1 Bakolinto 9 - Nouveau Testament en Ngombe 1961

Paulo Asalongejaka a Mojɔ moElomu Ende

¹ Mbi naditi sɔmi? Mbi naditi obwɛnji? Nanɛ Yesu Kumu osu? Elomu embi a tei eKumu, te no bɛnɛ?

² Isa batongo bataji-maka bo nadi obwɛnji, nadi obwɛnji ai no, mojɔ bo odini embete bo Kumu apani elomu eobwɛnji.

³ Bosɔmbeja bombi ai baya basambejaka mbi bodi oko bu.

⁴ Iso bobwaniti boyaka na bomwaka?

⁵ Iso bokapala, bobwamti bosɔ mwali oejimeli bo bodale na nde o akɔkɔ babwɛnji batongo, na bananango baKumu, na Kepa pongono?

⁶ Adi so babae pɛ, so na Balanaba, pɛpɛ kpaci a bokɔ boa?

⁷ Soda adi bokɛ a bila, na pɛ moto bomobɔkɔ? Moto aka’na mole, atayaka mbuma jimole momina? Mobanei obata atamwaka mabɛi mabata?

⁸ Nabalaka mojɔ momina na kpaci emoto pɛ? Pɛpɛ. Mojɔ momina moditi a Mibeko?

⁹ Mojɔ bo, mosɔnɔmɔ a Mibeko miMose bo, T’okande oko ebombo engɔmbɔ yona ondaka ndongo. Adi Njambe na bolɛ oko ai ngɔmbɔ pɛ?

¹⁰ Atabalaka boa a mojɔ mosu pongono? Ee, mosɔnɔmɔ a mojɔ mosu; mojɔ bo moto yona oliaka gbie, adi boha na njingo, na yona ondaka ndongo, adi bonda na njingo ebosɔ libondo.

¹¹ Boka’na dona dingando jiMwembo a tei enu, bobwamti bosɔ libondo lileka lonu?

¹² Isa ojimakani bo bakina batongo bakɔe na nu boa, esingaiti so! Iso ko boikɔkɔ boa, pɛpɛ nongo mweka. Bodingoaka oko bodingoa bo botabindaneja Mwako Mopele moMasiya.

¹³ Otajebakani bo bato baya bakɔkɔ elomu etempelo bayakaka leka lotempelo, na baya bakɔkɔ elomu elitumbu limasiko basɔkɔ libondo limasiko.

¹⁴ Oko boa, Kumu abekea bo baya batɔndɔkɔ Mwako Mopele badi bosɔ libondo libu lileka a mojɔ moMwako Mopele.

¹⁵ Mbi ko, nongo adaka mbi na kpaci ebokɔ boa, naidaka nongo na ekɔmɛli emina; na nitasɔnɔkɔ ngando jimina na njingo bo nadae na kpaci emina. Mbi nasakumejaka na ekɔmɛli emina, na najimi bo nadi bopeta gwa, bo moto asaka katoa ekumu emina ai mbi.

¹⁶ Atɔndɔkɔ mbi Mwako Mopele, nitasaku-mejaka na mojɔ momina, mojɔ bo nalindamaka a botɔndɔ Mwako Mopele. Namiti tɔndɔ Mwako Mopele nadi boda na monɔngɔ monɛnɛ a molema mombi.

¹⁷ Nakakɔ mojɔ momina na bolulea bombi mɛnɛ, nasɔkɔ ndese. Nakakɔ boa ko a mojɔ mobolulea bua boditi bolulea bombi mɛnɛ, cina edi bo nasi elomu emina bo naekɔe.

¹⁸ Na ndese embi edi bo? Edi oko bo, nongo adi mbi na kpaci a bosɔ likonja a mojɔ moetɔndɛli embi, natɔndɔkɔ Mwako Mopele boangasa, pɛ bosɔ nongo likonja.

¹⁹ Mbi naditi mobuli omoto. Endele ko, nasapika mobuli obato basusu bo nadihe bato banɛnɛ.

²⁰ Nadi MoYuda ai Bayuda, bo nalɛnge BaYuda. Nadi moto yona osumaka Mibeko ai bato baya basumaka Mibeko, bo nalɛnge bato baya basumaka Mibeko. (Mbi mɛnɛ ko naditi cina jiMibeko.)

²¹ A mojɔ mobato baya bapeliti Mibeko, nadi o moto yona opeliti Mibeko, (te nongo bo naditi cina jiMibeko miNjambe; nadi cina jiMibeko miMasiya) bo nalɛnge bato baya bapeliti Mibeko.

²² Nadi moyɛmbu ai bayɛmbu, bo nalɛnge bayɛmbu. Nadi tungu jisusu ai bato basusu bo nameke njea jisusu a boheleja bakina bato.

²³ Nakɔkɔ boa a mojɔ moMwako Mopele, bo nadae na libondo limbi a elomu emina.

²⁴ Otajebakani bo bato bakapota mbambano, bapotaka bo basusu? yona osɔkɔ ndese ko, oko omɔci pɛ. Oko boa toma potani a bosɔ ndese.

²⁵ Moto na moto yona osɛlingoaka a mojɔ mombambano asumaka bikia. Ibo bakɔkɔ boa bo basɛ likongo lingasa lia lidi bogwa; iso ko bokɔkɔ a mojɔ molikongo lia lidi boyeyoa oko an bosusu.

²⁶ A mojɔ momina, mbi napotaka bojo, te epotapota. Na’naka boma na soti te na busubusu.

²⁷ Nadingojaka na nagbokejaka mokuku mombi, bo nasaka samboe, mbi yona otɔndɔ Mwako Mopele ai bato, batongo.