Bafilipoi 2 - Nouveau Testament en Ngombe 1961

¹ Isa bogɔmbeja bodi a tei eMasiya, na peye eepaeli, na bokatana boMwembo, na wa, na monganji

² sepejani mbi na soti a mojɔ mobokatana bonu na molema momɔci. Dani na epaeli emɔci, mokano momɔci, na mwembo momɔci.

³ Pɛ bokɔni mokina mojɔ na likaka, isa a mojɔ moegbo. Satitejani a milema minu, oko na bolɛ bo bato batongo banɔi no na bopele.

⁴ Moto na moto a tei enu abwani boda na bolɛ ai bato batongo, te a mijɔ minde mɛnɛ.

⁵ Kinani bo molema mua modaka a tei eMasiya modae a tei enu.

⁶ Mojɔ bo, yo, nongo adaka yo na elimo eNjambe, ailɛ nongo bo bobwana bonde na Njambe bodi eka eyumu a bobanea.

⁷ Asahangoja, na alwa elimo emobuli, na abotama na mokuku momoto.

⁸ Adaka yo na elimo emoto, asatiteja, na adaka na lisuma oko a bogwa, ee oko a bogwa bomole-mobokea.

⁹ A mojɔ momina, Njambe amokumeja bou mɛnɛ, na amopa ekina kombe yena enɔi kombe jisusu boya,

¹⁰ bo muuli masusu boya madi bo’mbama a kombe eYesu, isa oho Diko isa ya nase, isa cina enase ye,

¹¹ na bo minɔkɔ nususu mijime bo Yesu Masiya adi Kumu, a mojɔ moekumu eNjambe Sango.

¹² Baninga, ino odakani na lisuma bihole bisusu yana adaka mbi na nu. A mojɔ momina, toma dani na bingi e dɛye adi mbi bohali, a hongameja bohela honu, na bɔ na mongongoma.

¹³ Mojɔ bo Njambe yo mɛnɛ akɔkɔ elomu ende a tei enu, bo opaleni na okɔeni bolulea bonde bopele.

¹⁴ Kɔni bilomu bisusu, pɛpɛ nongo manungunungu na miano,

¹⁵ bo odaeni bana baNjambe baya baditi nongo na mojɔ, baya badi na milema mi yɛmbu, pɛpɛ nongo litɔnɔ a tei eelulu ye engulumake elipanga. Ino odini a tei ebu o paka jia jihojaka ngondo.

¹⁶ Peani Ebaeli ebomɔ oko boku. Oko boa mbi nadi bosepa a busa boMasiya bo naipota epotapota, na bo naikɔ elomu ekɔkɔ.

¹⁷ Ee, nongo makia mambi makasopea a diko di epeeli enu elitumbu, oko ejimeli enu, nadi na sepi, na nasepaka na nu basusu.

¹⁸ Oko boa toma sepani pongono, na sepani na mbi.

Timoteo na Epapulodito

¹⁹ Njingo embi edi ai Kumu Yesu bo nalomee no Timoteo ngɔngɔ bosme; oko boa nadi boka miako minu, na molema mombi modi bogɔmbɔ.

²⁰ Naditi na moto otongo yona obwani na nde, mojɔ bo yo alɛkɛ no na soti mɛnɛ.

²¹ Ibo batongo balɛkɛ oko ngando jibu bɛnɛ pɛ, te nongo jia jiMasiya.

²² Ino ko ojebakani bo yo apasami a elomu eMwako Mopele yena ekɔkɔ yo na mbi, o akɔmejaka mwana sangwa’nde.

²³ Oko boa nadi na njingo bo namaka nɛ suka emojɔ mombi, namolome oho ai no.

²⁴ Na nadi na ejimeli ai Kumu bo nitayeyoa a bodoa ai no mbi mɛnɛ.

²⁵ Mbi ko najimi bo nalomee no e dɛye mwangwa’mbi Epapu-lodito yona ocingami na mbi a elomu na a bila, obwɛnji onu ai mbi na toma jinu a bokɔmeja mbi a taka embi.

²⁶ Mojɔ bo yo adi na posa bo anɛnɛe na nu, na adi na monɔngɔ cina bo mwako moyogo ende momea oho ai no.

²⁷ Yo adaka na yogo soti, na apaka gwa; Njambe ko amokea wa, te nongo yo pɛ, oko mbi pongono, bo monɔngɔ mombi mosaka gbasoe.

²⁸ Oko boa nadi na posa enɛnɛ bo namolome ai no, bo odaeni na sepi a bo’nɛnɛ na nde, na bo molema mombi mogɔmbe pongono.

²⁹ Mo’sɔni bopele a kombe eKumu na sepi enɛnɛ, na dani na liSuma ai bato baya badi o adi yo.

³⁰ Mojɔ bo yo apaka gwa a elomu eMasiya; na apa njupi bo akɔmɛe mbi a kombe enu.