Baebele 8 - Nouveau Testament en Ngombe 1961

Yesu Nganga Monɛnɛ na Mokongo Moyene

¹ Cina engando jimi so bala edi bo, Iso bodi na Nganga Monɛnɛ o boa, yona odi a ebɔ ebami emongbelɛngɔ moKumu oDiko.

² Adi mokɔmɛli a tei eesika esɛnɔke, a tei eEtondo esoti yena epika Kumu, te moto.

³ Nganga basusu bahɛngɛmɛkɛ a bopa bipeeli na masiko. Oko boa yo koko abwani boda na eka a bopa.

⁴ Akɔki yo da ya nase, ka aditi nongo nganga, cina bo nganga badi ya baya bapaka bipeeli o adi ekɔmɛli eMobeko.

⁵ Elomu ekɔkɔ bo edi embete na elimo eesika esɛnɔke oho Diko; mojɔ bo yana akana Mose bopika Etondo, Njambe amoleha bo, Toma nganjama bo okɔe leka losusu oko na elimo yena eboloi ai wɛ a mono.

⁶ E dɛye ko, elomu esɔ Masiya enɔi yena ebu bou mɛnɛ, mojɔ bo adi mosili oMokongo mua monɔi mua moyou, cina bo modi na madikeja maya manɔi na bopele.

⁷ Isa mokongo moboso mobɔngɔ na soti, ka pokiso eiboloa a mojɔ momokongo moMibae.

⁸ Njambe anɛ mijɔ Mibu yana abala yo bo, Kumu abalaka bo, A masu mangɔngɔ, Mbi nadi bobakea mokongo moyene Na likota liYisalaele, na likota liYuda.

⁹ Te nongo o mokongo mobakea mbi na basangwa’bu, A busa bopea mbi bo na ebɔ Bo nabamanejae a Ejipito; Mojɔ bo, ibo baiyeyoa a mokongo mombi, Na mbi nababulɛ oko bobulɛ. Ebaeli eKumu edi boa.

¹⁰ Kumu abalaka bo, Mokongo mobakeabí mbi a masu mangɔngɔ Na likota liYisalaele modi oko mu; Mbi nasabí Mibeko mimbi a tei emiembo mibu; Namisɔnɔbí a milema mibu. Mbi nadabí Njambe obu, Na bo badabí bato bambi.

¹¹ Moto atabalabí koko na mina’nde Isa moto na mwangwa’nde bo, Jeba Kumu. Mojɔ bo bajebabí mbi kanga basusu mɛnɛ, Na bakɛkɛlɛkɛ na banɛnɛnɛ pongono.

¹² Mojɔ bo nadabí na wa a mojɔ momabunga mabu, Na nitalɛ koko jibe jibu.

¹³ Abalaka yo a mojɔ moMokongo moyene, anjaka mua moboso o eka yena editi koko na cina. Na isa eka editi koko na cina, na isa ebengi bogwa, edikai mweka pɛ bo edimoe na bosusu.