2 Batɛsalɔnike 3 - Nouveau Testament en Ngombe 1961

Bileho Bisuka

¹ Mojɔ motongo baninga,—mgakani a mojɔ mosu, bo Ebaeli O eKumu enangane na egbokejae o akɔi yo a tei enu.

² Ingakani bo bohele a mɔmɔ mabato babe balaboake; mojɔ bo bato basusu bapeliti ejimeli.

³ Kumu ko atakputoa. Iyo âmbilimeja no, na âkakela no ai Yona Mobe.

⁴ Iso koko bodi na ejimeli ai Kumu a mojɔ monu, bo okɔkɔni na bo Okɔeni ngando jilehaka so no.

⁵ Yɛ Kumu adalejae milema minu a njea engɛnjɔ eNjambe, na a lingbangba liMasiya.

⁶ Iso bobekeaka no baninga a kombe eKumu osu Yesu Masiya bo obɔtɔneni na baninga basusu baya badi na ekɔmɛli ebe, baya badi pɛ bosuma bokoja bosɔ no ai so.

⁷ Ojebakani no bɛnɛ bo obwanini bokoana na su, mojɔ bo ekɔmɛli esu a tei enu eidaka ebe.

⁸ Boiyaka molɛmbɛ momoto ngasa. Bokɔ elomu na bulu na moi, elomu epipo emidungu, bo botada nongo muna ai no.

⁹ Te bo boibwana bosɔ monganji monu; bokɔ boa bo okoaneni na ekoaneli esu.

¹⁰ Mojɔ bo, bopa no mobeko mu yana adaka so na nu, bo, Moto amiti kɔ elomu, atayaka.

¹¹ Iso bokaka mwako mobakina banu baya badi na ekɔmɛli ebe, pɛ bokɔ nongo elomu, na balɛkɛ oko mijɔ Mibato batongo pɛ.

¹² Iso bobekeaka na bolehaka bato baya badi na ekɔmɛli emina, a kombe eKumu Yesu Masiya, bo bakɔe elomu na yongi, a bodiha molɛmbɛ mobu bɛnɛ.

¹³ Ino ko baninga, t’ongwaeni oko bikɔmɛli bipele.

¹⁴ Moto akalona bosuma mijɔ Mibalaka so a mokanda mu, mombeteani; t’okataneni oko na nde, bo omokejaeni sɔni.

¹⁵ Pɛ ko bomonjani o soki enu; molehani o mwangwa’nu.

¹⁶ Yɛ Kumu obowi yo mɛnɛ apɛ no bowi bihole bisusu a njea jisusu. Yɛ Kumu adae na nu basusu.

¹⁷ Mbi Paulo nasɔnɔkɔ njɛbɛ ye na ebɔ embi mɛnɛ; edi embete embi a mikanda mimbi misusu. Bosɔnɔ bombi bodi oko boa.

¹⁸ Yɛ monganji moKumu osu Yesu Masiya modae na nu basusu.