2 Bakolinto 12 - Nouveau Testament en Ngombe 1961

¹ Moto abwaniti bosakumeja; mbi ko nadi bosakumeja; nadi bobala a mojɔ monjɔti na maboloja maKumu.

² Mbi naje-baka moto a tei eMasiya yona otombama oho a Diko yena enɔi, bianga bisii edɛye domi-na-binɛi. (Isa a mokuku, isa amana a mokuku, nitajeba; Njambe pɛ ajebaka.)

³ Najebaka bo moto omina atombama a Paladiso. (Isa a mokuku, isa amana a mokuku mtajeba; Njambe pɛ ajebaka.)

⁴ Na aka mijɔ mibombamake Inia mibɔngiti na moto bobala.

⁵ Mbi nadi bosakumeja a mojɔ momoto omina; a mojɔ mombi mɛnɛ ko, nadi bosakumeja oko a mojɔ moboyɛmbu bombi pɛ.

⁶ Akɔki mbi pala bo nasakumejae, ka nitada nongo egegele, mojɔ bo nabwani bobala oko ngando jisoti. Nadi bokina mojɔ momina ko; mojɔ bo mtapalaka bo bato balɛe bo nadi ekina elimo etongo, oko moto onɛkɛ bo na miso, na gala ekaka bo na matoi.

⁷ Mbi mɛnɛ nasɔ njubɛ a mokuku, bo nasaka huula na egbo a mojɔ momaboloja maNjambe manɛnɛ, oko obwɛnji oSatana a bopukeja mbi, bo nasaka da na egbo.

⁸ Nangɔɔnɔ Kumu bihole bisato bo aedongejae.

⁹ Iyo ko abala na mbi bo, Monganji mombi mobwani na wɛ, mojɔ bo ngulu embi edi boboloa na soti oko a tei eboyɛmbu. A mojɔ momina, nadi bosakumeja na sepi mɛnɛ a mojɔ moboyɛmbu bombi, bo ngulu eMasiya edae ai mbi.

¹⁰ Oko boa, nasepaka na boyɛmbu, na biloli, na minɔngɔ, na madingoa, na jɔɔlɔ, a mojɔ moMasiya. Mojɔ bo, ehole edi mbi na bwɛmbu, ehole edi mbi na ngulu oko yena.

¹¹ Adi mbi na ebalabala? Ino bɛnɛ olindini mbi, no baya babwani bojima mbi. Mojɔ bo, nongo adi mbi moto-ngasa, naditi nongo ngɔngɔ jibabwɛnji bagala, pɛpɛ nongo mweka.

¹² Bimbete, na mindumba, na bilomu bipipo, bingameja elomu embi eobwɛnji a tei enu na lingbangba linɛnɛ.

¹³ Ngando jikɔ mbi a Menga matongo, naikɔ a tei enu pongono? Mojɔ mu momɔci ko modi; naidaka muna ai no. Yɛni mbi mojɔ mu mobe!

¹⁴ Hokeani; nadi na mosɛlingo mobodoa ai no—ehole ebisato ye; na nitada nongo muna ai no. Mbi mtapalaka leka lonu, napalaka oko no bɛnɛ. Bana te babɔkɔke baboti; baboti ko babɔkɔkɔ bana babu.

¹⁵ Mbi nadi bopa leka lombi losusu na sepi, na nadi bosapa mbi mɛnɛ pongono a mojɔ momiembo minu. Epaeli enu ai mbi ekatita, pɛ mojɔ; epaeli embi ai no ehɛkɛ oko bohɛ.

¹⁶ Nongo okajimani bo naidaka muna ai no, obalakani bo nadi na epulu, na nakɔ mokina mojɔ mopoloso ai no.

¹⁷ Yana aloma mbi bato ai no, nasɔ ekina eka enu ai bato bamina?

¹⁸ Na’nga Tito bo akɛe, na naloma moninga otongo bo amopakae. Tito akonja likonja linu? Iso boidaka na ekɔmɛli emina pongono? Ekɔmɛli esu na nde te emɔci?

¹⁹ Olɛkɛni ekoka ye bo so bosalongejaka ai no? Ngando jisusu jibalaka so baninga jidi a bopingeja no; na bojibalaka a boso boNjambe na a tei eMasiya.

²⁰ Mokakwano mombi modi bo, nakamea oho ai no, nitatana no o adi mbi na njingo; na bo mbi mɛnɛ nitada o alɛkɛ no. Isa nadi botana no na miano, na kɛnjɔ, na likaka, na misoo, na biloli, na egbo na wokowoko?

²¹ Nadi na mokakwano isa Njambe adi bokeja mbi sɔni a boso bonu a bodoa bombi; isa nadi boyea bio a mojɔ mobato banɛnɛ baya bakɔ bobe boso, na bajasakini dosa a mojɔ mobikɔmɛli bibu bibosɔtɔ, na bɔɔli, na bosambolu.