2 Bakolinto 6 - Nouveau Testament en Ngombe 1961

Lingbangba na Ejimeli ePaulo

¹ Akɔkɔ so elomu na Njambe yo mɛnɛ, bongɔɔnɔkɔ no bo otasɔni monganji moNjambe esɔ’sɔ.

² Mojɔ bo yo abalaka bo, Mbi nahokea wɛ a ehole yena ebwana; Nakɔmeja wɛ a busa bobohela. Hokeani! ehole yena ebwani edi oko edɛye. Busa bobohela bodi oko edɛye.

³ Iso bokɔkɔ bo botasakeja nongo moto libaku, bo elomu esu esaka samboa.

⁴ Adi so bakɔmɛli baNjambe, bokɔkɔ ngando jisusu bo bodae na esako epele. Bodi na lingbangba linɛnɛ a tei eminɔngɔ, na taka, na jɔɔlɔ,

⁵ na nji, na blɔkɔ, na bigbomegbome, na bilomu, na taka ehiɔ, na nja,

⁶ na ekɔmɛli epele, na ejebeli esoti, na eci, na monganji, na Mwembo Mosɛnɔke, na epaeli mɛnɛ,

⁷ na ebaeli esoti, na ngulu eNjambe, na molilo mobila mobodongo a ebɔ ebami na a ebɔ ebali,

⁸ na ekumu, na bosamboa, na bosakoa, na biloli. Adi so na mwako mosoti, babalaka bo bodi bato babokosea.

⁹ Bodi na esako epele, bato ko pɛ bojeba so. Bodi o bagwake, endele ko bodi oko mɔ; asɔkɔ so nji, pɛ ko bogwa.

¹⁰ Adi so na molɔbɔ, bosepaka bihole bisusu. Adi so bɛnɛ bato babokwali, bohɛjɛkɛ likonja libato batongo. Bodi boangasa; endele ko, leka losusu lodi oko ai so.

Eleho ePaulo ai BaKolinto

¹¹ Bobalaka na nu BaKolinto na bohu mɛnɛ. Milema misu midi bwase ai no.

¹² Odini na esika enɛnɛ a tei emilema misu; milema minu bɛnɛ ko midi na sii.

¹³ Oko boa, bopele bo bosɔnibɔtɔne o ekɔmɛli ebɛngɛ; hojani milema minu pongono.

¹⁴ T’okataneni oko na bato baya badi pɛ bojima Njambe, mojɔ bo bopele na bobe te bapandake nongo limbaci. Na bohu na modidi te bapandake limbaci.

¹⁵ Masiya na Beliala baditi na monɔkɔ momɔci; na moto oejimeli, na moto yona opeliti ejimeli, baditi a libondo limɔci.

¹⁶ Tempelo eNjambe ebɔngiti nongo na bilimo. Iso bodi tempelo eNjambe obomɔ; mojɔ bo Njambe abala bo, Mbi nâda a tei ebu, na nadala a tei ebu; Nada Njambe obu, na bo bâda bato bambi.

¹⁷ A mojɔ momina, Kumu abalaka bo, Imanani a tei ebu; sahɛngɛni; Pɛ bobɛnjɛni nongo eka ebosɔtɔ, Na mbi nâsɔ no bopele.

¹⁸ Mbi nâda sangwa’nu; Ino ôdani bana-bami bambi na bana-bali bambi. Kumu ongulu ebonɔ abalaka boa.