Bikɔmɛli 6 - Nouveau Testament en Ngombe 1961

Basuku baDenga Sanibo

¹ Etango ebacingami ehɛkɛ oko bohɛ a masu mamina. BaYuda ko baya babalaka kɔpi eBaEla badaka na manungunungu a mojɔ moBaEbele, cina bo bali babu babogwa baisɔkɔ libondo libipeeli busa na busa.

² Babwɛnji domi-na-babae babolea likita libacingami; babala na bu bo, Iso bobwaniti bokina mwako moNjambe botɔndɔ a bokɔ elomu emesa.

³ Baninga, dukani bami sambo a tei enu, bato bagala epele baya balumi na Mwembo Mosɛnɔke na bowɛi, bo bobapɛ elomu emina.

⁴ Iso ko bodi bosahɛngɛ oko a mojɔ mobo’nga na elomu eMwako Mopele.

⁵ Bato basusu bajima mojɔ momina; na bahɔ Sɛtɛpano, moto oejimeli yona oluma na Mwembo Mosɛnɔke. Bahɔ koko Pilipo na Pulokɔlɔ, Nikanola na Timona, Palamena na Nikola, mocingami oAntiokia.

⁶ Babameja a boso bobabwɛnji, baya ba’nga Njambe, na babakea mɔmɔ ai bo.

Sɛtɛpano

⁷ Mwako moNjambe monangana. Etango ebacingami ehɛ bou mɛnɛ a Yelusalema, na nganga banɛnɛ bahekoa a ejimeli emina na lisuma.

⁸ Sɛtɛpano aluma na ngulu na monganji, na akɔkɔ bimbete na mindumba a tei ebato.

⁹ Bakina bato ko babanga boboma kitɛ na Sɛtɛpano, oko bato basinagoge eBikomba, na BaKulene, na BaKilikia, na BaAsia.

¹⁰ Ibo ko bagboka na bowɛi bonde, mojɔ bo yo abalaka oko na Mwembo.

¹¹ A mojɔ momina, bajimeja bakina bato na poloso bo babale bo, Iso bomo’ki yana abali yo bikenge bibosambolu a mojɔ moMose na a mojɔ moNjambe.

¹² Oko boa bakeja bato kɛlɛ, na basuku na basɔni pongono. Ibo badoa, bamopea, na bakɛ na nde a esambi.

¹³ Bameja batati babokosea baya babala bo, Moto yoyo t’akinake bobala mijɔ mibosambolu a mojɔ moesika ye esɛnɔke, na Mibeko pongono.

¹⁴ Iso bomo’ki yana abali yo bo Yesu, yona oNasaleta, adi bobuka esika ye, na bobeja mijɔ misɔ so ai Mose.

¹⁵ Bato basusu baya badaka a esambi banjaka Sɛtɛpano linjenje, na banɛ boso bonde o boso boobwɛnji oDiko.