Bikɔmɛli 12 - Nouveau Testament en Ngombe 1961

Bogwa boYakobo

¹ Kumu Elode abanga bonɔngeja bakina bato baDenga a ehole emina.

² Awa Yakobo, mwanange ’Yoane na mopamba.

³ Na yana anɛ yo bo BaYuda basepaka na mojɔ momina, apea koko Pɛtɛlo, oko a masu maMilɛmbɛ mia mipeliti lipetu.

⁴ Apea yo Pɛtɛlo, amo’sa ta blɔkɔ na ahɛngɛ basoda domi-na-basamano bo bamosɛnjɛle, bato banɛi banɛi. Mokano monde modaka bo amomejae a boso bobato ngɔngɔ jiKola-eBonɔ.

⁵ Oko boa babanea Pɛtɛlo a blɔkɔ. Bato baDenga ko bangɔɔnɔ Njambe na bingi a mojɔ monde.

⁶ Yana akanaka Elode bo amejae Pɛtɛlo a boso bobato ehuma, Pɛtɛlo adaka ahwɛli na bniu bomina a tei ebasoda babae. Bama kanda yo na minyɔlɔ mibae, na basinjili badaka a boso bomodipe a bosɛnjɛlɛ blɔkɔ.

⁷ Obwɛnji oKumu ko adoa, na bohu bohoja kasho ende; aboma Pɛtɛlo a panje bo amosisojae, na abala bo, Angɔ bokpa! Na minyɔlɔ mia midaka a makalo mande midonga.

⁸ Obwɛnji abala na nde bo, Kanda kamba ewɛ, lwa sapata jiwɛ. Akɔ yo boa, obwɛnji abala na nde bo, Lwa kasaka ewɛ na susa mbi.

⁹ Iyo amana na amosusa, pɛ ko bojeba isa mojɔ mokɔkɔ obwɛnji modi soti; alɛkɛ oko bo ati njɔti.

¹⁰ Banɔ sinjili oboso na yona obabae, na bamea a modipe monɛnɛ moebende mua moyɛyɛkɛ ngando. Modipe momina modipoama oko bodipoama boa. Bamana sokolu, badala a licilinga na obwɛnji amokina bokpa.

¹¹ Yana abanga Pɛtɛlo bocingea mojɔ, abala bo, Najebaka na soti edɛye bo Kumu alomi obwɛnji onde bo ahelejae mbi a ebɔ eElode, na a mijɔ misusu mikanaka BaYuda.

¹² Ama yo lɛ mojɔ momina, ami ko kɛ oko a ndako eMalia nange ’Yoane, yona odaka na kombe etongo Malako. Bato banɛnɛ badaka baboli ena, na bangaka.

¹³ Pɛtɛlo aboma monɔkɔ mondako, na okina moseka, kombe ende Loda, adoa a bodipoa.

¹⁴ Iyo ko, yana ambetea yo monɔkɔ moPɛtɛlo, aidipoa nongo modipe; apota na sepi enɛnɛ a tei endako, na atɔndɔ bato bo Pɛtɛlo adaka ami a monɔkɔ mondako.

¹⁵ Ibo babala na nde bo, Odi na lilale! Iyo ko abala na bopipo mɛnɛ bo mojɔ modi soti. Ibo babala bo, Edi obwɛnji onde.

¹⁶ Pɛtɛlo ko aikina boboma, na yana adipoa bo, bamonɛ na bakamoa bou mɛnɛ.

¹⁷ Pɛtɛlo ahɛhɛ ebɔ bo badae bogo, na abatɔndɔ mojɔ mosusu, bo Kumu amomaneja a blɔkɔ. Abala koko bo, Jebejani Yakobo na baninga mojɔ mu. Oko boa adonga ena, na akɛ a esika etongo.

¹⁸ Ahoa busa, basoda badaka na mokakwano monɛnɛ a mojɔ moPɛtɛlo.

¹⁹ Elode amoduka, pɛ ko bomoboloja. Akokeleja basinjili, na abekea bo babawoe. Ngɔngɔ jimina, adonga a Yuda, na akɛ a Kaisalia a boyeyoa oho.

²⁰ Elode adaka na bato baTula na Sidona mojɔ monɛnɛ. Ibo ko bambɛjɛ molema moBalasito mosuku ondako ekumu, na badoa ai Elode na molema momɔci a bobakea mokongo na nde, mojɔ bo mia mangando jibu mahulaka a makota makumu.

²¹ Oko boa Elode alwa molilo monde mokumu bokina busa, ada a ngɛndɛ, na abapa eleho.

²² Na bato babekoa bo, Monɔkɔ moNjambe, te nongo monɔkɔ momoto!

²³ Obwɛnji oKumu ko amoboma bokpa, mojɔ bo yo aikumeja Njambe; mboa bamoyaka na agwa.

²⁴ Ebaeli eNjambe ko enangana, na ehɛ oko bohɛ.

²⁵ Balanaba na Saula, asieja bo elomu ebu, bahula a Yelusalema; na Yoane, yona odaka na kombe etongo Malako, abapaka a njea.