2 Bakolinto 1 - Nouveau Testament en Ngombe 1961

¹ Njɛbɛ esu Paulo obwɛnji oMasiya Yesu a mojɔ mobolulea boNjambe, na mwangwa’mbi Timoteo, a Denga diNjambe dia didi a Kolinto, na ai bato basusu baMasiya baya badi a likota lisusu liAkaya.

² Yɛ monganji na bowi boNjambe Sangwa’su na Kumu Yesu Masiya bodae ai no.

Bogɔmbeja boPaulo a tei eMinɔngɔ

³ Mbi nasakoaka Njambe Sange ’Kumu osu Yesu Masiya, Sango yona odi na monganji mosusu, na Njambe obogɔmbeja bosusu.

⁴ Iyo agɔmbejaka so a tei eminɔngɔ misu misusu, bo so bogɔmbejae bato batongo baya badi na minɔngɔ, o agɔmbejaka Njambe so bɛnɛ.

⁵ Mojɔ bo, bokakatana na Masiya a madingoa mande manɛnɛ, bodi bosɔ libondo linɛnɛ libogɔmbeja a mojɔ moMasiya.

⁶ Isa so bodi na minɔngɔ, cina eminɔngɔ mimina edi bo ino osɛni bogɔmbeja na mohelo. Na so bokasɔ bogɔmbeja, bodi a bogɔmbeja no, na odini bosɔ bogɔmbeja bomina, okadani na lingbangba a tei emadingoa, o adingoaka so.

⁷ Iso bodi na njingo enɛnɛ ai no. Bojebaka bo okaka-tanani na su a madingoa masu, odini bokatana na su koko a bogɔmbeja bosu.

⁸ Baninga, iso bopalaka bo ojebeni mojɔ momonɔngɔ monɛ so a Asia. Iso bobukana oko bobukana na muna momonɔngɔ. Mojɔ momina monɔ ngulu esu, na boidaka na njingo ebohela.

⁹ Bolɛ bo ehole esu ebogwa emea, na mojɔ momina mohekoja ejimeli esu ai Njambe yona ongɔjɔkɔ bagwake, te nongo ai so bɛnɛ.

¹⁰ Iyo aheleja so a bogwa bua bobe; ahelejaka so koko edɛye, na njingo esu edi oko ai yo bo ahelejae so a masu mangɔngɔ.

¹¹ Kɔmejani so na bingeeli binu, bo bato banɛnɛ basakoe Njambe a mojɔ momonganji mosɔ so, cina ebingeeli bibu.

Elomu ePaulo

¹² Iso bosepaka na mojɔ mumu; molema mosu motataka bo ekɔmɛli esu a miso mabato, na a miso manu bɛnɛ, edaka na bosɛnɔ na lisuma ai Njambe; te nongo na bowɛi bongondo, oko na mo-nganji moNjambe.

¹³ Mikanda misɔneaka so no miditi na cina etongo; midi oko na mijɔ milangaka no na micingeaka no. Nadi na njingo bo odini bocingea soti,

¹⁴ o acingeaka no mweka edɛye, bo obwanini bosepa a mojɔ mosu, na bo so bodi bosepa a mojɔ monu a busa boKumu Yesu.

¹⁵ A mojɔ momina, mbi nadaki na njingo bo napete kɛ oho ai no a bohɛjɛ sepi enu oko bohɛjɛ.

¹⁶ Mokano mombi modaka bo nanɔe njea enu a bokɛ oho Makedonia, na bohula Makedonia koko ai no, bo osukejaeni mbi a njea eYuda.

¹⁷ Adaka mbi na mokano momina, nadaka na milema mibae? Mijɔ mikanaka mbi midi mijɔ mimoto ongondo? Adi mbi na minɔkɔ mibae, Ee! ee! na Pɛpɛ! pɛpɛ!

¹⁸ Oko Njambe! monɔkɔ mosu ai no moditi na mojimo na bongana, Ee na Pɛpɛ.

¹⁹ Iso na Silwano na Timoteo botɔndɔ no oko mwako moMwana ’Njambe, Yesu Masiya. Iyo aditi Ee na Pɛpɛ; a tei ende edi oko Eɛ.

²⁰ Mojɔ bo sako jisusu jiNjambe jingami oko na nde; a mojɔ momina, so bokumejaka Njambe na Amen, a kombe ende.

²¹ Njambe yo mɛnɛ apingejaka so na no a tei eMasiya, na ahɛngɛ so a elomu.

²² Abakea embete ende ai so, na abopa Mwembo a tei emilema misu o ndanga.

²³ Mbi nabeaka Njambe o motati omolema mombi—mbi naidoa obo Kolinto, mojɔ bo naipalaka bohɛjɛ monɔngɔ monu.

²⁴ Iso ko boditi nongo bakumu baejimeli enu; bokɔkɔ elomu na nu bo odaeni na sepi, mojɔ bo odini bambilimake a ejimeli enu.