpɛ nongo mweka! Mojɔ bo bonejai boso bo bato basusu boya badi a libuli libobe, BaYuda na BaEla pongono.

¹⁰ Mosɔnɔmɔ koko bo, Moto obodongo aditi, pɛpɛ nongo omɔci.

¹¹ Pɛpɛ nongo moto ocingeaka; Pɛpɛ nongo moto odukaka Njambe.

¹² Bato basusu bapengoi; balaboi kanga basusu mɛnɛ na molema momɔci. Pɛpɛ nongo moto okɔkɔ bopele, pɛpɛ nongo omɔci.

¹³ Bikoolo bibu bidi oko esɛmɔ yena edi bwase; Biemi bibu bidi oko na bokosea. Ngɛngɛ elibate edi cina jibiposo biminɔkɔ mibu.

¹⁴ Minɔkɔ mibu milutni na masingi na biloli.

¹⁵ Bapotaka mbango a bosopa makia.

¹⁶ Mɔlɛ mabu madi oko bowa na bobeja.

¹⁷ Batajebaka nongo njea ebowi.

¹⁸ Miso mabu matabangaka nongo Njambe.

¹⁹ Bojebaka bo bikenge bibalaka Mibeko bidi oko a mojɔ mobato baya badi cina jiMibeko. Oko boa pɛpɛ nongo monɔkɔ modi bosalongeja, na ngondo esusu edi bojima kpaci eNjambe a bosambeja.

²⁰ Mojɔ bo pɛpɛ nongo moto odi bolonga a miso mande cina ebilomu biMibeko; Mibeko mipaka oko ejebeli ebobe.

Lilonga a Mojɔ moEjimeli ai Yesu Masiya

²¹ Edɛye ko bodongo boNjambe boboloi na njea etongo, te nongo na Mibeko. Endele ko, Mibeko na batɔndɔi badi batati babodongo boNjambe,

²² oko bodongo boNjambe ai bato basusu baya baji-maka, na cina eejimeli ai Yesu Masiya. Bato basusu badi amɛci,

²³ mojɔ bo bato basusu mɛnɛ bakɔ bobe; pɛpɛ nongo moto omɔci omea a mwɛngi moekumu eNjambe.

²⁴ Balongaka ko na monganji moNjambe o epeeli, a mojɔ molisiko lia lidi a tei eYesu Masiya.

²⁵ Njambe amoloma bo adae lisiko a mojɔ momakia mande, ai baya bajimaka. Oko boa Njambe aneja bodongo bonde, mojɔ bo akina jibe jia jikɔɔmɔ ehele, pɛ bosambeja.

²⁶ Akɔ boa a boneja so a ehole ye, bo adi na bodongo yo mɛnɛ, na bo alongejaka moto yona odi na ejimeli ai Yesu.

²⁷ Oko boa moto adi bosakumeja na ye? Abwaniti bosakumeja; mojɔ moye? A mojɔ mobilomu? Ngasa, oko a mojɔ moejimeli pɛ.

²⁸ Mojɔ bo, iso bojebaka bo moto adi bolonga oko a mojɔ moejimeli, te nongo a mojɔ mobilomu biMibeko.

²⁹ Njambe adi Njambe oBaYuda pɛ? Aditi Njambe obapakano pongono? Ee, adi Njambe obu pongono.

³⁰ Njambe adi oko omɔci. Adi bolongeja babolena-ganda a mojɔ moejimeli ebu, na baya bapeliti embete ebolena-ganda a mojɔ moejimeli ebu.

³¹ Oko boa, bodi bodumba Mibeko a mojɔ moejimeli? Pɛpɛ nongo mweka; bopingejaka Mibeko oko bopingeja.