Baebele 2 - Nouveau Testament en Ngombe 1961

¹ A mojɔ momina, so bobwani bopea boku ngando jika so, na bopipo mɛnɛ, bo bosaka laboa bohali.

² Mojɔ bo, isa bwɛnji bua bodoa na babwɛnji-baDiko bodaka na kpaci, na baya balona na basopa mobeko basɔ mokindo mua mobwana,

³ esingaiti so; bokabulɛ boheleja bu bonɛnɛ, bodi bohela na ye? Kumu yo mɛnɛ abanga botɔndɔ mojɔ moboheleja bomina, na baya bamoka banga-meja mojɔ momina ai so.

⁴ Na Njambe aneja bo tati ebu edi soti, oko na bimbete, na mindumba, na mijɔ Mibokamoa, na bipeeli biMwembo, o ajima yo na bolulea bonde.

⁵ Iso bobalaka a mojɔ mongondo ebodoa; na Njambe aideja ngondo emina a kpaci ebabwɛnji-badiko.

⁶ Tati emoto a ekina esika edaka bo, Moto adi nda? Wɛ odi na bolɛ ai yo mojɔ moye? Mwana’moto adi nda? Omobaneaka mojɔ moye?

⁷ Omodeja a ngɔngɔ jibabwɛnji-baDiko ehole ekue. Omokumeja na ekumu na lisuma o likongo a molo monde. Omopa kpaci a ngando jikɔ wɛ na mɔmɔ mawɛ.

⁸ Odeja ngando jisusu a cina jibibota binde. Yana amopa yo kpaci a ngando jisusu, Njambe aikina nongo eka emɔci yena editi a kpaci ende. Endele ko, so bonɛkini ngando jisusu a cina ekpaci ende.

⁹ Bonɛkɛ Yesu ko, yona odejama ekina ehole a ngɔngɔ jihabwɛnji-baDiko; bomonɛkɛ yo yona okumejama na ekumu, na lisuma, o likongo a molo monde a mojɔ mobogwa bonɛ yo, bo adingoe na bogwa a mojɔ mobato basusu, oko na monganji moNjambe.

¹⁰ Mojɔ bo, yona oyoa leka losusu, na leka losusu lodi a mojɔ monde, adi oko yona opala bo akwejae bana banɛnɛ a ekumu, mobwana na nde soti bo abɔngejae yona ohoja njea ebu ebohela, oko na bodingoa.

¹¹ Mojɔ bo, yona osɛnojaka, na baya basɛnɔi badi na sango omɔci. A mojɔ momina yo aditi na Sɔni a bobabakea kombe bananango.

¹² Abala bo, Mbi nadi bojebeja banangwa’mbi kombe ewɛ; Nadi bosakoa wɛ a tei eDenga.

¹³ Abala koko bo, Mbi nadi bobakea molema mombi ai yo. Na Mbi yona, na bana bapani Njambe.

¹⁴ Oko boa, isa bana basangoaka mokuku na makia, yo mɛnɛ alwa elimo ebu, bo agbokejae yona odi na kpaci ebogwa, oko Satana mɛnɛ, a mojɔ mobogwa bonde,

¹⁵ na bo acingoe basusu baya badaka a libuli masu mabu masusu, a cina ebɔ bobogwa.

¹⁶ Mojɔ bo elomu ende editi a mojɔ mobabwɛnji-baDiko, oko a mojɔ mobana baAbalayama.

¹⁷ Oko boa ebɔngɔ na nde bo adae na bananango elimo emɔci, amɛci mɛnɛ, bo adae nganga monɛnɛ owa na ejimeli a elomu eNjambe, a bopa lisiko a mojɔ mojibe jibato.

¹⁸ Iyo adi na ngulu a bokɔmeja baya badi a tei ebomeka, mojɔ bo adingoa yo mɛnɛ yana amekama yo.