1 Yoane 2 - Nouveau Testament en Ngombe 1961

¹ Bana bambi bakɛkɛ, mbi nasɔneaka no ngando jiji bo otakɔni nongo bobe. Moto ko akakɔ bobe, bodi na mosili a esika eSango, oko Yesu Masiya, yona obodongo.

² Iyo adi lisiko a mojɔ mojibe jisu, te jisu pɛ, oko a mojɔ mojibe jingondo esusu.

Lisuma a Mibeko

³ Bokasuma mibeko mide, bodi bojeba na soti bo bomojebaka, oko na mojɔ momina.

⁴ Moto akabala bo, Mbi namojebaka, na moto omina pɛ bosuma mibeko minde, adi oko mokosei, na Soti editi a tei ende.

⁵ Moto ko akasuma ebaeli ende, ngɛnjɔ eNjambe ebɔngi soti a tei ende. Bojebaka bo bodi a tei ende oko na mojɔ momina.

⁶ Moto yona obalaka bo adi a tei ende abwani bodala a njea edalaka yo.

⁷ Baninga, mobeko mosɔnɔkɔ mbi ai no moditi mobeko moyene. Modi oko mobeko moyou mua modaka na nu a bobanga. Mobeko mu moyou modi oko Ebaeli e’ka no.

⁸ Endele ko, mobeko mosɔneaka mbi no modi moyene, modi mobeko mosoti a tei ende na a tei enu. Cina bo modidi mokɛkɛ anɔe, na bohu bosoti bohoi e dɛye.

⁹ Moto akabala bo adi a bohu yana alonaka yo mwangwa’nde, adi oko a modidi.

¹⁰ Moto yona odi na mwangwa’nde epaeli adi a bohu, na libaku liditi a tei ende.

¹¹ Moto ko yona odi na mwangwa’nde soki adi a modidi, na adalaka a modidi; t’ajebake esika ekɛkɛ yo, mojɔ bo modidi mohindejaka miso mande.

¹² Nasɔneaka no bana bambi bakɛkɛ, mojɔ bo jibe jinu jikinama a mojɔ mokombe ende.

¹³ Nasɔneaka no basango, mojɔ bo oje-bakani yona odaka oko a bobanga mɛnɛ. Nasɔneaka no menga, mojɔ bo ogbokejami yona Mobe. Nasɔnei no bana bakɛkɛ mojɔ bo oje-bakani Sango.

¹⁴ Nasɔnei no basango, mojɔ bo ojebakani yona odaka oko a bobanga mɛnɛ. Nasɔnei no menga, mojɔ bo odini na ndangasa, na Ebaeli eNjambe eyeyoaka a tei enu, na ogbokejaini yona mobe.

¹⁵ T’opalakeni oko ngondo, isa leka lua lodi a ngondo. Isa moto apalaka ngondo, apeliti nongo ngɛnjɔ ai Sango a tei ende.

¹⁶ Mojɔ bo, ngando jisusu jia jidi a ngondo, na posa emokuku, na posa emiso, na jala emohelo mu, jicingi oko na ngondo pɛ, te nongo na Sango.

¹⁷ Ngondo ekɛkɛ adimoe, na posa engondo pongono. Moto ko yona okɔkɔ bolulea boNjambe ayeyoaka oko na bosusu.

¹⁸ Bana bambi, ehole esuka emei. Ino o’kani bo Soki-eMasiya adi bodoa. Soki-jiMasiya badoi banɛnɛ, na badi e dɛye; oko boa bojebaka bo ehole esuka emei.

¹⁹ Bahɔtɔnɔ na su oko bobɔtɔnɔ; baidaka bato basu. Akɔki bo da bato basu ka bayeyoi na su. Bamana ko, na mojɔ momina monejaka bo baditi bato basu, bo basusu mɛnɛ.

²⁰ Ino ko osini kpaci ai Yona Mosɛnɔke, na odini na ejebeli, no basusu.

²¹ Mbi nasɔneaka no mojɔ bo ojebakani Soti, na oje-bakani bo Soti etabotaka bokosea. Nitasɔneaka no mojɔ bo otaje-bakani Soti.

²² Odi mokosei nda? Oko yona onganaka bo Yesu adi Masiya. Iyo adi Soki-eMasiya, oko yona onganaka Sango na Mwana.

²³ Pɛpɛ nongo moto yona onganaka Mwana odi na Sango. Moto ko yona ojimaka Mwana adi na Sango pongono.

²⁴ Ino ko, kinani mojɔ modae a tei enu mua moka no a bobanga. Mojɔ moka no a bobanga mokayeyoa a tei enu, odini boyeyoa no bɛnɛ a tei eMwana na a tei eSango.

²⁵ Na sako ekinea yo so edi oko bomɔ bua bodi na bosusu.

²⁶ Nasɔnei no ngando jimina a mojɔ mobato baya bapalaka bola-boja no.

²⁷ Bosopea ko bosɔ nb ai yo boyeyoaka na nu. Mojɔ mua motakaka na nu moditi bo okina otongo akojae no, mojɔ bo bosopea bonde bokojaka no a mojɔ mongando jisusu. Bosopea bomina bodi soti mɛnɛ, te nongo bokosea. A mojɔ momina, yeyoani a tei ende, o akoa no na bosopea bomina.

²⁸ E dɛye, bana bambi, yeyoani a tei ende. Oko boa, yo akamana, bodi bo’ma a boso bonde na eci, te nongo na sɔni.

²⁹ Isa ojebakani bo yo adi na bodongo, ojebakani bo moto na moto yona odi na ekɔmɛli ebodongo abotami na nde.