Bikɔmɛli 26 - Nouveau Testament en Ngombe 1961

Paulo na Agulipa

¹ Agulipa abala na Paulo bo, Obwani botata tati ewɛ edɛye. Paulo animoja ebɔ, na atata na bikenge bi.

² Kumu Agulipa, mbi nadi na sepi busa bu, bo nasalongejae a boso bowɛ a ngando jisusu jibalaka BaYuda a mojɔ mombi.

³ Wɛ olandoa na bikɔmɛli na mijɔ miBaYuda. Oko boa nangɔɔnɔkɔ wɛ bo otangwa bohokea mbi.

⁴ BaYuda basusu bajebaka moda mombi, donga oko a bwɛngɛ bombi, a likota limbi mɛnɛ, na a Yelusalema.

⁵ Bakajima bo babale, bajeba eyou bo mbi nadaka moto oBaPalusi, baya banɔi na bingi a mojɔ moMibeko misu.

⁶ Mbi nadi ya edɛye a esambi a mojɔ monjingo esako ekinea Njambe batata basu.

⁷ Mbota jisu domi-na-jibae bakɔmɛkɛ Njambe na bulu na moi, oko na njingo bo basangoe sako emina. Ee kumu, BaYuda badi na mbi mojɔ oko na cina enjingo emina.

⁸ Okina onu abwaniti bojima bo Njambe angɔjɔkɔ bagwake mojɔ moye?

⁹ Mbi mɛnɛ najima ehele bo nakɔe mijɔ minɛnɛ oko na lisoki a kombe eYesu oNasaleta.

¹⁰ Nakɔ boa a Yelusalema. Nasa bato baMasiya banɛnɛ a blɔkɔ, oko na kpaci ebasuku banganga. Na yana abawa bo, mbi najima mojɔ momina pongono.

¹¹ Nabadingoja bihole binɛnɛ a sinagoge jisusu; nakenga koko na bopipo bo basambojae Njambe na bibaeli bibu. Nabanɔngeja oko a ngando jitongo bohali, cina ekɛlɛ embi enɛnɛ ai bo.

¹² Oko boa nakɛ a Damaseke na kpaci ebasuku banganga, oko a mojɔ momina.

¹³ Ee kumu ombi, yana adaka mbi a njea a ehole emidi, nanɛ bohu bonɛnɛ boDiko bua bonɔ modika-busa na bolailai. Bongɛngɛ a mɔngɔ mambi masusu, na bato baya badalaka na mbi a njea.

¹⁴ Iso basusu bokwa a kpɔtɔ, na mbi naka monɔkɔ mokabale na mbi a LiEbele bo, Saula, Saula, onɔngejaka mbi mojɔ moye? Okalakimea na mosongo ôbena.

¹⁵ Mbi nasɔmbeja bo, Kumu, wɛ nda? Kumu abala bo, Mbi nadi Yesu, na wɛ onɔngejaka oko mbi.

¹⁶ Angɔ ko; ima mema. Mbi nadoi ai wɛ, bo nahɔe wɛ mokɔmɛli na motati ongando jini wɛ na jîneja mbi wɛ ngɔngɔ.

¹⁷ Mbi nâheleja wɛ ai bato bawɛ na ai bapakano, na nalomaka wɛ oko ai ho

¹⁸ a bodipoa miso mabu, bo badonge a modidi, a bomana a bohu, bo bakine ngulu eSatana a bodoa ai Njambe, a bosɔ boyɛ bojibe jibu cina eejimeli ai mbi, na a bosɔ lisango a tei ebasɛnɔke.

¹⁹ Oko boa, kumu Agulipa, mbi nailona bosuma mojɔ moDiko monɛ mbi.

²⁰ Natɔndɔ bato baDamaseke, na a Yelusalema, na a makota masusu maYuda, na natɔndɔ koko bapakano bo bajase dosa na bahekoe ai Njambe, na bo bangamejae bohekoa hobu oko na bikɔmɛli bipele.

²¹ BaYuda bapea mbi a tempelo, na bameka boweja mbi oko a mojɔ momina.

²² Njambe ko akɔmeja mbi masu masusu oko a busa bu; na nami ya a botondɔ bato bakɛkɛ na bato banɛnɛnɛ ngando jibala Mose na batɔndɔi bo jidi bokwa ngɔngɔ, pɛpɛ mojɔ motongo;

²³ oko bo Masiya abwani bodingoa, bo angɔe boso a tei ebagwake, na bo atɔndɔe mwako mobohu ai bato basu na a makota matongo.

²⁴ Abalaka yo boa bo asalongejae, Peseto abekoa bo, Paulo, odi na lilale! Mijɔ minɛnɛ mikoa wɛ milabojaka wɛ oko bolaboja.

²⁵ Paulo asɔmbeja bo, Peseto oekumu enɛnɛ; mbi naditi nongo na lilale. Mijɔ mibalaka mbi midi soti mɛnɛ, te nongo ebalabala.

²⁶ Kumu Agulipa ajebaka ngando jimina, na mbi nabalaka na nde a bohu. Ngando jimina jiikɔmɔ a libombi na mbi nalɛkɛ bo ajebaka jisusu.

²⁷ Kumu Agulipa, ojimaka batɔndɔi? Mbi najebaka bo ojimaka.

²⁸ Agulipa abala na Paulo bo, Edikai mweka pɛ bo ohekojae mbi moto oMasiya!

²⁹ Paulo asɔmbeja bo, Mbi nangaka Njambe bo, isa edɛye isa ngɔngɔ, bato basusu baya bakaka mbi busa bu badae o adi mbi, na wɛ mɛnɛ pongono,—te na minyɔlɔ mi ko!

³⁰ Kumu Agulipa angɔ, na gouverneur na Bɛlɛnike pongono, na baya badaka na bu a esika emina, na bamana

³¹ Ibo babalana bo, Moto omina aikɔ nongo mojɔ mua mobwani na mokindo mobogwa isa na blɔkɔ.

³² Na Agulipa abala na Peseto bo, Eipeta da bo apalaka asambe na Kaisala, ka moto omina abwani bocingoama.