1 Yoane 4 - Nouveau Testament en Ngombe 1961

Mojɔ moBakoja baBokosea

¹ Baninga, t’ojimeni oko miembo misusu. Sisoani miembo a bojeba isa micingi na Njambe, cina bo batɔndɔi babokosea banɛnɛ banangani a ngondo.

² Odini bombetea Mwembo mo-Njambe oko na mojɔ mu; miembo misusu mia mijamaka bo Yesu Masiya adoa o moto, micingi na Njambe.

³ Miembo misusu mia mijimiti Yesu, micingiti nongo na Njambe. Mwembo mua modi boa modi oko mwembo moSoki-eMasiya; o’kani bo mwembo momina modi bodoa, na modi a ngondo e dɛye.

⁴ Bana bambi, ino odini bana baNjambe, na ogbokejami miembo mimina, cina bo, na yona odi a tei enu, na yona odi a ngondo, yona odi a tei enu anɔi na ngulu.

⁵ Bato bamina badi bato bangondo; oko boa ngando jibalaka bo jidi ngando jingondo, na ngondo ebabokeaka.

⁶ Iso ko bodi bato baNjambe. Moto na moto yona ojebaka Njambe ahokeaka so; na moto na moto yona oditi moto oNjambe t’ahokeake so. Oko boa bombeteaka mwembo mosoti na mwembo molaboake.

Mojɔ moNgɛnjɔ

⁷ Baninga baepaeli, yɛni bodae na ngɛnjɔ, moto ai mina’nde moto. Mojɔ bo ngɛnjɔ ehulaka ai Njambe, na moto yona odi na ngɛnjɔ abotama na Njambe na ajebaka Njambe.

⁸ Moto yona opeliti ngɛnjɔ t’ajebake Njambe, mojɔ bo Njambe adi ngɛnjɔ.

⁹ Ngɛnjɔ eNjambe eboloa a tei esu oko na mojɔ mu, bo Njambe aloma mwana’nde obotama omɔci a ngondo, bo so bohele a mojɔ monde.

¹⁰ Iye edi ngɛnjɔ, te bo so bodaka na ngɛnjɔ ai Njambe, oko bo yo adaka na ngɛnjɔ ai so, na aloma Mwana’nde bo adae lisiko a mojɔ mojibe jisu.

¹¹ Baninga baepaeli, isa ngɛnjɔ eNjambe ai so edaka boa, iso bobwani boda na ngɛnjɔ pongono, moto ai mina’nde moto.

¹² Moto anɛkini Njambe, pɛpɛ nongo omɔci. Njambe ko ayeyoaka a tei esu, na ngɛnjɔ ende ebɔngi a tei esu, isa bodi na ngɛnjɔ moto ai mina’nde moto.

¹³ Bojebaka bo bodi a tei ende, na bo yo adi a tei esu, mojɔ bo abopi Mwembo monde.

¹⁴ Iso bonɛ, na botɔndɔkɔ bo Sango aloma Mwana’nde o Moheleja ongondo.

¹⁵ Moto na moto yona ojimaka bo Yesu adi Mwana ’Njambe, Njambe adi a tei ende, na yo mɛnɛ a tei eNjambe.

¹⁶ Iso bojebaka na bojimaka ngɛnjɔ eNjambe ai so. Njambe adi ngɛnjɔ. Moto yona odi a tei engɛnjɔ adi a tei eNjambe, na Njambe adi a tei ende.

¹⁷ Ngɛnjɔ ebɔngi ai so bo botada nongo na mokakwano a busa boEsambi mojɔ bo so bodi a ngondo o adi yo.

¹⁸ Bɔ boditi nongo a ngɛnjɔ. Ngɛnjɔ yena ebɔngi ebenganaka bɔ. Bɔ bodi oko a mojɔ momokindo, na isa moto adi na bɔ, ngɛnjɔ ende ebɔngiti.

¹⁹ Iso ko bodi na ngɛnjɔ, mojɔ bo yo adaka na ngɛnjɔ ai so boso.

²⁰ Moto akabala bo, Mbi nadi na ngɛnjɔ ai Njambe, yana adi yo na mwangwa’nde soki, moto omina adi mokosei. Mojɔ bo isa aditi na ngɛngɔ ai mwangwa’nde yona onɛnɛkɛ na nde, atada nongo na ngɛnjɔ ai Njambe yona odi yo pɛ bonɛ.

²¹ Na so bosɔ mobeko mu ai yo, bo moto yona odi na ngɛnjɔ ai Njambe abwani boda koko na ngɛnjɔ ai mwangwa’nde.