2 Bakolinto 10 - Nouveau Testament en Ngombe 1961

Elomu ePaulo

¹ Mbi Paulo, nakada a tei enu, nadi o moto-ngasa, bohali ko ko nadi na bogale; mbi nangɔɔnɔkɔ no na bowi na boyɛmbu boMasiya.

² Nangaka no bo nakadoa oho ai no, otalindani mbi a bobala na bopipo, o akanaka mbi bobala na bakina bato baya balɛkɛ bo ekɔmɛli esu edi oko ekɔmɛli ebato bangondo.

³ Bodi a ngondo soti; bila enaka so ko editi bila engondo.

⁴ Mojɔ bo molilo mosu mobila moditi molilo mongondo; molilo momina ko modi na ngulu eNjambe a bogbokeja bisika bipipo bisoki.

⁵ Bobejaka ndungu jibato, na egbo yena esakumejaka a bolona ejebeli eNjambe, na bopeaka malɛ masusu masungu, bo madae na lisuma ai Masiya.

⁶ Na lisuma linu likabwana, bodi na mosɛlingo bo bodingojae lipanga lisusu.

⁷ Ino onjakani oko boso bomoto pɛ? Isa okina moto ajimaka bo adi moto oMasiya, abwamti bobosa bo so bodi koko bato baMasiya, o adi yo mɛnɛ.

⁸ Nongo nakasakumeja bou mɛnɛ a mojɔ mokpaci esɔ mbi ai Kumu, nadi bolonga, mojɔ bo apani kpaci emina a bopingeja no, te a bodumba no.

⁹ Nitapalaka bo bato balɛe bo nangbengbejaka no na mikanda mimbi.

¹⁰ Bakina babalaka bo, Mikanda minde midi mipipo, na midi na kpaci; yo mɛnɛ ko akada a tei esu, adi oko na boyɛmbu, na etɔndɛli ende edi ngasa mɛnɛ.

¹¹ Bato baya babalaka boa babwani bocingea bo bikenge bisu a mikanda yana adi so bohali, na bikɔmɛli bisu a tei enu bidi oko amɛci.

¹² Iso botapalaka bo bosa’ngɛe na bo bosabwanejae na bato baya basakumejaka bo bɛnɛ. Ibo basa’ngɛkɛ na mwɛngi mobu bɛnɛ; moto na moto anjaka okina otongo bo asa’ngɛe na nde; bapeliti bocingea.

¹³ Iso ko botasakumeja bou; bodi bosakumeja oko na mwɛngi mopa Njambe so, na mwɛngi momina momeaka ai no.

¹⁴ Iso botanɔkɔ mwei mosu; elomu esu editi ai no? Omea boso ai no na Mwako Mopele moMasiya nda? te so?

¹⁵ Botasakumejaka ngasa; bota-sakumejaka a mojɔ mobilomu bibato batongo; na ejimeli enu ekahɛ, njingo esu edi bo mwei moelomu esu a tei enu modi bokɛ bohali mɛnɛ,

¹⁶ bo botɔndɔe Mwako Mopele a makota maya manɔi no, pɛ bosakumeja nongo na elomu ekɔ moto otongo a esika etongo.

¹⁷ Moto akapala bo asakumejae, yɛ akumejae oko Kumu.

¹⁸ Mojɔ bo, Kumu akalongeja moto, moto omina adi molongi, te moto yona osalongejaka yo mɛnɛ.