Baebele 9 - Nouveau Testament en Ngombe 1961

¹ Mokongo moboso modaka na Mibeko a mojɔ mobosakoa, na modaka na esika ebosakoa ya nase.

² Mojɔ bo bapika Etondo, na epei-epaka, na mesa, na milɛmbɛ mia mitandama a boso boNjambe; leka lomina lodaka a ekenge eboso; kombe eesika emina edi Esika-eBosɛnɔ.

³ Etondo etongo edaka a tei, a ngɔngɔ jingbungbu ejibae; kombe eesikaemina edi Esika-enɔi-Bosɛnɔ.

⁴ Litumbu lia liluama na wɔlɔ lidaka ena, na edejai emokongo yena ehuama na wɔlɔ; esei yena eluama na wɔlɔ edaka a tei a mojɔ momanna, na pango aAlona yena etɔ, na matai maMokongo.

⁵ Bilimo biekumu bidaka a diko diedejai, na esie emina ehua mongbelɛngɔ mowa. Botabala a mojɔ mocina jileka lu losusu e dɛye.

⁶ Bakolea leka losusu boa, bo nganga bakwee a etondo eboso masu masusu a mojɔ moelomu ebu.

⁷ A tei eetondo ebibae ko, nganga monɛnɛ akweaka oko yo buki tu yanga ehole emɔci, na t’akputoake botomba makia bo amapejae a mojɔ monde mɛnɛ, na a mojɔ mojibe jibato.

⁸ Mwembo Mosɛnɔke monejaka na mojɔ momina bo njea ebokwea a tei eEsika-enɔi-Bosɛnɔ eipaka boloa a ehole edaka Etondo eboso.

⁹ Mojɔ momina modi oko mondɛ a mojɔ moehole ye, yana apaka bo bipeeli na masiko maya mabwaniti bobɔngeja molema momoto yona osakoaka;

¹⁰ ngando jimina jicingi na boyaka, na bomwaka, na bososa na madiba; Mibeko a mojɔ momokuku mia midi na kpaci oko a ehole ehobɔngeja.

¹¹ Yana ko adoa Masiya, Nganga Monɛnɛ a mojɔ mongando jipele jibodoa, yo anɔ njea eetondo yena enɔi na bukɛ na bopele (eipikama na mɔmɔ, eiyoama na ekɔmɛli engondo ye),

¹² na akwea a Esika-eBosɛnɔ ehole emɔci pɛ yena ebwani na bosusu; aikwea na makia makambɛli na bana-bangɔmbɔ, oko na makia mande mɛnɛ, na aboloja lisiko lia lidi oko na bosusu.

¹³ Mojɔ bo, isa makia mangɔmbɔ na kambɛli na mihulu mimwana-ngɔmbɔ mia mimɛsɛkɛ bo ai bato baekia Mibabɔngejaka a njea emokuku,

¹⁴ esingaiti makia maMasiya yona osapa lisiko, pɛpɛ nongo litɔnɔ, ai Njambe a njea eMwembo mua modi na bosusu; madi bosɛnoja milema minu a bilomu bigwake, bo okɔmɛeni Njambe obomɔ.

¹⁵ A mojɔ momina, yo adi mosili oMokongo Moyene, bo baya babeama basɛ lisango lia lidikejama, lia lidi na bosusu, cina ebogwa bua bobasikoaka a jibe jia jidi a cina eMokongo moboso.

¹⁶ Mojɔ bo isa lisango lidi, yona okinaka lisango limina adi bopeta gwa.

¹⁷ Moto amiti gwa, otongo atasangoa; lisango libwaniti isa moto yona okinaka lisango adi oko mɔ.

¹⁸ A mojɔ momina Mokongo moboso mobakeama na makia.

¹⁹ Mojɔ bo, Mose, ama yo langa mijɔ misusu miMiheko ai bato basusu, ami tomba oko makia mabana-bangɔmbɔ na makambɛli, na madiba na makambule makpetu na kasa jilitindi, na amɛsɛ mokanda mɛnɛ na bato basusu pongono.

²⁰ Na abala bo, Ima madi makia maMokongo mobakei Njambe na nu.

²¹ Amɛsɛ koko boa Etondo na leka losusu lobo-sakoa, oko na makia.

²² Edi Soti bo Mibeko mikojaka bo leka losusu losɛnoaka na makia; makia mamiti sopea, bo yɛ bojibe boditi.

²³ Isa leka lua lodaka oko bimbete bingando jiDiko losɛnoa a mojɔ momasiko mamina, ngando jiDiko mɛnɛ jibwana na masiko maya manɔi masiko mamina na bopele.

²⁴ Mojɔ bo Masiya aikwea a Esika-eBosɛnɔ yena eyoama na mɔmɔ, yena edi oko embete pɛ eEsika-eBosɛnɔ esoti; akwea a Diko mɛnɛ bo amae a boso boNjambe e dɛye a mojɔ mosu.

²⁵ Aikwea bo asapɛ bihole binɛnɛ, o akweaka Nganga Monɛnɛ a Esika-eBosɛnɔ yanga na yanga na makia maya maditi makia mande mɛnɛ.

²⁶ Akɔki yo kɔ boa, ka adingoe bihole binɛnɛ, banga na libangake lingondo. Iyo ko adoa ehole emɔci pɛ a suka ebianga, bo asapɛ yo mɛnɛ lisiko a bodongeja bobe.

²⁷ Bato te babambake bogwa, bua bodi ehole emɔci, na ngɔngɔ jimina oko esambi.

²⁸ Oko boa Masiya pongono asapa lisiko ehole emɔci, bo atombe muna mojibe jibato banɛnɛ; na adoabi koko, te a mojɔ mobobe, oko a boheleja haya bamonjaka yo na tɛndɛ.