2 Bakolinto 9 - Nouveau Testament en Ngombe 1961

¹ Ebɔngiti bo nasɔnee no mokanda a mojɔ mobipeeli ai bato baMasiya,

² mojɔ bo najebaka bingi enu. Nasakoaka no ai bato baMakedonia a mojɔ momina. Nabatɔndɔkɔ bo mosɛlingo moAkaya mobwana yanga yena enɔ; na bingi enu esisoja bato babu banɛnɛ.

³ Nalomaka baninga ko bo onejaeni bo mbi naisakoa no ngasa, na bo odaeni na mosɛlingo o ami mbi bala.

⁴ Bato baMakedonia bakadoa na mbi, na bakatana no pɛpɛ nongo mosɛlingo, so bodi bosamboa cina eejimeli esu ai no, na no bɛnɛ pongono.

⁵ A mojɔ momina, mbi nalɛi bo nabwani bosueja baninga boso ai no. Oko boa badi bokolea bipeeli bidikeja no, Obwanini bopa bipeeli bimina na likabo mɛnɛ, te nongo na ekɔmɛli etako.

⁶ Pɛ bobosani mojɔ mumu; moto aka’na dona na lima, atabuka ndongo jinɛnɛ, na moto yona onaka dona na likabo, adi bobuka ndongo jinɛnɛ.

⁷ Moto abwani bopa epeeli ekani yo a molema monde, te nongo na misuba, isa na lima, mojɔ bo Njambe apalaka bo moto apɛ epeeli ende na sepi.

⁸ Na Njambe abwani bojongoa no na majongoa manɛnɛ mɛnɛ, bo otatakani nongo eka, na bo odaeni na libondo linɛnɛ a mojɔ mobilomu bisusu bipele.

⁹ Mosɔnɔmɔ bo, Akabi na monganji; api bipeeli ai babokwali. Bodongo bonde bodi boyeyoa oko na bosusu.

¹⁰ Iyo, yona opaka moswa ’gbie ngua a bona, na molɛmbɛ a boyaka, adi bopa no ngua na likabo linɛnɛ mɛnɛ; na adi bohɛjɛ mbuma jinu jibodongo.

¹¹ Oko boa, ôjongoamani na majongoa masusu bo odaeni na likabo linɛnɛ ai bato batongo, na so bokapa bipeeli bimina ai bato batongo, badi bosakoa Njambe a mojɔ momina.

¹² Mojɔ bo, suka eelomu ye ebokɔmeja editi a bokɔmeja baMasiya a taka ebu pɛ; ekɔkɔ bo bato banɛnɛ basakoaka Njambe bou mɛnɛ.

¹³ Baku-mejaka Njambe a mojɔ mohsuma linu, na ejimeli enu, a Mwako Mopele moMasiya, na monganji mobipeeli binu ai bo bɛnɛ na ai bato basusu, yana anɛkɛ bo elomu ye ebokɔmeja.

¹⁴ Bangaka Njambe a mojɔ monu, na badi na bolɛ ai no bou mɛnɛ, a mojɔ momonganji monɛnɛ mokɔ Njambe no.

¹⁵ Yɛni bosakoe Njambe a mojɔ moepeeli ende yena enɔi kɔpi emoto.