Bikɔmɛli 4 - Nouveau Testament en Ngombe 1961

Bapea Babwɛnji

¹ Nganga, na mosuku otempelo, na Basadoki, bamea oko yana abalaka Pɛtɛlo na Yoane na bato.

² Ibo badaka na kɛlɛ, cina bo babwɛnji bakojaka bato, na batɔndɔkɔ mojɔ mobongɔ boYesu a bogwa.

³ Babapea na baba’sa ta blɔkɔ, bo bambe ehuma, mojɔ bo busa boma dipa.

⁴ Bato banɛnɛ ko baya baka mwako momina bajima. Etango ebami edaka isa koto jitano na dea.

⁵ Yana ahoa busa, babolea likita libakumu, na basuku bangando, na basɔni, a Yelusalema.

⁶ Ana, mosuku onganga adaka ena, na Kayapa, na Yoane, na Alesandele, na bato basusu badenga dimosuku onganga.

⁷ Bameja Pɛtɛlo na Yoane a boso bobu, na babahɔjɔ bo, Ino okɔini mojɔ mu na nguliu enda, na a kombe enda?

⁸ Pɛtɛlo aluma oko na Mwembo Mosɛnɔke, na abala na bu bo, Ino bakumu bangando na basuku,

⁹ opalakani bokokeleja so busa bu a mojɔ moelomu epele eboheleja moto yo a yogo, oko moto mondɔke.

¹⁰ Toma cingeani no basusu, na bato basusu baYisalaele pongono, bo moto yoyo adi a boso bonu edɛye na mokuku mopele, oko a mojɔ mokombe eYesu Masiya oNasaleta, oko yona owa no a mole-mobokea; Njambe ko amongɔjɔ a bogwa.

¹¹ Iyo adi litai lilona no bayoi, na lidi edɛye litai limogbukusu.

¹² Pɛpɛ nongo okina otongo odi boheleja; mojɔ bo botahela nongo na ekina kombe etongo a tei ebato ya nase, oko kombe emina pɛ.

¹³ Ibo bakamoa oko bokamoa yana anɛ bo bogale boPɛtɛlo na Yoane; mojɔ bo bajebaka bo badi oko bato baelomu pɛ, pɛpɛ nongo ejebeli enɛnɛ emikanda. A mojɔ momina bacingea bo bama cingama oko na Yesu.

¹⁴ Na anɛkɛ bo moto yona oma hela a yogo a boso bobu, baisɔmbeja nongo ekenge.

¹⁵ Oko boa babatɔndɔ bo bamane a likita, bo babalane mojɔ momina.

¹⁶ Babala bo, Êkɔ so na bato bamina ndeni? Bato basusu baYelusalema bajebaka bo bakɔi mondumba monɛnɛ, na so bɛnɛ bobwaniti bongana mojɔ momina.

¹⁷ Bopele bo bobakanee, na bobalembe bo batabala koko na moto a kombe emina, mojɔ mosaka hɛ a tei ebato.

¹⁸ Oko boa, bababea na baba-lemba na bopipo bo batabala, na batakoja koko a kombe eYesu.

¹⁹ Pɛtɛlo na Yoane ko babasɔmbeja bo, A boso boNjambe, iso bobwani bohokea nda, isa Njambe, isa no? Sambejani no bɛnɛ.

²⁰ Mojɔ bo so botahɔnɔkɔ boda bogo a mojɔ mongando jinɛ so na jika so.

²¹ Babakanea koko na babacingoa; bato basusu basakoaka Njambe a mojɔ momondumba momina; oko boa baihɔnɔ bokɔ na bu nongo mojɔ, oko a mojɔ mobato bangando.

²² Mojɔ bo momi omina yona ohela a yogo adaka na bianga domi-inɛi na dea.

²³ Ama bo cingoama, ba’mi kɛ oko ai bina’bu, na babatɔndɔ mijɔ misusu mibala nganga na basuku.

²⁴ Yana aka bo, basakoa Njambe na molema momɔci bo, Kumu oDiko na oNase, wɛ oyoa Diko na Nase, na madiba-mamukwa, na leka losusu lua lodi a bisika bimina.

²⁵ Na obala na Mwembo Mosɛnɔke oko na monɔkɔ motata osu Dawidi, mokɔmɛli owɛ; obala bo, Makota madi na ejoki, Na bato bangando badumbaka ndungu jingasa mojɔ moye?

²⁶ Bakumu bangondo badi na mosɛlingo mobila, Na bakonji batitani, A bona na Kumu na Masiya onde.

²⁷ Soti mɛnɛ, batitana a ngando ye a bona na Yesu Mwana owɛ mosɛnɔke yona ohɛngɛ wɛ,—oko Elode, na Pontio Pilato, na bato bamakota matongo, na bato baYisalaele pongono.

²⁸ Oko boa bangameja ngando jisusu jikana wɛ eyou na ngulu na bowɛi bowɛ.

²⁹ Edɛye Kumu, ika rnijɔ mikaneaka bo. Pa bakɔmɛli bawɛ bogale bonɛnɛ bo botɔndɔe mwako mowɛ.

³⁰ Ninoja ebɔ ewɛ a bosengoa, na a bokɔ bimbete na mindumba a kombe eYesu Mwana owɛ mosɛnɔke.

³¹ Aseja bo bo’nga, ndako edaka bo baboli ekumana oko bokumana. Ibo basusu baluma na Mwembo Mosɛnɔke, na batɔndɔ Mwako moNjambe na bogale.

³² Bato basusu baya bajima, kanga banɛnɛ mɛnɛ, badaka na molema momɔci na mwembo momɔci. Pɛpɛ nongo moto obala bo leka londe lodaka ai yo mɛnɛ; bakabana leka losusu.

³³ Babwɛnji batɔndɔ mwako mobongɔ boYesu a bogwa na kpaci enɛnɛ, na monganji moNjambe monɛnɛ modaka na bu.

³⁴ Pɛpɛ nongo moto obu odaka na taka, cina bo baya badaka na gbie isa ndako, bajingɛjɛ, badoa na likonja lileka longɛjɛ bo,

³⁵ na balisambea a bibota bibabwɛnji. Oko boa moto na moto asɔ libondo lia libwana na taka ende.

³⁶ Okina MoLewi pongono, kombe ende Yosepa, (Babwɛnji bamobakea kombe etongo Balanaba. Cina ekombe emina edi Mwana oEleho,) moto oKupulio,

³⁷ angɛjɛ gbie ende, adoa na likonja limina, na alisambea a bibota bibabwɛnji.