Bafilipoi 3 - Nouveau Testament en Ngombe 1961

Eleho a Bokatana na Masiya

¹ Mojɔ motongo baninga, sepakani a tei eKumu. Mbi nitangwa nongo bosɔnea no ekenge emina, na obwanini boejima.

² Toma dingani a mojɔ mombwa; toma dingani a mojɔ mobato baya badi na bikɔmɛli bibe; toma dingani a mojɔ mobato babolena-ganda babokosea.

³ Babolena-ganda basoti badi oko so baya basakoaka Njambe a mwembo, baya bakumejaka Masiya Yesu, na bapeliti nongo ejimeli a ngando jimokuku.

⁴ Akɔki mbi pala, ka nabwani bojima ngando jimokuku. Isa okina moto alɛkɛ bo abwani boda na ejimeli a ngando jimokuku, esingaiti mbi!

⁵ Balena mbi ganda yana adaka mbi na masu bomwambe. Nadi moto ombota eYisalaele, moto olikota liBenyamina. Nadi moEbele, mwana oBaEbele. A njea eMibeko, nadaka MoPalusi.

⁶ Nadaka na bingi a bonɔngeja Denga. Nadaka na lisuma mɛnɛ a Mibeko, pɛpɛ nongo mojɔ.

⁷ Mbi ko nadumba ngando ji jisusu a mojɔ moMasiya, oko ngando jia jidaka na yumu a miso mambi.

⁸ Ee soti, mbi nalangaka ngando jisusu o ngando jingasa pɛ, a mojɔ moejebeli eMasiya Yesu Kumu ombi yena enɔi na yumu. Najima bo nabungejae ngando jisusu a mojɔ monde; najilangaka o pita pɛ, bo Leka lombi loyumu lodae oko Masiya pɛ, na bo nadae a tei ende,

⁹ te nongo a mojɔ mobodongo bombi mɛnɛ bua bocingi na Mibeko, oko a mojɔ mobodongo bua bocini na ejimeli ai Masiya, bua bohulaka ai Njambe a mojɔ moejimeli.

¹⁰ Nakɔ boa bo najebe Masiya, na ndangasa yena engɔ na nde a bogwa, bo nakatane na nde a madingoa mande, na bo nakatane na nde a bogwa bonde

¹¹ oko na njingo ebomea a bongɔ bobagwake.

¹² Editi bo mbi namei a suka emina, isa bo mbi nabɔngi na soti. Endele ko, nakɔkɔ na bopipo bo namee a mwɛngi mua mobwani, cina bo Masiya apee mbi oko a mojɔ momina.

¹³ Baninga, mbi nitalɛkɛ bo nabɔngi; endele ko, nakɔkɔ mojɔ mu momɔci; nabosaka ngando jia jidi ngɔngɔ, na nasalindaka na bopipo a ngando jia jidi boso.

¹⁴ Napotaka oko na miso mambi a suka enjea, na ndese edi oko bobea boNjambe bua bonɔi, a tei eMasiya Yesu.

¹⁵ A mojɔ momina, so baya badi bato bapingake bobwani boda na mokano momina. Isa odini na mokina mokano motongo, Njambe yo mɛnɛ adi bocingea no mojɔ momina.

¹⁶ Mojɔ momɔci ko, bobwani bodala a njea yena edi boso, oko na lisuma a ngando jijebaka so.

¹⁷ Baninga, ikoanani na mbi. Anjani baya banejaka no ekoaneli o anejaka so.

¹⁸ Cina bo, ekɔmɛli ebato banɛnɛ edi oko ekɔmɛli ebato baya badi soki jimole-mobokea moMasiya. Natomba bobala na nu a mojɔ mobu bihole binɛnɛ, na natɔndɔkɔ no koko e dɛye na bio.

¹⁹ Suka ebato bamina edi oko bogwa. Njambe obu adi oko sɔpɔ jibu bɛnɛ, na basakumejaka na sɔni ebu. Badi na bolɛ oko a ngando jingondo ye.

²⁰ Iso ko bodi na bosɔmi bosu oho Diko, na bonjaka na tɛndɛ bo Moheleja, Kumu osu Yesu Masiya ahule ena.

²¹ Iyo adi bokindoja mokuku mosu monase, bo modae na elimo emokuku monde mɛnɛ moekumu, oko na ngulu yena edi ai yo a bogbokeja ngando jisusu.