Bafilipoi 4 - Nouveau Testament en Ngombe 1961

Moda moBato baMasiya

¹ A mojɔ momina, baninga bambi baepaeli, toma dani bambilimake boa a tei eKumu. Mbi nadi na posa ai no; sepi embi edi ai no, na odini ekumu embi.

² Mbi nalehaka Ewodia, na nalehaka Suntuke, ho badae na molema momɔci a tei eKumu.

³ Na nangaka wɛ pongono, wɛ limbaci limbi a elomu, bo okɔmejae bali bamina, mojɔ bo bakɔ elomu eMwako Mopele a dɔngɔ dimbi, ibo na Kelemento na bina’mbi batongo baya badi na kombe jibu a mokanda mobomɔ.

⁴ Sepakani ai Kumu bihole bisusu; najɔkɔ na nu koko bo, Sepakani.

⁵ Kɔni bo bato basusu banɛe bombɔki bonu. Kumu adi mbuci mɛnɛ.

⁶ T’odaeni oko na mokakwano nongo mweka; jebejani Njambe ko ngando jisusu jia jitakaka na nu, oko na bo’nga, na bongɔɔnɔ, na bosakoa.

⁷ Na bowi boNjambe bua bonɔi bocingea bomoto, bodi bobanea milema minu na miembo minu a tei eMasiya Yesu.

⁸ Mojɔ mosuka baninga, baneani a milema minu oko ngando jia jidi soti, jia jibɔngi, jia jidi bojo, jia jidi jisɛnɔke, jia jidi na epaeli, jia jidi na gala epele,—isa jinɔi na bopele, isa jibwani na bosakoa.

⁹ Kɔni ngando jikoa no na jisɔ no ai mbi, ngando ji’ka no na jinɛ no na mbi; na Njambe obowi âda na nu.

¹⁰ Mbi nadi na sepi enɛnɛ ai Kumu, mojɔ bo bolɛ bonu ai mbi bosisoi koko e dɛye. Odakani na bolɛ ai mbi soti, na etaka na nu oko njea a boneja bolɛ bonu.

¹¹ Nitabalaka boa a mojɔ motaka embi, cina bo mbi najebi e dɛye njea ebosepa na ngando jimbi tungu jisusu.

¹² Nalandoi na taka, nalandoi koko na lituna. Najebi boda na ligola, isa na nja, na leka lonɛnɛ, isa na bokwali.

¹³ Nahɔnɔkɔ ngando jisusu a tei ende yona opaka mbi ngulu.

¹⁴ Endele ko, okɔini bopele a bokatana na mbi a minɔngɔ mimbi.

¹⁵ Ino BaPilipoi, ojebakani bo pɛpɛ nongo dikwa Denga ditongo dijima na mbi a mojɔ mobopa na bosɔ bipeeli, oko no pɛ, yana adonga mbi a Makedonia a libangake lielomu eMwako Mopele.

¹⁶ Nongo adaka mbi a Tɛsalɔnike, olomeani mbi bipeeli bihole bibae a bokɔmeja mbi a taka embi.

¹⁷ Yena edukaka mbi ko editi epeeli mɛnɛ; nadukaka oko bo odaeni na mbuma jinɛnɛ a mojɔ moesako enu.

¹⁸ Mbi ko nasi leka losusu. Nadi na lituna lileka, mojɔ bo nasi toma eloma no na Epapulodito. Naditi koko na taka, na toma enu edi o epeeli esoo epele ejimaka Njambe, na emosepejaka.

¹⁹ Njambe ombi adi bopa no ngando jisusu jia jitakaka na nu, oko na mwɛngi momakonja maekumu ende a tei eMasiya Yesu.

²⁰ Ekumu ai Njambe Sangwa’su oko na bosusu. Amen.

²¹ Abɛjɛni bato basusu baDenga a tei eMasiya Yesu. Baninga baya badi na mbi ya babɛjɛkɛ no.

²² Bato baMasiya basusu babɛjɛkɛ no, gbo oko baya badi bakɔmɛli bandako eKaisala.

²³ Yɛ monganji moKumu osu Yesu Masiya modae na miembo minu.