Bikɔmɛli 11 - Nouveau Testament en Ngombe 1961

Petɛlo Asɔmbɔ a Yelusalema

¹ Babwɛnji na bacingami a likota liYuda baka bo bapakano basɔ Ebaeli eNjambe.

² Oko boa, yana asɔmbɔ Pɛtɛlo a Yelusalema, bato balibondo libolena-ganda basoa na nde.

³ Babala na nde bo, Wɛ okwea a ndako jibapakano na oyaka na bu mojɔ moye?

⁴ Pɛtɛlo abala na bu, na abacingea mojɔ mosusu.

⁵ Abala bo, Adaka mbi a bonga a ngando kombe Yopa, natɔ njɔti na nanɛ mojɔ mu. Ekina eka ehula Diko, o ekɔmɛli eesenja enɛnɛ yena epeama a matoka masusu manɛi, na emea oko ai mbi.

⁶ Nalongotoana eka emina bo naesisoe, na nanɛ tito bangondo, tito baesika, tito babolanda, na mbulu badiko.

⁷ Naka koko kɔpi ekabale na mbi bo, Pɛtɛlo, angɔ! iwa na yaka.

⁸ Mbi ko nabala bo, Kumu, pɛpɛ nongo mweka, mojɔ bo mbi nayakakini eka ebe isa eka ebokia.

⁹ Kɔpi ko ehula koko Diko bo, Isa Njambe asɛnojai eka, wɛ obwaniti boenyamoa.

¹⁰ Modaka boa bihole bisato, na leka losusu losɔmbɔ oho Diko.

¹¹ Oko a ehole emina, bami basato baya bama donga a Kaisalia na bwɛnji ai mbi, ba’mi mea oko a ndako edaka mbi.

¹² Mwembo motɔndɔ mbi bo nakɛe na bu, pɛ bokakwana nongo. Baninga ba basamano bapaka mbi a njea pongono, na bomea a ndako emoto omina.

¹³ Iyo atɔndɔ mbi bo anɛ obwɛnji oDiko a ndako ende yona obala na nde bo, Loma ndɔsɔ eSimona, kombe ende etongo Pɛtɛlo; adi a Yopa.

¹⁴ Iyo adi botɔndɔ wɛ mwako mobobeleja, wɛ mɛnɛ na bato bawɛ basusu.

¹⁵ Na abenga mbi bobala na bu, Mwembo Mosɛnɔke mokwa ai bo, o ama mo kwa ai so a bobanga.

¹⁶ A ehole emina, mbi nalɛ ekenge ema bala Kumu bo, Yoane abatisa a madiba; ino ko ôbatisamani a Mwembo Mosɛnɔke.

¹⁷ Oko boa, isa Njambe abapi epeeli epa yo so, yana ajimea so Kumu Yesu Masiya, mbi nabwani bomolemba?

¹⁸ Yana aka bo mojɔ momina, bayɛyɔ oko boyɛyɔ. Bakumeja Njambe na babala bo, Njambe ajimi bo bapakano pongono bahekojae milema bo basɛ bomɔ.

Denga diAntiokia

¹⁹ Bato baya banangana a mojɔ momonɔngɔ mua mobanga na Sɛtɛpano, bakɛ a Poinike na Kupulio na Antiokia, na batɔndɔ Mwako Mopele oko ai BaYuda pɛ.

²⁰ Bakina babu ko, bami baKupulio na Kulene, yana amea bo a Antiokia, babala na BaEla pongono, na babatɔndɔ Mwako Mopele moKumu Yesu.

²¹ Ebɔ eKumu edaka na bu; bato banɛnɛ bajima na bahekoa ai Kumu.

²² Bato baDenga diYelusalema baka mojɔ momina, na baloma Balanaba a Antiokia.

²³ Amea yo oho, na anɛ yo monganji moNjambe, asepa a mojɔ momina. Iyo aleha bo basusu bo basabekee, na bo bacingame na Yesu na lingbangba.

²⁴ Balanaba adaka moto mopele; aluma na Mwembo Mosɛnɔke, na ejimeli; na bato banɛnɛ mɛnɛ bacingama na Kumu.

²⁵ A mojɔ momina, Balanaba akɛ ndɔsɔ eSaula oho Talusia.

²⁶ Yana amoboloja yo, ahula na nde a Antiokia. Batitana na Denga, na bakoja bato banɛnɛ yanga esusu. Bato babanga bobakea bacingami kombe BaKlisto oko a Antiokia.

²⁷ Bakina batɔndɔi badonga a Yelusalema, na bamea a Antiokia a masu mamina.

²⁸ Okina obu angɔ, kombe ende Agabo; na yo apa eseko oko na Mwembo bo linjaele linɛnɛ likɛkɛ adoe a ngondo esusu. Mojɔ momina mokwa ngɔngɔ, a masu makumu Kulaudio.

²⁹ A mojɔ momina, bacingami bajima bo balome toma a bokɔmeja baninga baya badaka a Yuda, moto na moto o abwana yo bokɔ.

³⁰ Bakɔ boa, na baeloma ai basuku baDenga oko na Balanaba na Saula.