2 Bakolinto 3 - Nouveau Testament en Ngombe 1961

Elomu eObwɛnji

¹ Iso bobengi bosakumeja koko so bɛnɛ? Iso bobwani bosɔ mikanda o asɔkɔ bakina bato, a bojebeja no ekɔmɛli esu, isa mikanda minu a bojebeja bato ekɔmɛli esu?

² Ino bɛnɛ odini mokanda mosu mua mosɔnɔmɔ a milema misu; bato basusu bamolangaka na bamojebaka.

³ Na onejakani bo odini mokanda molomi Masiya na su, mua mosɔnɔmɔ na Mwembo moNjambe obomɔ, te nongo na madiba mamokanda; mosɔnɔmɔ a Inilema mibato, te a matai.

⁴ Ejimeli esu edi boa ai Njambe a mojɔ moMasiya.

⁵ Bobwaniti bobala bo bodi bohɔnɔ mokina mojɔ na ngulu esu bɛnɛ. Ngulu esu ecingi oko na Njambe pɛ,

⁶ yona obɔngeja so bo bodae bakɔmɛli baMokongo Moyene, bakɔmɛli baMwembo, te nongo bakɔmɛli babi-kenge bia bisɔnɔmɔ; mojɔ bo, mibeko mia misɔnɔmɔ miwaka oko bowa; Mwembo ko mopaka bomɔ.

⁷ Isa mojɔ mobogwa mua mosɔnɔmɔ a matai modoa na ekumu, esingaiti mua moMwembo!

⁸ Mojɔ bo BaYisalaele baihɔnɔ bonja boso boMose cina ebolailai a boso bonde, bolailai bua bodimoaka.

⁹ Oko boa isa elomu ebodumba edaka na ekumu, esingaiti elomu ebolongeja!

¹⁰ Soti mɛnɛ, mua modaka boso na ekumu, mopeliti koko ekumu edɛye, mojɔ bo ekumu etongo yena enɔi emodimoja.

¹¹ Mojɔ bo, isa mojɔ mua moidaka na boyeyoa modoa na ekumu, esingaiti mojɔ mua moyeyoaka!

¹² Oko boa, adi so na njingo emina, bobalaka na nu a bohu mɛnɛ.

¹³ Botakɔkɔ o akɔ Mose yona ohua hoso bonde, bo BaYisalaele bata’nɛ ekumu yena edimoaka.

¹⁴ Milema mibu ko miidaka nongo na njɛnɛ; nongo bakalanga Mokongo Moyou busa bu, ehuako emina edi oko, mojɔ bo ehuako emina edi bodonga oko na Masiya.

¹⁵ Ee, oko busa bu, bakalanga mokanda moMose, ehuako ehuaka milema mibu.

¹⁶ Moto ko akahekoa ai Kumu, ehuako emina edi hodonga.

¹⁷ Kumu adi oko Mwembo, na bosɔnii bodi oko a esika edi Mwembo moKumu.

¹⁸ Iso basusu, maso masu a bohu, bonjaka ekumu eKumu, o anjaka so a talatala, na bokindoaka a elimo ende. Bokinaka ekumu emɔci a bosɔ ekumu etongo; mojɔ momina mocingi oko na Kumu yona odi Mwembo.