Bikɔmɛli 22 - Nouveau Testament en Ngombe 1961

¹ Baninga na basangwa ’mbi, hokeani bikenge bimbi bo nasalongejae a boso bonu.

² Yana aka bato bo abalaka na bu na monɔkɔ moBaEbele, badaka kanga bogo mɛnɛ. Iyo abala bo,

³ Mbi nadi MoYuda; nabotama a Talusia oho Kihkia. Babɔkɔni ko a ngando yeye; nakoa Mibeko mibatata na bopipo mɛnɛ a bibota biGamliele. Nadaka na bingi enɛnɛ ai Njambe o adi no basusu busa bu.

⁴ Mbi nanɔngeja bato baNjea ye; napea bami na bali, na naba’sa ta blɔkɔ bo bagwɛ.

⁵ Mosuku onganga, na basuku basusu bangando, babwani botɔndɔ bo mojɔ momina modi soti. Ibo bapani mikanda ai bato baDamaseke, bo nakɛe oho a bopea bato, a bohula na bu a mbɔci a Yelusalema a mojɔ mobosamba.

⁶ Adalaka mbi a njea, nabenga Damaseke, na bokina bohu bonɛnɛ bohojani bundumo boa, bua bodonga oho Diko.

⁷ Mbi nakwa oko a kpɔtɔ, na naka kɔpi ekabale na mbi bo, Saula, Saula, onɔngejaka mbi mojɔ moye?

⁸ Mbi nasɔmbeja bo, Kumu, wɛ nda? Na yo abala na mbi bo, Mbi nadi Yesu oNasaleta na wɛ onɔngejaka oko mbi.

⁹ Bato baya bapakaka mbi banɛ bohu bomina soti; baika ko kɔpi ende yona obalaka na mbi.

¹⁰ Oko boa mbi nabala bo, Kumu, êkɔ mbi ndeni? Na Kumu abala na mbi bo, Angɔ, kɛ oho a Damaseke, na odi boka oho mojɔ moelomu esusu yena ehɛngɛmɛ ai wɛ bo okɔe.

¹¹ Miso mambi ko magwa a mojɔ mobolailai bobohu bomina; baya bapakaka mbi bapeani ebɔ, na namea a Damaseke boa.

¹² Okina momi, kombe ende Anania, adoa ai mbi. Iyo adaka na lisuma linɛnɛ a Mibeko, na adaka na gala epele a tei eBaYuda bangando emina.

¹³ Iyo ama a dɔngɔ dimbi, abala na mbi bo, Moninga Saula, asɔ koko njɛnɛ ewɛ. Bokpa mɛnɛ, mbi nasɔ njɛnɛ embi, na namonɛ na miso.

¹⁴ Iyo abala na mbi bo, Njambe obasangwa’su ahɔi wɛ bo ojebe mokano monde, bo onɛe Yona oBodongo, na bo oke ekenge emonɔkɔ monde.

¹⁵ Mojɔ bo, wɛ odi boda motati onde ai bato basusu, a botɔndɔ ngando jisusu jini wɛ na jiki wɛ.

¹⁶ Embaka wɛ edɛye ndeni? Angɔ, batisama, na sɛnoa a jibe jiwɛ, na ingɔɔnɔ a kombe eKumu.

¹⁷ Ahula mbi a Yelusalema, natɔ njɔti yana angaka mbi a tempelo.

¹⁸ Nanɛ Kumu; na yo abala na mbi bo, Donga ya a Yelusalema bokpa, mojɔ bo batajima mwako motɔndɔkɔ wɛ a mojɔ mombi.

¹⁹ Mbi nasɔmbeja bo, Kumu, bajebaka bo bɛnɛ bo mbi natueja bato, na nasa bato a blɔkɔ baya bajimea wɛ a sinagoge jisusu.

²⁰ Yana asopa bo makia mamotati owɛ Sɛtɛpano, mbi nadaka ena pongono; mbi mɛnɛ najima mojɔ momina, na nabanea bisenja bibato baya bamowa.

²¹ Na Kumu abala na mbi bo, Kɛ; mbi nadi boloma wɛ bohali ai bapakano.

²² Bato bahokea Paulo. Yana abala yo ko ekenge emina, babekoa bo, Dongeja moto omina a ngondo! Abɔngiti bohela!

²³ Abekoa bo boa, bahwa bisenja bibu na bamɛsɛ mopunji a diko.

²⁴ Kapitɛni apa monɔkɔ bo bakwejae Paulo a ndako ebasoda, na bamotue a bojeba cina emojɔ mobalaka bato a mojɔ monde.

²⁵ Bakanda Paulo na kamba, na yo abala nasalajon yona odaka ena bo, Odini na kpaci a botua MoLoma pimbo, pɛ bopeta mosambeja?

²⁶ Aka yo ekenge emina, salajon akɛ ajebejae kapitɛni bo, Okanaka bokɔ bo? Moto omina adi MoLoma.

²⁷ Kapitɛni adoa, abala na Paulo bo, Tɔndɔ mbi; wɛ odi MoLoma?

²⁸ Paulo ajima, Ee. Kapitɛni abala bo, Mbi nasomba bosɔmi bombi na likonja linɛnɛ. Paulo amosɔmbeja bo, Mbi ko nabotama oko sɔmi.

²⁹ A mojɔ momina, baya badaka na mosɛlingo bo batue Paulo bamokina bokpa. Kapitɛni pongono, yana acingea yo bo Paulo adi MoLoma, adaka na bɔ, mojɔ bo ama mokanda yo mbɔci.

³⁰ Yana ahoa busa, yo apala bo ajebe cina emojɔ mobalaka BaYuda a mojɔ moPaulo, na acingoa Paulo. Abolea likita libasuku na nganga, akɛ na Paulo, na amomeja a boso bobu.