Bikɔmɛli 8 - Nouveau Testament en Ngombe 1961

Denga diYelusalema a tei eMinɔngɔ

¹ Bato baDenga diYelusalema babanga bonɛ monɔngɔ monɛnɛ a busa bomina, na banangana bo basusu a Yuda na Samalia. Badika a Yelusalema oko babwɛnji pɛ.

² Bato baejimeli bapusea Sɛtɛpano, na bamoyea eyeeli enɛnɛ.

³ Saula ko anɔngeja Denga. Akweaka a ndako na ndako, na apeaka bami na bali bo abasɛ ta blɔkɔ.

Pilipo a Samalia

⁴ Bato baya banangana batɔndɔ mwako a bisika bisusu.

⁵ Pilipo akɛ a ekina ngando eSamalia, na abatɔndɔ Mwako moMasiya.

⁶ Yana aka bo, na yana anɛ bo bimbete bikɔkɔ Pilipo, bahokea mijɔ mibalaka yo na molema momɔci.

⁷ Mojɔ bo bato banɛnɛ bahela a miembo mibe; miembo mibe mimana na bobekoa na bogboma; bandɔke na bamitɛngu bahela koko banɛnɛ.

⁸ Na sepi edaka enɛnɛ a ngando emina.

⁹ Okina momi adaka a ngando emina, kombe ende Simona. Iyo adaka nganga obole. Akamojaka bato baSamalia, na abajimeja bo adaka moto monɛnɛ.

¹⁰ Bato basusu bahokeaka moto omina, bato banɛnɛnɛ na bato bakɛkɛlɛkɛ pongono. Babala bo, Moto yo adi Ngulu eNjambe yena edi na kombe Enɛnɛ.

¹¹ Bamojimea, mojɔ bo abakamojaka ehole eyai na mijɔ mibole bonde.

¹² Yana ko ajima bo Mwako Mopele moBokumu boNjambe mua motɔndɔkɔ Pilipo, na mojɔ mokombe eYesu Masiya, babatisama, na bami na bali pongono.

¹³ Simona yo mɛnɛ ajima pongono, na abatisama. Aikina nongo Pilipo, na akamoa bou a mojɔ mobimbete na mindumba mikɔkɔ yo.

¹⁴ Yana aka babwɛnji a Yelusalema bo bato baSamalia basɔ Ebaeli eNjambe, babalomea Pɛtɛlo na Yoane.

¹⁵ Ibo bakɛ oho na ba’nga a mojɔ mobu, bo basɛ Mwembo Mosɛnɔke.

¹⁶ Mojɔ bo Mwembo Mosɛnɔke moipaka sopea ai bo. Bama batisama oko a kombe eKumu Yesu pɛ.

¹⁷ Babwɛnji bababakea mɔmɔ, na basɔ Mwembo Mosɛnɔke.

¹⁸ Yana anɛ Simona bo basɔ Mwembo Mosɛnɔke oko na bobakea bomɔmɔ mababwɛnji, yo apala bo abapɛ likonja.

¹⁹ Abala na bu bo, Pani mbi kpaci emina pongono, bo nakabakea mɔmɔ ai moto, asɛ Mwembo Mosɛnɔke.

²⁰ Pɛtɛlo amosɔmbeja bo, Yɛ likonja liwɛ ligwɛ, na wɛ mɛnɛ pongono,—wɛ yona odingaka bo odi bosomba epeeli eNjambe na likonja!

²¹ Wɛ opeliti nongo libondo limojɔ mu, pɛpɛ nongo mweka; mojɔ bo molema mowɛ moditi bojo a miso maNjambe.

²² Hekoja molema mowɛ a mojɔ mobobe bowɛ; ingɔɔnɔ Njambe, isa abwani bokina bobe bobolɛ bomolema mowɛ.

²³ Mojɔ bo mbi nanɛkɛ bo odi a njɔngɔ na boyo, na a mbɔci jibobe.

²⁴ Simona asɔmbeja bo, Ingɔɔnɔni Kumu a mojɔ mombi, bo nitanɛ nongo mijɔ mibali no.

²⁵ Ama bo tata tnojɔ moKumu, na ama bo tɔndɔ Mwako moKumu, ba’mi hula oko a Yelusalema, na bakatɔndɔe Mwako Mopele a ngando jinɛnɛ jiSamalia.

Moto oEtiopia

²⁶ Obwɛnji oKtunu abala na Pilipo bo, Angɔ; kɛ oho a sudo, a njea eYelusalema na Gaza, oko njea elisohe.

²⁷ Iyo angɔ, akɛ oho, na atana okina mosuku oEtiopia yona odaka na kpaci enɛnɛ a bokumu boKandake, kumu-mwali oEtiopia, na adaka mobanei olikonja linde lisusu.

²⁸ Iyo ama kɛ a Yelusalema a bosakoa Njambe, na adaka a njea elihule.

²⁹ Mwembo mobala na Pilipo bo, Kɛ acingame na lijangi dia.

³⁰ Pilipo apota ai moto omina, na amoka akalange mokanda momotɔndɔi Yisaya. Amohɔjɔ bo, Ocingeaka mojɔ molangaka wɛ?

³¹ Iyo amosɔmbeja bo, Moto amiti neja mbi njea nadi bocingea na ye? Abea Pilipo bo akonde a boda na nde.

³² Esika edaka yo akalange edaka oko ye, Bakɛ na nde o ekɔmɛli ebata bo bamowoe. Mwana-bata adi emimi a boso bomoto yona omolenaka ngungi; Iyo koko boa; aidipoa nongo monɔkɔ monde.

³³ Iyo asamboa, na bamolona esambi esoti Odi botɔndɔ mojɔ mombota ende nda? Mojɔ bo basukeja mohelo monde ya nase.

³⁴ Moto omina abala na Pilipo bo, Mbi nahɔjɔkɔ wɛ lihɔjɔ. Motɔndɔi abalaka a mojɔ monda? isa a mojɔ monde mɛnɛ, isa moto otongo?

³⁵ Pilipo adipoa monɔkɔ monde, atomba bosɔnɔ bomina, na abanga bomotɔndɔ Mwako Mopele moYesu.

³⁶ Akɛkɛ bo a njea emina, bamea a ekina ediba. Mosuku omina abala bo, Anja madiba! Mbi nabwaniti bobatisama?

³⁷ Pilipo abala bo, Isa ojimaka na molema mowɛ mosusu, obwani.

³⁸ Iyo apa monɔkɔ bo bamejae lijangi. Batitea a madiba ibo basusu babae, Pilipo na mosuku pongono, na Pilipo amobatisa.

³⁹ Aduboa bo a madiba, Mwembo moKumu motomba Pilipo, na mosuku omina aimonɛ koko. Iyo akɛ oko a njea ende na sepi.

⁴⁰ Pilipo ko adaka a Asoto; akanɔne a ngando na ngando a botɔndɔ Mwako Mopele, na amea boa a Kaisalia.