2 Bakolinto 8 - Nouveau Testament en Ngombe 1961

Bileho a Mojɔ moBipeeli

¹ Baninga, bodi bojebeja no edɛye mojɔ momonganji mokɔ Njambe O a Menga maMakedonia.

² Bamekama na monɔngɔ monɛnɛ, na badaka na bokwali bonɛnɛ; sepi ebu ko ehɛ oko hohɛ, na badaka na likabo linɛnɛ mɛnɛ.

³ Mbi natɔndɔkɔ na soti bo mwɛngi mobipeeli bibu mobwana na mwɛngi molikonja libu; ee, likonja libu liibwana na mwɛngi mobipeeli bipa bo na milema mibu misusu.

⁴ Bangɔɔnɔ so na bopipo mɛnɛ bo bobapɛ njea ebokɔmeja bato baNjambe na bipeeli.

⁵ Na bakɔ boa, te nongo a njea edaka so na njingo; basapa bo bɛnɛ boso ai Kumu o epeeli, na ngɔngɔ ai so, oko na bolulea boNjambe.

⁶ A mojɔ momina, so bobei Tito bo asiejae elomu ye emonganji a tei enu, o ama yo banga bokɔ.

⁷ Odini na bingi a ngando jisusu, na ejimeli, na bɛtɛ ebobala, na ejebeli, na lingbangba, na epaeli enu ai so; oko boa toma dani na bingi a elomu ye emonganji pongono.

⁸ Nitadumbaka nongo mobeko. Nangɛkɛ oko epaeli enu na bingi ebato batongo, isa edi epaeli esoti.

⁹ Ojebakani monganji moKumu osu Yesu Masiya; nongo adaka yo konji, akindoa moto obokwali a mojɔ monu, bo bokwali bonde bopɛ no makonja manɛnɛ.

¹⁰ Mbi nalehaka no oko boleha; bopele bo osejaeni mojɔ mokana no yanga yena enɔ, mojɔ mobanga no bokɔ.

¹¹ Kinani bingi enu ebokɔ mojɔ momina ebwane na posa yena edaka na nu ebokɔ, oko na mwɛngi molikonja linu.

¹² Isa moto adi na posa ebopa epeeli, abwani bopa libondo lilikonja lipeli yo; isa apeliti likonja abwaniti bopa.

¹³ Nitabalaka boa a bohɛjɛ muna monu, na bokamoa muna mobato batongo, oko a bobwaneja mojɔ mosusu.

¹⁴ Adi no na likonja linɛnɛ edɛye, obwanini bosieja taka ebu. Oko boa, likonja libu likahɛ, na ino okadani na taka, badi bokɔmeja no. Oko boa ôdani amɛci.

¹⁵ Mosɔnɔmɔ boa bo, Iyona ondoa leka lonɛnɛ aidika na eka; Iyona ondoa oko mweka pɛ, aitaka.

¹⁶ Mbi nasakoaka Njambe mojɔ bo yo alumeja molema moTito na bolɛ ai no, o adi mbi mɛnɛ.

¹⁷ Ajimi mojɔ mongɔɔni mbi yo; yo mɛnɛ ko adaka na posa bo akɛe oho ai no, na adi bodoa na bingi enɛnɛ.

¹⁸ Bolomaka na nde, mwangwa’su yona odi na esakoli epele a Menga masusu a mojɔ moetɔndɛli ende eMwako Mopele.

¹⁹ Mojɔ motongo koko—Menga mamohɔ bo adale na mbi a elomu ye emonganji, yena ekɔkɔ so na bingi enɛnɛ a bokumeja Kumu.

²⁰ Bokɔkɔ boa, bo moto asaka da na mokakwano a mojɔ molikonja linɛnɛ lia lidi na su a bokaba.

²¹ Bomekaka bo ngando jikɔkɔ so jibɔnge, te a miso maKumu pɛ, oko a miso mabato pongono.

²² Bomeka bingi emwangwa’su bou mɛnɛ bihole binɛnɛ; na bingi ende ehɛi oko bohɛ cina eepaeli ende ai no. A mojɔ momina bomo-lomaka na bu batongo.

²³ A mojɔ moTito—yo adi mopakali ombi, na acingami na mbi a elomu enu; a mojɔ mobaninga basu, badi babwɛnji baMenga, badi ekumu eMasiya.

²⁴ Oko boa nejani bato bamina epaeli enu, bo Menga manɛe epaeli emina pongono; nejani bo so botasakoaka no ngasa.