1 Bakolinto 7 - Nouveau Testament en Ngombe 1961

Mahɔjɔ maBaKolinto

¹ A mojɔ mongando jisɔnea no mbi—bopele bo moto atabɛnjɛe nongo mwali.

² Endele ko, momi abwani boda na mwali onde mɛnɛ, na mwali abwani boda na muma’nde mɛnɛ, a bogbesea bɔɔli.

³ Momi abwani bobakea mwali onde mɛnɛ bokonde, na mwali abwani bokɔ boa na muma’nde.

⁴ Mojɔ bo, mwali aditi moswa omokuku monde mɛnɛ; muma’nde adi moswa omokuku momwali. Muma’nde koko boa; aditi moswa omokuku monde mɛnɛ; moswa omokuku monde, oko mwali onde.

⁵ Momi abwaniti bobulɛ mwali onde, na mwali abwaniti bobulɛ muma’nde. Okakɔni boa bo osahɛngɛeni a mojɔ moho’nga ekina ehole, kɔni oko na mojimo mobasusu babae. Mojɔ momina mokasia ko, siejani ekia emina, bo Satana asaka meka no, na otahɔnɔkɔni bogbokeja posa jinu.

⁶ Mojɔ mobali mbi modi oko eleho, te mobeko.

⁷ Posa embi edi bo bato basusu badae o adi mbi mɛnɛ. Moto na moto ko asɔkɔ libondo linde ai Njambe; okina ekɔmɛli emɔci, otongo ekɔmɛli etongo.

⁸ Eleho embi ai bandengi, na ai bali babogwa, edi bo bayeyoe o adi mbi mɛnɛ.

⁹ Bamiti hɔnɔ bosabekea ko, babwani bolongana. Na bolongana, na posa a tei enu o mosa, enɔi na bopele oko bolo ngana.

¹⁰ A mojɔ mobato baya balongani, mobeko modumbaka mbi moditi mombi mɛnɛ, modi oko mobeko moKumu; modi bo mwali atadonga ai muma’nde.

¹¹ Isa adongi ko, adi boyeyoa oko mondengi, isa adi bosɔmbɔ ai muma ’nde. Na momi koko boa; abwaniti bodonga ai mwali onde.

¹² Eleho embi ai bato batongo, te eleho eKumu, edi oko ye; isa moto oDenga adi na mwali yona odi pɛ hojima Njambe, na apalaka bo adae na muma’nde, momi omina abwaniti bomodongeja.

¹³ Isa mwali adi na momi yona odi pɛ bojima Njambe, na momi omina apalaka bo adae muma’nde, mwali omina abwamti bomolona.

¹⁴ Mojɔ bo momi yona odi pɛ bojima Njambe akatani na bojongoa bomwali onde; na mwali yona odi pɛ bojima Njambe akatani na bojongoa bomuma’nde. Emiti da boa, o bana banu badae bana basɔni, te nongo bana baya bahɛngɛmɛ ai Njambe.

¹⁵ Isa momi, isa mwali, yona odi pɛ bojima Njambe apalaka adonge, yɛ adonge. Ekada boa, moto oDenga, isa momi isa mwali, aditi na mbɔci. Mojɔ bo Njambe abea so bo bodae na bowi.

¹⁶ Wɛ mwali otajebaka bo obwani boheleja muma’we? Na wɛ momi, otajebaka bo obwani boheleja mwali owɛ?

¹⁷ Moto na moto adi bosusa njea emonejaka Kumu. Isa Njambe abea moto a ekina ekɔmɛli, yɛ adae oko na ekɔmɛli emina. Mobeko mombi a Menga masusu modi boa.

¹⁸ Isa balenea moto ganda oko Njambe aipaka mobea, abwaniti bodongeja bimbete bibolena. Na moto akabeama yana adi yo oko na mwea, abwaniti bolenama ganda.

¹⁹ Mojɔ bo, bolena boganda bodi eka engasa, na mwea modi koko eka engasa. Mojɔ mosoti modi oko lisuma a mibeko miNjambe.

²⁰ Moto na moto adi boyeyoa o adi yo a ehole embea ende.

²¹ Isa odaka mobuli yana abeama wɛ, pɛ mojɔ. Okanɛ njea ebosɔmi ko, t’okputoe oko.

²² Kumu akabea moto yona odi mobuli, moto omina adi na bosɔmi boKumu. Na Kumu akabea moto yona odi sɔmi, moto omina adi mobuli oMasiya.

²³ Ino osikoamani na lisiko linɛnɛ. T’odaeni oko babuli babato.

²⁴ Baninga, Njambe akabea moto, yɛ ayeyoe o adaka yo yana abeama yo.

²⁵ Naditi na mobeko moKumu a mojɔ mobandengi. Mbi ko nadi na bolɛ bombi mɛnɛ, na obwanini bojima mbi, mojɔ bo Kumu akɔni monganji.

²⁶ Mbi nalɛkɛ bo moto abwani boyeyoa o adi yo edɛye, mojɔ bo masu ma madi na minɔngɔ.

²⁷ Okatani na mwali? Pɛ boduka njea ebobɔtɔ. Odi mondengi? Pɛ boduka mwali.

²⁸ Momi ko akalongana, atakɔkɔ nongo bobe. Na moseka akalongana, atakɔkɔ nongo bobe. Bato bamina ko badi bonɛ jɔɔlɔ a ngondo ye, na mbi napalaka bo nahelejae no a jɔɔlɔ emina.

²⁹ Baninga, cina emojɔ mobalaka mbi edi bo masu masu maditi manɛnɛ. A mojɔ momina, baya badi na bali babwani boda na ekɔmɛli ebato baya bapeliti bali.

³⁰ Bato baya bayeaka bio babwani boda o bato baya baditi na bio. Bato baya badi na sepi babwani boda o bato baya baditi na sepi. Baya basombaka leka babwani boda o bato baya bapeliti eka.

³¹ Baya badi na bilomu bingondo babwani boda o bato baya babɔtɔnɔ na ngondo, mojɔ bo ngando jingondo ye jisiaka oko bosia.

³² Mbi nitapalaka bo odaeni na mokakwano. Mondengi adi na bolɛ oko a ngando jiKumu, bo asepejae Kumu.

³³ Momi ko, yona odi na mwali, adi na bolɛ a ngando jingondo ye, bo asepejae mwali onde.

³⁴ Mojɔ momwali obolongana, na mwali yona odi mondengi, modi koko boa; baditi amɛci. Mwali yona opeliti momi, adi na bolɛ a ngando jiKumu, bo mokuku monde na mwembo monde midae mihɛngɛmɛke ai Kumu. Mwali ko yona odi na momi, adi na bolɛ a ngando jingondo ye, bo asepejae muma’nde.

³⁵ Nabalaka boa a bokɔmeja no, te a bobindaneja no, bo ekɔmɛli enu ebɔnge, na bo okataneni na Kumu na milema minu misusu.

³⁶ Okina momi ko yona opandi mwali, akalɛ bo ekɔmɛli ende ai mwali omina ebɔngiti, mojɔ bo posa jinde jigbasoi, babwani bolongana. Mojɔ mokada boa, yɛ akɔe o apalaka yo, atakɔkɔ nongo bobe.

³⁷ Moto ko akada na ngulu a molema monde, na abwani bosabekea bo atagboka na posa jinde jimokuku, na andi ngapa bo atalongana na mwali omina, akɔkɔ bopele.

³⁸ Oko boa, yona olonganaka na mwali opanda yo akɔkɔ bopele, na yona odi pɛ bolongana akɔkɔ bopele mɛnɛ.

³⁹ Mwali omoto akatani na muma’nde oko a bogwa bomuma’nde. Muma’nde ko akagwa âcingoama ai yo; na akapala bo alongane na okina momi otongo, pɛ mojɔ—a tei eKumu ko.

⁴⁰ Bolɛ bombi mɛnɛ bodi bo enɔi na bopele akayeyoa o adi yo. Na nalɛkɛ bo nadi na Mwembo moNjambe.