Bikɔmɛli 24 - Nouveau Testament en Ngombe 1961

Pelike Asambeja Paulo

¹ Iyana anɔ masu matano, Anania, mosuku onganga, amea na bakina basuku bangando, na okina nganga oMibeko pongono, kombe ende Teletulo. Ibo batɔndɔ gouverneur mojɔ moPaulo.

² Yana abea bo Paulo, Teletulo abanga bobala mojɔ monde bo, Pelike, wɛ kumu yona onɔi na bopele, iso bosepaka cina ebowi bonɛnɛ bua bodi a tei esu a mojɔ mowɛ. Wɛ obaneaka likota lisu, na libɔngi oko a mojɔ mowɛ;

³ na so bodi na sepi enɛnɛ a mojɔ momina.

⁴ Nitapalaka bo nanɔngejae wɛ; endele ko, nangɔɔnkɔ wɛ bɔ oke bikina bikenge bisu oko na monganji monɛnɛ.

⁵ Iso bonɛkɛ bo moto yoyo apukejaka bato bou mɛnɛ. Alindaka BaYuda a ngondo esusu oko a bona pɛ. Adi koko mosuku obu baya badi na kombe BaNasaleta.

⁶ Iyo ameka bobeja tempelo pongono na so bomopea. Mokano mosu modaka bo bomosambejae cina eMibeko misu;

⁷ Lusia ko, kapitɛni obasoda, adoa na amohwa ta mɔmɔ masu na hopipo mɛnɛ.

⁸ Na apa monɔkɔ bo baya badi na nde mojɔ badoe ai wɛ mɛnɛ. Okamokokeleja odi boka wɛ mɛnɛ mijɔ minɛnɛ mimoto omina mia mibalaka so.

⁹ Bayuda batongo badaka na monɔkɔ momina momɔci, na bajima bo modi boa.

¹⁰ Gouverneur angɔjɔ ebɔ bo Paulo abale. Paulo asɔmbeja bo, Ajebaka mbi bo wɛ odi juji olikota di bianga bmɛnɛ, nadi na sepi a bobala bo nasalongejae.

¹¹ Okakokeleja, odi bojeba bo mbi nadoa a Yelusalema a bosakoa, masu monɔi oko domi-na-mabae pɛ.

¹² Baitana bo nasoa na moto mosoo, isa bo nalindaka bato a bona, nongo a tempelo, isa a sinagoge, isa a ngando.

¹³ Na babwaniti bongameja nongo ngando jibalaka bo a mojɔ mombi.

¹⁴ Mbi najimaka a boso bowɛ bo nasakoaka Njambe obasangwa’su oko na njea ebeaka bo Bobɔtɔ. Najimaka mijɔ misusu mia misɔnɔmɔ a Mibeko, na a mikanda mibatɔndɔi.

¹⁵ Njingo embi ai Njambe edi oko njingo ebu, bo bapele na babe badi bongɔ a bogwa.

¹⁶ A mojɔ momina, mbi nakɔkɔ na bingi bihole bisusu bo molema mombi motada na mojɔ, isa a boso boNjambe, isa a boso bobato.

¹⁷ Ama mbi yeyoa bohali bianga binɛnɛ, nami doa oko a bokɔ bato balikota limbi monganji, na a bopa bipeeli.

¹⁸ Bakina BaYuda ko baAsia batana mbi a tempelo, pɛpɛ nongo ekina ekia, pɛpɛ koko embamba ebato isa mogbomegbome.

¹⁹ Isa bato bamina badi na mbi mokina mojɔ, babwani boma ya a boso bowɛ a bobala mojɔ momina.

²⁰ Pɛ mojɔ, kina bato baya badi jɔno bajebejae wɛ isa badumba mbi na mokina mojɔ mobe yana asamba mbi a likita libasuku.

²¹ Isa modi oko mu, bo mbi nama, na nabekoa a tei ebu bo, Mbi nasambaka busa bu a mojɔ mobongɔ bobagwake.

²² Pelike ajebaka na bopele mɛnɛ mojɔ moejimeli emina. Oko boa yo asɔmbeja Paulo; abala bo, Kapitɛni Lusia akadoa, nadi bolena mojɔ mowɛ.

²³ Apa salajon monɔkɔ bo abanee Paulo bopele, na amokɔ mokina monganji, na ajima bo bato bande bamokɔmejae.

²⁴ Yana anɔ makina masu, Pelike adoa na mwali onde Dulusila yona odaka MoYuda, na alomeja Paulo. Aka mwako motɔndɔ yo a mojɔ moejimeli ai Masiya Yesu.

²⁵ Yana alehaka yo a mojɔ mobodongo na bosangbindea na esambi ebodoa, Pelike adaka na bɔ. Abala na Paulo bo, Peta kɛ edɛye; ekina ndɔndɔ, nakaboloja njea, nadi bobea wɛ.

²⁶ Adaka koko na njingo bo Paulo amopɛ likonja. Oko boa amolomejaka mandɛli-mandɛli bo babalane.

²⁷ Bianga bibae bisia boa, na Pelukio Peseto asangoa na Pelike. Na Pelike akina Paulo oko a blɔkɔ, cina bo apalaka bo adae na gala epele a tei eBaYuda.