Bikɔmɛli 25 - Nouveau Testament en Ngombe 1961

Peseto Asambeja Paulo

¹ Peseto, abanga yo elomu ende, ayeyoa a Kaisalia oko masu masato pɛ, na akɛ a Yelusalema.

² Basuku banganga na basuku baBaYuda bamojebeja mojɔ moPaulo.

³ Bamoleha na bamongɔɔnɔ bo abakɔe monganji mu—oko bo alome ndɔsɔ ePaulo bo adoe a Yelusalema, mojɔ bo basɛlingoa bo bamosee a njea bo bamowoe.

⁴ Peseto ko asɔmbeja bo Paulo adi bodika a blɔkɔ a Kaisalia, na bo yo mɛnɛ adi bosɔmbɔ oho bokpa.

⁵ Abala koko bo, Bopele bo bakina basuku banu bakɛe na mbi oho, bo bamejae mojɔ momoto omina, isa adi na mojɔ soti.

⁶ Ayeyoa na bu masu bomwambe isa domi a tei ebu, na asɔmbɔ koko a Kaisalia. Aboa busa, ada a mongbɛlɛngɔ moesambi, na aloma ndɔsɔ ePaulo.

⁷ Yana adoa yo, BaYuda baya badonga a Yelusalema bamohika na balanga mijɔ minde mibe minɛnɛ. Endele ko, baibwana bongameja mijɔ mimina.

⁸ Paulo abala bo asalongejae; abala bo, Mbi naisopa nongo mobeko moBaYuda, isa motempelo, isa moKaisala.

⁹ Peseto ko apala bo asepejae BaYuda, na ahɔjɔ Paulo bo, Opalaka bokɛ a Yelusalema a bosamba na mbi a mojɔ mongando jimina?

¹⁰ Paulo asɔmbeja bo, Mbi nami a boso bomongbɛlɛngɔ moesambi eKaisala; nabwani bosamba oko ya. Ojebaka na bopele mɛnɛ bo mbi naikɔ nongo bobe ai BaYuda.

¹¹ Isa nadi moto mobe, isa nakɔ mokina mojɔ mua mobwani na mokindo mobogwa, nitalona bogwa. Na isa ngando jibalaka bo a mojɔ mombi jidi oko bokosea pɛ, pɛpɛ nongo moto odi na kpaci a bopa mbi a mɔmɔ mabu. Mbi napalaka nasambe na Kaisala mɛnɛ.

¹² Peseto abala mojɔ momina na likita libajuji, na asɔmbeja Paulo bo, Opalaka bosamba na Kaisala; odi bokɛ oko ai Kaisala.

Agulipa a Kaisalia

¹³ Anɔ makina masu, kumu Agulipa na Bɛlɛnike bamea a Kaisalia a bobɛjɛ Peseto njɛbɛ.

¹⁴ Bayeyoa ena makina masu, na Peseto atɔndɔ kumu mojɔ moPaulo. Abala bo, Pelike akina momi omɔci ya a blɔkɔ.

¹⁵ Yana adaka mbi a Yelusalema, basuku banganga na basuku baBaYuda bameja mojɔ monde, na bapala bo namodumbe.

¹⁶ Mbi nabasɔmbeja bo BaLoma te badumbake moto oko yo apeta kini yɛyɛ bato baya bamokambaka, bo abwani bosalongeja a mijɔ mibalaka bo.

¹⁷ Oko boa bahula na mbi ya, na mbi naimba nongo ekoka. Yana ahoa busa, nada a mongbɛlɛngɔ moesambi, na naloma ndɔsɔ emoto omina.

¹⁸ Bakambi bande bama, na baimeja nongo mijɔ mibe milɛkɛ mbi.

¹⁹ Baboma na nde oko kitɛ a mojɔ moejimeli ebu, na a mojɔ mookina moto kombe ende Yesu yona ogwa; Paulo ko abala bo adi oko mɔ.

²⁰ Adaka mbi na mokakwano a bokokeleja ngando jimina, namohɔjɔ isa apalaka akɛe a bosamba a mojɔ mongando jimina oho.

²¹ Paulo ko angɔɔnɔ bo mojɔ monde mokɛe a esambi eKaisala. Oko boa mbi napa monɔkɔ bo bamobanee ya, bo namolome ai Kaisala.

²² Agulipa abala na Peseto bo, Mbi nadi na posa bo nake moto omina mbi mɛnɛ. Peseto asɔmbeja bo, Odi bomoka puma.

²³ Yana ahoa busa, Agulipa na Bɛlɛnike badoa na ekumu enɛnɛ, na bakwea a ndako eesambi na bakapitɛni, na basuku bangando pongono. Peseto apa monɔkɔ bo badoe na Paulo.

²⁴ Peseto abala bo, Kumu Agulipa, na no bami basusu baya batitani na su ya, anjani moto yo. BaYuda banɛnɛ bangɔɔnɔ mbi a mojɔ monde, oho Yelusalema na ya pongono, na bahekoa bo ebɔngiti bo ahele.

²⁵ Mbi ko nanɛ bo aikɔ nongo mojɔ mua mobwani na mokindo mobogwa. Iyo mɛnɛ ko apala bo akɛe ai Kaisala, na mbi najima bo namolome.

²⁶ Endele ko, naditi na mojɔ mosoti a bosɔnea kumu ombi. Oko boa namobei ya a boso bonu, na boso bowɛ kumu Agulipa, na njingo bo bokamokokeleja, bodae na mokina mojɔ a bosɔnɔ.

²⁷ Mojɔ bo, nalɛkɛ bo bokaloma moto oblɔkɔ ngasa, pɛ botɔndɔ mojɔ monde, etabɔngɔ nongo mweka.