Baebele 7 - Nouveau Testament en Ngombe 1961

¹ Iyo Malekisedeke, kumu oSalema, adaka nganga oNjambe obonɔ. Asongana na Abalayama yana ahulaka yo a bowa bakumu a bila, na amojongoa.

² Abalayama amokaba libondo lidomi lileka losusu. Cina ekombe ende edi boso Kumu oBodongo; na adi koko Kumu oSalema; cina emina edi Kumu oBowi.

³ Apeliti sango isa nango, pɛpɛ koko mbota; masu mande pɛpɛ libangake, ehelo ende pɛpɛ suka; adi nganga na bosusu na elimo eMwana ’Njambe.

⁴ Lɛni moto omina monɛnɛ, mojɔ bo Abalayama amopa libondo lidomi lileka lopea yo a bila.

⁵ Bana baLewi baya badi a elomu enganga, badi na kpaci eMobeko bo basɛ libondo lidomi ai bato, oko ai bato babu bɛnɛ, nongo adi bo bana baAbalayama.

⁶ Iyo ko yona oditi na bu mbota, asɔ libondo lidomi ai Abalayama yona odaka na ndikeja, na amojongoa.

⁷ Mojɔ modi bohu mɛnɛ bo moto yona ojongoaka anɔi yona osɔkɔ bojongoa, pɛ kitɛ.

⁸ Ibaya basɔkɔ libondolidomi ya, badi oko bato babogwa; iyo ko adi mɔ, na tati edi a mojɔ momina.

⁹ Oko boa bobwani bobala bo Lewi yo mɛnɛ, yona osɔkɔ libondo lidomi, akaba libondo lidomi yana akɔ Abalayama boa,

¹⁰ mojɔ bo adaka oko a sɔpɔ jitata onde yana asongana yo na Malekisedeke.

¹¹ Isa bonganga boLewi bodi bobɔngeja bato soti, (mojɔ bo bato basɔ Mibeko cina ebonganga bomina) ebɔngi bo okina nganga otongo adoe mojɔ moye, te nongo na bonganga boAlona, oko na bonganga boMalekisedeke?

¹² Mojɔ bo bonganga boyene bodi na Mobeko moyene pongono.

¹³ Mijɔ mi Mibalama a mojɔ momoto olikota litongo, na pɛpɛ nongo moto olikota limina okɔ elomu ehtumbu.

¹⁴ Na mojɔ modi bohu mɛnɛ ho Kumu osu adaka olikota liYuda, na Mose ailanga nongo kombe elikota limina a mojɔ mobonganga.

¹⁵ Mojɔ momina monɔi na bohu a mojɔ monganga otongo yona odoa na elimo eMalekisedeke,

¹⁶ yona odi nganga na ngulu ebomɔ bua bodi na bosusu, te nongo na kpaci emokina mobeko a mojɔ mombota ende.

¹⁷ Mojɔ bo tati edi a mojɔ monde bo, Wɛ odi nganga na bosusu obonganga boMalekisedeke.

¹⁸ Ekina ekɔmɛli eyou ehɛngɛmɛ cina bo edaka e yɛmbu, na eibɔngɔ.

¹⁹ (Mojɔ bo Mobeko moibɔngeja eka). Na njingo etongo eboloi yena enɔi na bopele, na so bodi bobatama na Njambe oko na njingo emina.

²⁰ Mojɔ momina moitaka bɛli.

²¹ BaLewi bakwea a elomu enganga, pɛ bobɛlɛ nongo bɛli. Yesu ko adi nganga cina ebɛli ende yona obala na nde bo, Kumu abɛli bɛli, na aditi na ebaeli etongo. Wɛ odi nganga oko na bosusu.

²² A mojɔ momina, Yesu adi mokando moMokongo mua monɔi na bopele.

²³ Mojɔ motongo, nganga badaka banɛnɛ; baihɔnɔ boyeyoa, a mojɔ mobogwa.

²⁴ Iyo ko adi nganga oko na bosusu, cina bo yo mɛnɛ adi oko na bosusu.

²⁵ A mojɔ momina, yo abwani boheleja na bosusu mɛnɛ, baya badoaka al Njambe na njea ende, mojɔ bo yo adi mɔ oko na bosusu bo adae mosili a mojɔ mosu.

²⁶ Nganga monɛnɛ yona odi boa abwana na su soti, mosɛnɔke, pɛpɛ nongo lindo, pɛpɛ nongo litɔnɔ, mobɔtɔnɔke na babe, yona ongɔjɔmɔ a Diko yena enɔi.

²⁷ Iyo abwaniti bopa masiko tu busa, o akɔkɔ nganga batongo a mojɔ mojibe jibu bɛnɛ na jibato batongo pongono. Iyo akɔ boa ehole emɔci yena ebwani na bosusu, yana asapa yo mɛnɛ lisiko.

²⁸ Mobeko mohɛngɛkɛ bato a elomu enga-nga baya badi oko ba yɛmbu; ebaeli ebɛli ko, yena edoa ngɔngɔ jiMobeko, ehɛngɛkɛ Mwana yona odi mobɔngɔke oko na bosusu mɛnɛ.