Bikɔmɛli 19 - Nouveau Testament en Ngombe 1961

Paulo a Ɛpɛsɔ

¹ Yana adaka Apolo a Kolinto, Paulo asieja mɔngɔ monde a molaba moAsia na amea a Ɛpɛsɔ.

² Atana bakina bacingami a ngando emina, na abahɔjɔ bo, Yana ajima no, osɔni Mwembo Mosɛnɔke? Bamosɔmbeja bo, Ngasa, iso boipaka ka bo Mwembo Mosɛnɔke modi.

³ Iyo abala na bu bo, Obatisamani na batisimo enda? Bamosɔmbeja bo, Oko batisimo eYoane.

⁴ Paulo abala bo, Yoane abatisa na batisimo a mojɔ mobohekoja bomolema, na atɔndɔ bato bo bajimee yona odi bodoa ngɔngɔ jinde, oko Yesu.

⁵ Aka bo mojɔ momina, babatisama a kombe eKumu Yesu.

⁶ Na yana abakea Paulo mɔmɔ mande ai bo, Mwembo Mosɛnɔke motita ai bo, babanga bobala na kɔpi jitongo, na bapa biseko.

⁷ Badaka bato domi-na-babae.

⁸ Paulo akwea a sinagoge na abala na eci. Atɔndɔ mwako moBokumu boNjambe songe basato, na ameka bojimeja baya bamohokeaka.

⁹ Bakina babu badaka na kitɛ enɛnɛ, na melo mipipo, na bapɔmbeja Njea eKumu a boso bobato. Oko boa yo abakina, abea bacingami, na akoja busa na busa a ndako ekalasi eTulano.

¹⁰ Akɔ boa bianga bisusu bibae, na bato basusu baAsia baka mwako moKumu, na BaYuda na BaEla pongono.

¹¹ Njambe akɔ mindumba mibokamoa na mɔmɔ maPaulo.

¹² A mojɔ momina, bato babɛnjɛ mokuku monde na matambala na bisenja, na yana abakea bo leka lomina ai bato babego, bahela a bego bibu, na miembo mibe mimana ai bo pongono.

¹³ Bakina BaYuda ko, bakɛndɛli, badaka nganga jiketa. Ibo bameka bomeja miembo mibe ai bato a kombe eKumu Yesu. Babala bo, Mbi nabekeaka wɛ a kombe eYesu yona otɔndɔkɔ Paulo.

¹⁴ Badaka boa bami sambo, bana baMoyuda kombe ende Sekewa, mosuku onganga.

¹⁵ Mwembo mobe ko mobasɔmbeja bo, Najebaka Yesu, nambeteaka Paulo, ino ko banda?

¹⁶ Na momi yona odaka na mwembo mobe abapea, abadumba, abatua; babena pola, na bacia a ndako emina oko mbundu.

¹⁷ BaYuda basusu, na BaEla basusu, baya badaka a Ɛpɛsɔ baka mojɔ momina, na badaka na bɔ. Na gala ekombe eYesu ehɛ oko bohɛ.

¹⁸ Bato banɛnɛ baya bajima badoa, na batɔndɔ ngando jibe jima bo kɔ.

¹⁹ Na bato banɛnɛ baya bakɔkɔ elomu edemba badoa na mikanda mibu, na bamitumba a boso bobato. Bobuno bomikanda mimina bodaka pata koto domi-itano.

²⁰ Oko boa Ebaeli eKumu enangana na ngulu na ndangasa.

Wokowoko a Ɛpɛsɔ

²¹ Yana asia ngando jimina, Paulo akana a molema bo akɛe a Yelusalema a njea eMakedonia na Akaya. Abala bo, Nâpeta kɛ oho na ngɔngɔ nadi bokɛ a Loma pongono.

²² Aloma bakɔmeja bande babae a Makedonia, oko Timoteo na Elaseto, na ayeyoa koko mweka a Asia.

²³ A ehole emina ko, mokina mojɔ monɛnɛ mokwa a cina eejimeli ai Kumu.

²⁴ Okina nganga oliboma, kombe ende Demetulio, aluaka bilimo bitempelo eDiana na palata. Basali bande badihaka likonja linɛnɛ a mojɔ moelomu emina.

²⁵ Iyo abolea bato bamina, na basali batongo pongono baya bakɔkɔ elomu emina. Abala na bu bo, Ino bami, ojebakani bo likonja lisu licingi na elomu ye.

²⁶ Edɛye ko onɛkɛni na okakani bo yo Paulo alɛngi na alabojai bato banɛnɛ, iya a Ɛpɛsɔ, na a bisika bitongo biAsia pongono. Iyo akojaka bo banjambe baluaka bato na mɔmɔ baditi banjambe basoti.

²⁷ A mojɔ momina, elomu esu edi bobeha; te elomu esu pɛ; tempelo enjambe monɛnɛ Diana edi bodika ngasa. Bato bamosakoaka a Asia esusu, na a ngondo esusu, na ekumu ende edi bosamboa oko bosamboa.

²⁸ Bikenge bimina bibakeja kɛlɛ enɛnɛ, na babekoa bo, Diana oBaƐpɛsɔ adi monɛnɛ!

²⁹ Ngando esusu ejoka na wokowoko. Bapea Gayo na Alisitaluko, pakali jiPaulo, bato baMakedonia, na bato basusu bakɛ mbango a libanda limakou.

³⁰ Paulo apala bo amane a boso bobato, bacingami ko baijima.

³¹ Bakina bina’nde batongo, basuku baAsia, bamolomea monɔkɔ, na bamongɔɔnɔ bo atakɛ a libanda limakou.

³² Bakina bato babekoa mojɔ momɔci, bakma oko mojɔ motongo. Emumu esusu edaka oko na wokowoko pɛ, na bato banɛnɛ baijeba nongo cina etitana bo.

³³ BaYuda balinda Alesandele, na bakina bamomeja a boso bobato. Alesandele ahɛhɛ ebɔ ende na akenga bobala.

³⁴ Yana anɛ bato bo adi MoYuda, bahɛjɛ daka enɛnɛ mɛnɛ, na babekoa na monɔkɔ momɔci heures jibae bo, Diana oBaƐpɛsɔ adi monɛnɛ!

³⁵ Mosɔni ongando ko agɔmbeja emumu, na abala bo, lno bami baƐpɛsɔ, bato basusu bajebaka bo ngando eƐpɛsɔ edi mobanei otempelo eDiana na elimo ende yena ehula diko.

³⁶ Mojɔ momina modi soti, pɛ kitɛ. Oko boa toma dani bogo; t’okɔeni oko mojɔ na kɛnjɔ.

³⁷ Odoini na bato bamina jɔnɔ, na babejaiti nongo tempelo, na batasɛkɛkɛ nongo njambe osu.

³⁸ Oko boa, isa Demetulio na basali bande badi na moto mojɔ, esambi edi ya na bajuji pongono, na babwani bosambeja mojɔ moto na moto.

³⁹ Isa odini na mokina mojɔ motongo, babwani bolena mojɔ momina a likita lingando.

⁴⁰ Soti mɛnɛ, iso bobwani bonɛ mojɔ cina ewokowoko ye busa bu. Mojɔ bo emumu ye etitani ya ngasa, pɛpɛ nongo cina esoti.

⁴¹ Abala yo boa, ayaneja bato oko boyaneja.