Bikɔmɛli 13 - Nouveau Testament en Ngombe 1961

Mɔngɔ moBalanaba na Saula

¹ Bakina batɔndɔi na bakoja badaka a Denga diAntiokia; Balanaba na Simeona Nigela; Lukio, moto oKulene, na Manae (bamobɔkɔ na kumu Elode a bwɛngɛ bobu) na Saula.

² Yana akɔmɛkɛ bo Kumu na bosakoa na bokia bodia, Mwembo Mosɛnɔke mobala bo, Hɛngɛni ai mbi Balanaba na Saula a mojɔ moelomu ebahɔi mbi.

³ Oko boa yana akia bo koko, na yana anga bo, bababakea mɔmɔ na babaloma.

Kupulio

⁴ Mwembo Mosɛnɔke mobaloma boa na bakɛ a Sɛlukia. Batamba a masua a esika emina, na bakɛ a Kupulio.

⁵ Asɛmɛ bo a Salami, batɔndɔ Mwako moNjambe a sinagoge jiBaYuda. Yoane abakɔmeja koko.

⁶ Badala a mosanga mosusu, bamea a Papo, na batana okina nganga obole a ngando emina. Iyo adaka MoYuda, motɔndɔi obokosea, kombe ende Balayesu.

⁷ Adaka a esika egouverneur, Selugio Paulo, moto obowɛi. Iyo Selugio Paulo alomeja Balanaba na Saula, mojɔ bo adaka na posa bo ake Mwako moNjambe.

⁸ Iyo Elima ko, nganga obole, (cina ekombe ende oko yena) abalona na bopipo, na ameka bopangoa gouverneur bo atajima.

⁹ Saula (kombe ende etongo Paulo) aluma na Mwembo Mosɛnɔke, amonja linjenje lipipo,

¹⁰ abala na nde bo, Wɛ moto oepulu na bokosea; wɛ mwana ’Satana yona odi na mijɔ misusu mibodongo oko soki, otakina bongulumeja njea jitangboake jiKumu?

¹¹ Ika, ebɔ eKumu edi a diko diwɛ edɛye; miso mawɛ madi bogwa, na ôtanɛ nongo modika-busa ekina ehole. A ehole emina, lidudu lihindo limohua, na yo acimacima a boduka moto bo amolɔndɔe na ebɔ.

¹² Iyo gouverneur, yana anɛ yo mojɔ momina, ajima oko bojima; adaka oko na bokamoa a mojɔ mobokoja boKumu.

Antiokia ePisidia

¹³ Paulo na bina’nde batamba a masua a Papo, na bakɛ a Pelege a likota liPampulia. Yoane abakina a esika emina, na asɔmbɔ a Yelusalema.

¹⁴ Badonga a Pelege, na bamea a Antiokia a likota liPisidia. Bakwea a sinagoge a busa boSabata na bada.

¹⁵ Asieja bo bolanga Mibeko na mokanda mobatɔndɔi, basuku basinagoge baba-lomea monɔkɔ bo, Baninga, isa odini na ekina eleho a mojɔ mobato, balani.

¹⁶ Oko boa Paulo angɔ, ahɛhɛ ebɔ ende na abala bo, Ino bami baYisalaele, na no baya basumaka Njambe, hokeani.

¹⁷ Njambe oBaYisalaele ahɔ batata basu; akɔ bo bato basu badae bato banɛnɛ yana adaka bo a Ejipito, na abameja a ngondo emina na ebɔ epipo.

¹⁸ Ababanea a lisobe bianga domi-inɛi.

¹⁹ Agbokeja makota sambo a Kanana, na abapa ngondo ebu o lisango.

²⁰ Yana anɔ bianga mikama minɛi na domi-itano, abapa sambi, oko a ehole emotɔndɔi Samwele.

²¹ Ibo ko bapala bo badae na kumu, na Njambe abapa Saula, mwana ’Kisi, moto ombota eBenyamina. Iyo adaka kumu bianga domi-inɛi.

²² Njambe amodongeja, na abakea Dawidi bo adae kumu obu. Njambe abala a mojɔ moDawidi bo, Mbi nabolojai Dawidi mwana ’Yisai; molema mombi mosepaka na nde; yo âkɔ ngando jisusu jipalaka mbi.

²³ Njambe angɔjɔ Moheleja a mojɔ moYisalaele, oko Yesu ombota eDawidi, o ama yo kina sako.

²⁴ Adaka yo pɛ bopeta doa ko, Yoane atɔndɔ Bato baYisalaele mwako mobobatisa cina ebohekoja bomilema.

²⁵ Yoane yo mɛnɛ, yana ameaka yo a suka eelomu ende, abajebeja bo, Mbi naditi yona olɛkɛ no. Ikani ko, yo akɛkɛ adoe ngɔngɔ jimbi, na mbi nitabɔngɔ bo nacingoe sapata jinde.

²⁶ Baninga, bana baAbalayama, na no basusu baya basumaka Njambe, mwako mu mobohela molomami oko ai no.

²⁷ Mojɔ bo, bato baYelusalema na bakumu babu baimombetea, na baicingea mijɔ mibala batɔndɔi mia milangaka bo masu masusu maSabata; na yana amodumba bo, bangameja mijɔ mimina.

²⁸ Nongo adaka bo pɛ bonɛ mojɔ na nde mua mobwana na mokindo mobogwa, ba ngɔɔnɔ Pilato bo amowejae.

²⁹ Oko boa, yana angameja bo mijɔ misusu mia misɔnɔmɔ a mojɔ monde, bamotiteja a mole na bamosa ta esɛmɔ.

³⁰ Njambe ko amongɔjɔ a bogwa.

³¹ Na asaneja masu manɛnɛ ai bato baya badonga na nde a Galile, na badoa na nde a Yelusalema; ibo badi edɛye batati bande ai bato.

³² Oko boa so bodoi ai no na Mwako Mopele bo, sako esɔ batata basu ai Njambe,

³³ yo angameja sako emina ai so bana babu yana angɔjɔ yo Yesu. Mojɔ momina mosɔnɔmɔ koko a yembo ebibae bo, Wɛ odi Mwana ’mbi; naboti wɛ busa bu.

³⁴ Na abala koko a mojɔ mobongɔ bonde a bogwa, bo atasɔmbɔ koko a bopɔ; abala bo, Mbi nâpa wɛ majongoa masɛnɔke masoti maDawidi.

³⁵ A mojɔ momina, abalaka a yembo etongo bo, Ôtakina yona owɛ mosɛnɔke bo apɔe.

³⁶ Dawidi apɔ; mojɔ bo ama yo kɔmɛ mbota ende o akana Njambe, ami hwɛ oko bohwɛ, na bamopusea a dɔngɔ dibasangwa’nde.

³⁷ Iyona ongɔjɔ Njambe ko aipɔ nongo.

³⁸ Oko boa baninga, toma jebani bo bwɛnji boboyɛ bojibe bodi ai no oko a mojɔ moto omina.

³⁹ A tei ende, moto na moto yona ojimaka acingoami a ngando jisusu, mojɔ bo Mibeko miMose miditi na ngulu a bocingoa no a ngando jimina.

⁴⁰ A mojɔ momina, toma nganjamani bo mojɔ mobala batɔndɔi mosaka ngama na nu, bo;

⁴¹ Ikani, no bato babosɛtɔ; kamoani na dimoani; Mojɔ bo mbi nadi bokɔ mokina mojɔ a masu manu; Moto akajebeja no mojɔ momina, otajimani.

⁴² Yana amana bo, bato babangɔɔnɔ bo batɔndɔe koko mwako momina a busa boSabata botongo.

⁴³ Na yana anangana likita, bakina BaYuda banɛnɛ, na bato banɛnɛ baya bama hekoa a ejimeli eBaYuda, bacingama na Paulo na Balanaba. Ibo babala na bu, na babaleha bo bayeyoe a monganji moNjambe.

⁴⁴ Edika mweka pɛ bo bato basusu bangando batitana a busa boSabata bongɔngɔ a boka mwako moNjambe.

⁴⁵ BaYuda ko, yana anɛ bo emumu enɛnɛ ebato, badaka na likaka linɛnɛ. Bakpɛngɔlɔ bibaeli biPaulo bo biditi soti, na bamololea.

⁴⁶ Paulo na Balanaba ko babala na bu na eci bo, Ebɔngi bo so bopete tɔndɔ no mwako moNjambe soti; edɛye ko, olonini mwako momina, na ojimakani no bɛnɛ bo obɔngitini bosɔ bomɔ bua bodi na bosusu; oko boa so bodi bohekoa ai bapakano.

⁴⁷ Mojɔ bo mobeko moKumu ai so modi bo, Mbi nahɛngɛ wɛ bo odae bohu bomakota, Bo suka engondo mɛnɛ esɛ boheleja oko na wɛ.

⁴⁸ Bapakano basepa yana aka bo mojɔ momina, na bakumeja Ebaeli eKumu. Na basusu bajima baya bama hɔmɔ a mojɔ mobomɔ bua bodi oko na bosusu.

⁴⁹ Na Ebaeli eKumu enangana a likota dia lisusu.

⁵⁰ BaYuda ko bapangoa bali baejimeli, bali baesako epele, na basuku bangando pongono, na bakeja bato kɛlɛ, bo banɔngejae Paulo na Balanaba, na bababengana a ngando ebu.

⁵¹ Ibo bahakoa dutu dibibota bibu a boso bobu, na bakɛ a Ikonia.

⁵² Na bacingami baluma na sepi na Mwembo Mosɛnɔke.