2 Yoane 1 - Nouveau Testament en Ngombe 1961

¹ Mbi mosuku oDenga ai Kilia mwali mohɔmɔke na ai bana bawɛ. Mbi napalaka no na soti, na te mbi pɛ, oko basusu batongo baya bajebaka mojɔ mosoti,

² cina eSoti yena edi a tei esu, na edi boda na su oko na bosusu.

³ Monganji na wa na bowi jida na su; jikahule al Njambe Sango na ai Yesu Masiya, Mwana ’Sango, a tei eSoti na ngɛnjɔ.

⁴ Mbi nadaka na sepi enɛnɛ yana atana mbi bakina bana bawɛ bakadale a njea esoti, o ama so sɔ mobeko ai Sango.

⁵ Na mojɔ mongaka mbi wɛ e dɛye Kilia, modi bo bodae na epaeli, moto ai mina’nde moto. Nitasɔneaka wɛ mobeko moyene; modi oko mobeko mosɔ so a bobanga mɛnɛ.

⁶ Ngɛnjɔ edi oko ye, bo bosume Mibeko minde. Mobeko modi oko mu, bo osuseni njea engɛnjɔ, o aka no a bobanga.

⁷ Mojɔ bo bakosei banɛnɛ banangani a ngondo, baya batajimaka bo Yesu Masiya adoa o moto. Yona odi boa adi mokosei, na adi soki-eMasiya.

⁸ Toma nganjamani bo otabungejaeni ndese eelomu enu, na bo osɛni ndese enu esusu.

⁹ Moto yona okinaka njea, pɛ boyeyoa a bokoja boMasiya, aditi na Njambe a tei ende. Yona oyeyoaka a bokoja boMasiya, adi na Sango na Mwana pongono a tei ende.

¹⁰ Moto akadoa ai no yona oditi na bokoja bomina, pɛ bomosɔni a ndako, pɛ bomobɛjɛni njɛbɛ;

¹¹ mojɔ bo, yona omo-bɛjɛkɛ njɛbɛ akatani na nde a bilomu binde bibe.

¹² Nadi na ngando jinɛnɛ a bosɔnea no; napaliti ko bo najisɔne a mokanda, mojɔ bo nadi na njingo bo nadoe a bo’nɛnɛ na nu, na a bobala na nu na monɔkɔ mɛnɛ. Sepi esu edi bobɔngɔ boa.

¹³ Bana bamwangwao mohɔmɔke babɛjɛkɛ wɛ njɛbɛ.