Baebele 5 - Nouveau Testament en Ngombe 1961

¹ Bahɔkɔ Nganga Monɛnɛ bihole bisusu a tei ebato bo akwee bosiili a sibano ebato na Njambe, na bo apɛ bipeeli na masiko a mojɔ mojibe.

² Ajebi boda na molema mo yɛmbu ai bato baya badi na libumi, na baya badi balaboake, mojɔ bo yo abindani na bwɛmbu yo mɛnɛ.

³ A mojɔ momina, abwani bopa masiko, te a mojɔ mojibe jibato pɛ, oko a mojɔ mojibe jinde mɛnɛ pongono.

⁴ Moto atasabakea a ekumu emina yo mɛnɛ; Njambe amobeaka o akɔ yo na Alona.

⁵ Oko boa, Masiya aisabakea Nganga Monɛnɛ yo mɛnɛ. Okina amohɔ, oko yona obala na nde bo, Wɛ odi Mwana’mbi; Mbi naboti wɛ busa bu.

⁶ Na abalaka koko a esika etongo bo, Wɛ odi Nganga na bosusu mɛnɛ, Oko na bonganga boMalekisedeke.

⁷ Yesu, yana adaka yo ya nase, angaka, na angɔɔnɔkɔ na bopipo, na mbisoli pongono, ai yona obwana bomoheleja a bogwa. Na yo amoka cina elisuma linde ai Njambe.

⁸ Nongo adaka yo Mwana, akoa lisuma oko na minɔngɔ misɔ yo.

⁹ Na ama yo bɔngɔ a njea jisusu, ami da oko moboloja omohelo na bosusu ai bato basusu baya bamosumaka.

¹⁰ Na Njambe amobakea Nganga Monɛnɛ obo-nganga boMalekisedeke.

¹¹ Iso bobwani bobala na nu ngando jinɛnɛ a mojɔ momina; jidi ko na kpɔkɔsɔ a bocingea, mojɔ bo odini na bohoka mweka e dɛye.

¹² Ino obwanini boda bakoja ehole eyai; e dɛye ko otakakani moto no bɛnɛ a bokoja no koko mijɔ Miboso mɛnɛ miEbaeli eNjambe. Okindoini bato baya babwani na mabɛi, te nongo dia dimosuku.

¹³ Mojɔ bo, yona onungaka mabɛi alandoakini na mijɔ Mibodongo; adi oko mwana mokɛkɛlɛkɛ.

¹⁴ Dia lidi a mojɔ mobato bapingake, baya balandoi na ekɔmɛli ebokokeleja mijɔ, baya babwani bobɔteja bopele na bobe.